Search This Blog

Thursday, March 18, 2010

ဆင်းရဲ သုံးမျိုး

ဆင်းရဲ သုံးမျိုး

(၁) ဒုက္ခ ဒုက္ခ

(၂) ၀ိပရိနာမ ဒုက္ခ

(၃) သင်္ခါရ ဒုက္ခ

ဒီဆင်းရဲသုံးမျိုးအနက် ဒုက္ခဒုက္ခ-ဆိုတာ ကိုယ်ဆင်းရဲခြင်း၊ စိတ်ဆင်းရဲခြင်းဟာ အမှန်ဆင်းရဲတာဖြစ်လို့ ဒုက္ခဒုက္ခလို့ ခေါ်တယ်။ ဒီ ဒုက္ခဒုက္ခဆင်းရဲမျိုးကိုတော့ ရှာဖွေနေဖို့ မလိုဘူး။ မရှာဘဲနဲ့တောင် တွေ့ရလွန်းလို့ ခက်နေတယ်။

ဝိပရိနာမဒုက္ခ-ဆိုတာ ဖောက်ပြန်သော ဆင်းရဲခြင်းလို့ ဆိုလိုတယ်။ ဘယ်လိုဖောက်ပြန်သော ဆင်းရဲခြင်းလဲဆိုတော့ ဥပမာ-ည ပွဲကြည့်တာပေါ့။ ကိုယ့်စိတ်ကတော့ နှစ်သက်သာယာပြီး ချမ်းသာသလိုလို ထင်နေတယ်။ အမှန်ကတော့ ဆင်းရဲခြင်းတရားပဲ။ အဲဒီလို ဆင်းရဲတာကို ချမ်းသာလို့ထင်နေတဲ့ ဆင်းရဲက ၀ိပရိနာမ ဒုက္ခတဲ့။ သူ့ကိုလည်း ရှာဖွေဖို့မလိုပါဘူး။ အနည်းငယ် စဉ်းစားကြည့်ရုံနဲ့ သိနိုင်ပါတယ်။ ရှာဖွေရမည့် ဒုက္ခက သင်္ခါရဒုက္ခ-တဲ့။

သင်္ခါရဆိုတာ အနက်လေးမျိုး ရှိတယ်။ အဘိဓာန်ဂါထာ နံပါတ် ၈၃၂-မှာ-

သင်္ခါရော သင်္ခတေ ပုညာ-ဘိသင်္ခါရာဒိကေ ပိစ ။

ပယောဂေ ကာလေ သင်္ခါရာ၊ ဒျဘိ သံခရဏေသု စ ။ တဲ့

၁။ သင်္ခါရဆိုတဲ့ပုဒ်က ရုပ်နာမ် သင်္ခတအနက်ကိုလည်း ဟောတယ်။

၂။ ပုညာဘိသင်္ခါရ၊ အပုညာဘိသင်္ခါရ၊ အာနဉ္ဇာဘိသင်္ခါရ ဆိုတဲ့ ကုသိုလ်ကံ၊ အကုသိုလ်ကံ ကိုလည်းဟောတယ်။

၃။ အားထုတ်ခြင်း လုံ့လအနက်ကိုလည်း ဟောတယ်။

၎။ ကာယသင်္ခါရ၊ ၀စီသင်္ခါရ၊ မနောသင်္ခါရ ဆိုတဲ့ ကိုယ် နှုတ် စိတ်တို့ဖြင့် ပြုလုပ်ခြင်း အနက်ကိုလည်း ဟောတယ်။

အဲဒီ သင်္ခါရအနက်တွေထဲက သင်္ခါရ ဒုက္ခ-ဆိုတာဟာ ရုပ်နာမ်ဆင်းရဲခြင်းကို ဆိုလိုတယ်။ ဆင်းရဲခြင်းဒုက္ခက ကင်းလွတ်လိုလျှင် ရုပ်နာမ်တရားရဲ့ ဆင်းရဲခြင်းဒုက္ခအစစ်ကို မြင်အောင် ရှာပါတဲ့။
ဒုက္ခ-လို့ ဒီနေရာမှာသုံးတာက ဆိုင်းထမ်းဥပမာနှင့် သုံးတာပါ။ ဆိုင်းထမ်းတဲ့သူဟာ အလယ်ကထမ်းတော့ ဘေးကနှစ်ခုဟာ အလိုအလျောက် ပါသွားတဲ့ ဥပမာလို ရုပ်နာမ်ရဲ့ လက္ခဏာဟာ အနိစ္စ၊ ဒုက္ခ၊ အနတ္တ လို့ သုံးမျိုးရှိရာမှာ ဒုက္ခကိုမြင်လျှင် ကျန်တဲ့ အနိစ္စ၊ အနတ္တတရားများကို မြင်လာတာပေါ့။ အနိစ္စ၊ ဒုက္ခ၊ အနတ္တကိုမြင်လျှင် ရုပ်နာမ်အပေါ် တပ်မက်တဲ့တဏှာ မရှိတော့ဘူး။ ဒုက္ခသစ္စာခေါ်ရတဲ့ ရုပ်နာမ်အသစ်လည်း မဖြစ်တော့ဘူး။ စစ်မှန်သောဆင်းရဲခြင်း ချုပ်ငြိမ်းသွားပြီ။

ဒါကြောင့် ဆင်းရဲဒုက္ခက ကင်းလွတ်ချင်လျှင် ဆင်းရဲဒုက္ခအစစ်ကို တွေ့အောင်ရှာလို့ ပြောခဲ့တာပေါ့။

( တည်တောဆရာတော် )

ကိလေသာမွှေနောက် မိုးအောက်ကလူတွေ-စာအုပ် နှာ ၁၇-မှ

No comments:

Post a Comment