Search This Blog

Thursday, January 25, 2018

.မေထုန်ငယ် (၇)ပါး

.မေထုန်ငယ် (၇)ပါး

. မေထုနဓမ္မဆိုတာက ယောက်ျားမိန်းမဆက်ဆံမှုလောက်ကိုသာ ဆိုလိုတာ မဟုတ်သေးဘူး။ တခြားခြား မေထုန်ငယ် (၇)ပါးဆိုတာကိုလည်း ထည့်သွင်းပြီး မြတ်စွာဘုရားက ရည်ညွှန်းထားပါတယ်။

တစ်ချိန်မှာ ဆိုကြပါစို့ ဇာနုသောဏိ ပုဏ္ဏားကြီးက မြတ်စွာဘုရားသည် ဗြဟ္မစာရီ = မြတ်သောအကျင့်ကို ကျင့်နေတဲ့သူတော်ကောင်းအဖြစ်နဲ့ ၀န်ခံပါသလားဆိုပြီး ဒီမေးခွန်းကို မေးတယ်။
မေးလိုက်တဲ့အချိန်အခါမှာ “ဒကာတော်ပုဏ္ဏား ငါဘုရားသည် မကျိုးမပေါက် မပြောက်မကျားတဲ့ ပြည့်စုံတဲ့ ထက်ဝန်းကျင် ဖြူစင်နေတဲ့ ဗြဟ္မစရိယ အကျင့်ကို ကျင့်နေတဲ့ပုဂ္ဂိုလ်သာဖြစ်ပါတယ်။

မကျိုးမပေါက် မပြောက်မကျားအောင် ပြည့်ပြည့်စုံစုံစင်စင်ကြယ်ကြယ်ဖြင့် ဗြဟ္မစရိယ အကျင့်ကို ကျင့်နေတဲ့ပုဂ္ဂိုလ် ဟာဘယ်ပုဂ္ဂိုလ်လဲလို့မေးခဲ့လျှင် ငါဘုရားကိုသာ ရည်ညွှန်းပြီး ပြောဆိုရမှာ ဖြစ်ပါတယ်” ဆိုပြီးတော့ အမိန့်ရှိတော်မူလိုက်တယ်။

နံပါတ် (၁) မေထုန်ငယ်က ဘာလဲလို့မေးတော့၊ ဥစ္ဆာဒန = နံ့သာရည်ဖြင့် လိမ်းပေးတယ်။ ပရိမဒ္ဒန = ဆီလေးနဲ့ လိမ်းပေးတယ် နှိပ်နှယ်ပေးတယ်။ နှပန = ရေချိုးပေးတယ်။ သမ္ဗာဟန =ပွတ်သပ်ပေးတယ်။ အဲဒါကိုသဘောကျတယ်။ ဒါလည်းမေထုန်ငယ်တစ်ခုပဲ။ ဘုရားရှင်ဟာ ဒါမျိုးဘယ်တော့မှ မပြုလုပ်ဘူး။ ဒါကတစ်ခု။

နံပါတ် (၂) ကျတော့ တစ်ယောက်နဲ့တစ်ယောက်ပြောလိုက်ဆိုလိုက် ရယ်လိုက်မောလိုက် နောက်လိုက်ေံပြာင်လိုက် နေတယ်။ ပြုံးပြုံး ပြုံးပြုံးနဲ့ ထိုင်ပြီးစကားပြောနေကြတယ်။ အဲဒါကိုသဘောကျတယ်။ ဒါလည်းမေထုန်ငယ်တစ်ခုပဲ။

နံပါတ် (၃) ကတော့ သူ့မျက်စိနဲ့ ကိုယ့်မျက်စိတည့်တည့်လေးကြည့်ပေးတယ်။ မကြည့်ရလျှင် မမြင်ရလျှင်မနေနိုင်ဘူး။ ဘာမှတော့မလုပ်ပါဘူး။ တစ်ယောက်နဲ့ တစ်ယောက် ကြည့်နေရလျှင် ကျေနပ်နေတယ်။ ဒါလည်းမေထုန်ငယ်တစ်ခုပဲ။

နံပါတ် (၄) က တစ်ယောက်နဲ့တစ်ယောက်တော့ မမြင်ဘူးပေါ့။ ဒါပေမယ့် အသံလေးကြားရလျှင် သဘောကျနေတယ်။ သူငိုတဲ့ အသံပဲဖြစ်ပါစေ။ သီချင်းဆိုတဲ့ အသံပဲ ဖြစ်စေ ကြားနေရလိုရှိလျှင် သဘောကျတယ်။ ယခုကါလ ရေဒီယိုတို့ ဘာတို့နားထောင်တဲ့အခါ ကြားတဲ့ပုံစံမျိုးပေါ့။ ဒါလည်းမေထုန်ငယ်တစ်ခုပဲ။

နံပါတ် (၅) က မြင်လည်းမမြင်ရဘူး၊ ကြားလည်းမကြားရဘူး၊ ဒါပေမဲလို့ တစ်ချိန်တုန်းက တစ်ယောက်နဲ့ တစ်ယောက်ပြောဖူးတယ်။ ဆိုဖူးတယ် ပြောင်ဖူးတယ် နောက်ဖူးတယ်။ အဲဒါကလေးတွေကို ပျော်ပါးခဲ့ဖူးတာလေးတွေကို အမှတ်ရပြီးတော့ ပြန်ပြီး ပြုံးပြုံး ပြုံးပြုံးနဲ့ သဘောကျနေတယ်။ ဒါလည်းမေထုန်ငယ်တစ်ခုပဲ။

နံပါတ် (၆) က အဲဒါမျိုးတွေ ဘာမှမဖြစ်ဘူး။ ဒါပေမဲ့လို့ ကိုယ့်မှာဘာမှတော့မရှိဘူး။ မရှိတဲ့အခါကျတော့ သူတစ်ပါးတွေ အိုးနဲ့အိမ်နဲ့ တိုက်နဲ့တာနဲ့ ကာမဂုဏ်တွေ ခံစားပြီး ပျော်ပျော်ပါးပါးနေတာကို သွားမြင်လိုက်တာကိုလည်း သဘောကျတယ်။ သူတို့လိုနေချင်တဲ့ စိတ်ထားလေးတွေ ပေါ်လာပြန်တယ်။ ဒါလည်းမေထုန်ငယ်တစ်ခုပဲ။

နံပါတ် (၇) က အဲဒီလိုပြောခဲ့တဲ့ သဘောတရားတွေလည်း မဖြစ်ပြန်ဘူး။ ဒါပေမယ့်ဘာဖြစ်နေသလဲ။ နတ်ပြည်နတ်လောက တစ်ခုခုကို ရည်မျှော်ပြီး တော့ သီလကျင့်စဉ် သမာဓိကျင့်စဉ် ပညာကျင့်စဉ်တွေကို ကျင့်ကြံကြိုးကုတ် ပွါးများအားထုတ်နေပြန်တယ်။ နတ်ပြည်နတ်လောကမှာ ရရှိမည့် ကာမဂုဏ်တွေကို လှမ်းမျှော်ပြီး သဘောကျနေတယ်။ အဲဒါလည်းမေထုန်ငယ်တစ်ခုပဲ။

ဒီမေထုန်ငယ် (၇)မျိုး တစ်မျိုးမျိုးနဲ့ မွေ့လျှော်နေတဲ့ ပုဂ္ဂိုလ်ဟာလည်း အိုနာသေရေး ဒုက္ခဘေးမှ ဘယ်နည်းနဲ့မှ မလွတ်မြောက်နိုင်ဘူးလို့ ဘုရားရှင်က ဆက်လက်ကာ ဟောကြားထားတော်မူပါတယ်။

*** ဖားအောက်ဆရာတော်ဘုရားကြီး ***

(အမြိုက်နိဗ္ဗာန်သို့ ပို့ဆောင်ပေးနေသည့် စွမ်းအားကြီး (၇) ရပ် - သတ္တသညာသုတ္တန်)

နီဝရဏတရား ( မိုးကုတ်ဆရာတော်ဘုရားကြီး)


နီဝရဏတရားဆိုတာ မဂ်ဖိုလ်ကို (မရအောင်) ပိတ်ပင်တားဆီး ဖုံးလွှမ်းတားတဲ့တရားလို့မှတ်၊ နီဝရဏတရားမှာ"လောဘ၊ ဒေါသ၊ ထိနမိဒ္ဓ၊ ဥဒ္ဓစ္စ၊ ကုက္ကုစ္စ၊ ဝိစိကိစ္ဆာ"လို့ ၅-ပါးရှိတယ်။ ဒီ နီဝရဏတရား ၅-ပါးကဝင်ရောက်နှောက်ယှက်လို့ရှိရင် ခန္ဓာထဲဉာဏ်စိုက် ရှုငြားသော်လည်းပဲ၊ ခန္ဓာထဲမှာရှိတဲ့ဖြစ်ပျက်=အနိစ္စသဘောကို မမြင်နိုင်ဘူး၊ မမြင်တော့ ခန္ဓာအရှိနဲ့ ဉာဏ်အသိ မလိုက်တော့ မဂ်ဖိုလ်မရနိုင်ဘူး၊ မဂ်ဖိုလ်မရတော့ သံသရာတလျှောက်လုံးမှာ တဒိုင်းဒိုင်းပြေးနေရတာပေါ့၊ ဒုက္ခစက်ရဟတ်ကြီး ချာချာလည်နေရတာ
ပေါ့၊ ဒါကြောင့် ဒီနီဝရဏတရား ၅-ပါးကို မိမိဉာဏ်အပေါ် မဖုံးလွှမ်းနိုင်အောင် ဖြစ်ပျက်ရှုပြီးဖယ်ရှားပစ်မှသာလျှင် ခန္ဓာထဲရှိ ဖြစ်ပျက်အနိစ္စတွေကို မြင်နိုင်ပြီး မဂ်ဖိုလ်နိဗ္ဗာန်ရ၍ မိမိ၏ခန္ဓာ ပဋိစ္စသမုပ္ပါဒ်ပြတ်လို့ ဒုက္ခခမ်သိမ်း ကင်းငြိမ်းသွားမယ်။

စိတ်ဝိညာဏ်ဟာ ၆-မျိုးရှိတယ်၊ ဆိုင်ရာဝတ္တုရုပ်အသီးသီးမှာ မှီပြီးဖြစ်တယ်၊ စက္ကုဝိဉာဏ်စိတ်က မျက်လုံးမှာပေါ်တယ် ၊ သောတဝိဉာဏ်စတ်၊ ဃာနဝိဉာဏ်စိတ်၊ ဇိဝှာဝိဉာဏ်စိတ်၊ ကာယဝိဉာဏ်စိတ် တို့ဟာလဲ့ နား၊ နှာခေါင်း၊ လျှာ၊ ကိုယ် အသီးသီးမှာပေါ်တယ်၊ မနောဝိညာဏ်စိတ်ကတော့ ဟဒယရုပ်ခေါ်တဲ့ နှလုံးသွေးထဲမှာပေါ်တယ် ၊ ဒီစိတ်ဟာ အာရုံနဲ့ ဒွါရတိုက်ဆိုင်တဲ့ အခါမှာဖျတ်ခနဲ့ဖျတ်ခနဲ့ ပေါ်လာရတယ်၊ ဟဒယဝတ္ထုနှလုံးသွေးဟာအသစ်အသစ်ဖြစ်ပြီး အမြဲပြောင်းလဲနေတယ်၊ နှလုံးသွေးကဖြူနေရင် ကြည်နေရင်ဒီမှာပေါ်တဲ့စိတ်ကလဲကြည်လင်နေပြီး ဉာဏ်ပညာကဘလဲ ထိုးထွင်သိတော့တာပဲ၊ အကယ်၍နှလုံးသွေးက
နောက်နေရင်ဒီအထဲမှာပေါ်တဲ့စိတ်ကလဲ နောက်တောက်တောက်ဖြစ်နေတော့၊ ဉာဏ်ကထိုးတွင်ပြီးမသိနိုင်တော့ဘူး၊ ဒီတော့ခုနကပြောခဲ့တဲ့ နီဝဏတရားတွေက ဝင်ရောက်နှောက်ယှက်လို့ရှိရင်၊ စိတ်ဟာမကြည်မလင်နောက်တောက်တောက်ဖြစ်ပြီး ဉာဏ်ကထိုးထွင်းမသိနိုင်တော့ဘူး၊ ဒီနီဝရဏအကြောင်းကို ပဉ္စကနိပါတ် အင်္ဂုတ္တိုရ်ပါဠိတော်မှာလာတဲ့ ဝတ္ထုနဲ့တကွရှင်းပြမယ်၊ ဘုရားရှင်ဟာ စမ္ပာနဂိုရ်ပြည်မှာ သီတင်းသုံးနေတယ်၊ သင်္ဂါရဝဆိုတဲ့ သတို့သားတစ်ယောက်ဟာ ဘုရားရှင်ဆီလာပြီး တပည့်တော်ပုဏ္ဏားထုံးစံအတိုင်းဗေဒင်ကျမ်းဂန်တွေညညရွတ်ဖတ်သရဇ္ဈာယ်တဲ့အခါ၊ တစ်ခါတစ်လေ တစ်လုံးမှသတိမရဘူးး အကုန်မေ့
ကုန်တယ်ဘုရား၊ တစ်ခါတစ်လေကျပြန်တော့ ရပြီးသားစာတွေမပြင် မရသေးတာတွေတောင် ဉာဏ်ထဲမှာထင်လာပါတယ်ဘုရား၊ အဲဒါဘာကြောင့်ပါလဲဘုရားလို့ မေးလျှောက်တယ်၊ ဒီတော့ ဘုရားက ငါရှင်းပြမယ်ကွာဆိုပြီး ဥပမာကလေးနဲ့ဒီလိုရှင်းပြလိုက်တယ်။

၁)ခွက်တစ်ခုထဲမှာကြည်နေတဲ့ရေကိုထည့်လိုက်၊ နောက်ဒီရေထဲကိုဆေးနီ ဆေးဝါ ဆေးပြာတွေရောထည့်လိုက်။ရေကိုငြိမ်အောင်ထားပြီး မင်းမျက်နှာဟပ်ကြည့်လိုက်စမ်း၊ မျက်နှာရိပ်ထင်ထင်ရှားရှား မြင်နိုင်ပါမလား၊ မမြင်နိုင်ဘူး၊ ဒီလိုပဲ နဂိုစိတ် (ဘဝင်စိတ်) ဟာကြည်နေတယ်၊ သူ့မှိရာနှလုံးသွေးဟာလဲ ကြည်နေတယ်၊ ဒီနှလုံးသွေးအကြည်ထဲမှာ လောဘစိတ်ကလေး ဝင်လာ ပေါ်လာလို့ရှိရင်၊ စိတ်ဟာနောက်ကျိသွားပြီး သိပြီးသားစာတွေတောင် မမှတ်မိမသိနိုင်တော့ဘူး၊ ဒီမှာလဲ ဝိပဿနာအားထုတ်ရာမှာလဲ ထိုအတူပဲ
သားသမီးအတွက်စီးပွားရေးအတွက် လောဘစိတ်ဝင်လာရင် ခန္ဓာထဲမှာ နဂိုကရှိနေတဲ့ အနိစ္စ၊ ဒုက္ခ၊ အနတ္တအသုဘ၊ ဒုက္ခသစ္စာရိပ်တွေကို ဉာဏ်နဲ့ဆင်ခြင်တဲ့ အခါမှာ မသိမမြင်နိုင်တော့ဘူး၊ ဒီတော့ရေထဲမှာရှိတဲ့ဆေးနီ၊ ဆေးဝါ၊ ဆေးပြာတွေ ဖယ်ပစ်ပြီး ရေငြိမ်အောင်ထားပြီး မျက်နှာဟပ်ကြည့်မှ မျက်နှာရိပ်ကို ထင်ထင်ရှားရှားမြင်နိုင်သလို၊ ဒီပေါ်လာတဲ့လောဘစိတ်ကို ဖြစ်ပျက်ရှုပြီး ဖယ်ရှားပစ်ရမယ်၊ အဲဒါဖယ်ရှားပစ်ပြီးမှ မိမိရှုနေတဲ့ မူလကမ္မဋ္ဌာန်းကို ပြန်ကောက်ပြီး ခန္ဓာဉာဏ်စိုက်ကြည့်လိုက်ရင် ခန္ဓာထဲမှာ နဂိုရှိနေတဲ့
အနိစ္စ၊ ဒုက္ခ၊ အနတ္တ၊ အသုဘ၊ ဒုက္ခသစ္စာအရိပ်တွေ တစ်ခုခုဟာ ထင်ထင်ရှားရှားမြင်နိုင်တယ်၊ ဒီတော့ ခင်ဗျားတို့ ခန္ဓာထဲ့ဉာဏ်စိုက်ပြီး ဖြစ်ပျက်ရှုလို့ မမြင်တာဟာ ဒီလောဘစိတ်ကဝင်ရှုပ်လို့မမြင်ရတာ၊ ဒီတော့လောဘစိတ်ဝင်လာရင်သူ့ကို အရင်ဖြစ်ပျက်ရှုပြီးဖယ်ရှားပစ်ပြီးမှ မူလကမ္မဋ္ဌာန်းကို ပြန်ကောက်ပြီးရှုပါ၊ ဒါမှဖြစ်ပျက် အနိစ္စတွေမြင်လာမယ်။

(၂) ဒုတိယအချက်ကတော့ ဒေါသပဲ၊ ဒေါသစိတ်ဖြစ်နေရင် နှလုံးသွေးဟာ ပွက်ပွက်ဆူနေတာပဲ၊ ပွက်ပွက်ဆူနေတဲ့ရေနွေးထဲကို မျက်နှာရိပ်ဟပ်ကြည့်ပါ၊ ရေက ပွက်ပွက်ဆူနေပြီးအခိုးတွေထနေတော့ မျက်နှာရိပ်မမြင်နိုင်ဘူး၊ ဒီလိုပဲဒေါသစိတ်ဝင်ရှုပ်နေတဲ့အခါ နဂိုရထားတဲ့စာတွေတောင်အကုန်မေ့သွားရတယ်၊ ဒီမှာလဲဝိပဿနာရှုတဲ့ နေရာမှာလဲ ဒေါသစိတ်ဖြစ်တဲ့အခါခန္ဓာကိုယ်ထဲကို ဉာဏ်နဲ့ကြည့်ပါ၊ ခန္ဓာမှာရှိတဲ့ အနိစ္စ၊ ဒုက္ခ၊ အနတ္တ၊ အသုဘ၊ ဒုက္ခသစ္စာကြီးကိုဘယ်တော့မှမမြင်နိုင်ဘူး၊ ဒေါသဆိုတဲ့ရေဆူပြီး အခိုးထနေတာကိုဒီတော့ရေအခိုးငြိမ်အောင်ရေအေးရေငြိမ်အောင်ထားပြီး မျက်နှာရိပ်ဟပ်ပြီးကြည့်တော့ မျက်နှာရိပ်မြင်ရသ
လိုဒီပေါ်လာတဲ့ဒေါသကို ဖြစ်ပျက်ရှုပြီး အရင်ဖယ်ပစ်ရမယ်၊ ဒီလိုဖယ်ရှားပစ်ပြီးမှ မူလကမ္မဋ္ဌာန်းကိုပြန်ကောက်၊ ဒီလိုရှုတော့မှ ခန္ဓာထဲမှာရှိတဲ့ ဖြစ်ပျက်အနိစ္စတွေကို မြင်လာလိမ့်မယ်။

(၃) တတိယ အချက်က ထိနမိဒ္ဓပဲ၊ ထိနမိဒ္ဓဆိုတာကိုယ်စိတ်ကိုကိုယ်မနိုင်တာငိုက်မျည်းသွားတာ ၊ရေကန် ထဲကရေပြင်မှာ မှော်တွေဖုံးအုပ်နေတဲ့အခါ ၊ မျက်နှာကိုဟပ်ကြည့်ရင်မျက်နှာရိပ်ကိုမမြင်နိုင်ဘူး၊ ဒီလိုပဲ
ဟဒယဝတ္ထုနှလုံးသွေးထဲမှာ ထိနမိဒ္ဓ၊ ငိုက်မျည်းတဲ့စိတ်ကဝင်ရောက်နှောက်ယှက်နေရင်ရပြီးသားစာတွေ
မေ့မှာပဲ၊ အခု ဝိပဿနာရှုတဲ့နေရာမှာလဲ ထိနမိဒ္ဓဆိုတဲ့ ငိုက်မျည်းတဲ့စိတ်က ဟဒယဝတ္ထုနှလုံးသွေးမှာဝင်
ရောက် ဖုံးလွှမ်းနေရင်ဉာဏ်ဝင်ခွင့်မရလို့ ခန္ဓာထဲရှိတဲ့ဖြစ်ပျက်အနိစ္စတွေ မမြင်နိုင်ဘူး၊ ဒီတော့ ဖုံးနေတဲ့မှော်
တွေဖယ်ရှားပစ်ပြီး မျက်နှာရိပ်ကိုဟပ်ကြည့်မှ ထင်ထင်ရှားရှားမြင်ရမယ်၊ ဒီမှာလဲ ဉာဏ်ပေါ်မှာဖုံးနေတဲ့
ထိနမိဒ္ဓကိုအရင် ဖြစ်ပျက်ရှုပြီး ဟဒယဝတ္ထု နှလုံးသွေးမှ ဖယ်ရှားပစ်ပြီးမှရှုနေတဲ့မူလကမ္မဋ္ဌာန်းကို ပြန်
ကောက်ပါ၊ ဒီတော့မိမိရှုနေတဲ့ ဖြစ်ပျက် အနိစ္စတွေထင်မြင်လာမယ်။

(၄) စတုတ္ထအချက်က ဥဒ္ဓစ္စ ကုက္ကုစ္စဖြစ်တယ်၊ ဥဒ္ဓစ္စ ကုက္ကုစ္စဆိုတာ စိတ်ပျံ့လွင့်တာ စိတ်မငြိမ်တာ၊ ထားရာ
မှာမနေတာဘဲ။ ရေကန်ထဲကရေဟာလေတိုက်ခတ်လို့လှုပ်နေတဲ့အခါ မျက်နှာရိပ်ကိုဟပ်ကြည့်ပါ၊ မျက်နှာ
ရိပ်ကိုမမြင်ရဘူး၊ ဒီမှာလဲ ဝိပဿနာရှုရာမှာလဲ စိတ်ပျံ့လွင့်လှုပ်ရှားနေတဲ့အခါ ဝိပဿနာရှုရင် ခန္ဓာထဲရှိတဲ့
အနိစ္စတွေကိုမမြင်နိုင်းဘူး၊ ရေကိုငြိမ်အောင်လုပ်ပြီး မျက်နှာရိပ်ဟပ်ကြည့်မှမြင်ရတယ်၊ ဒီမှာလဲ ပျံ့လွင့်နေ
တဲ့စိတ်ကို ဖြစ်ပျက်ရှုပြီးဖယ်ရှားပစ်ပါ၊ ပြီးမှမူလကမ္မဋ္ဌာန်းကိုပြန်ကောက်ပြီး ရှုရင်ခန္ဓာထဲရှိတဲ့ဖြစ်ပျက်အနိစ္စ
တွေကိုမြင်နိုင်တယ်၊ ထို့အပြင် ကုက္ကုစ္စဟာအရေးကြီးလို့ အထူးရှင်းပြပါဦးမယ်၊ ခင်ဗျားတို့ငယ်စဉ်တုန်းက
မသိမလိမ္မာလို့ မိုက်ခဲ့တာတွေကိုတွေးပြီး ပူမနေနဲ့၊ ကြောက်လန့်မနေနဲ့၊ ငယ်တုန်းကမိုက်ခဲ့တာတွေကို
နှလုံးသွင်းနေရင် ဒါမဂ်တားဖိုလ်တားဖြစ်တယ်၊ ငယ်ငယ်တုန်းကစပြီး တောက်လျှောက်လိမ္မာတဲ့ အမျိုးလို့
မရှိပါဘူး၊ အနည်းနဲ့အများ မိုက်မှားခဲ့တဲ့လူတွေများပါတယ်၊ဒါတွေတွေးမနေနဲ့၊ တွေးနေရင် ကုက္ကုစ္စဖြစ်ပြီး
ဝိပဿနာမှာ အနှောင့်အယှက်ဖြစ်တယ်၊ ဒီတော့ကုက္ကုစ္စစိတ်တွေလာရင်ဖြစ်ပျက်ရှုပြီး၊ ဖယ်ရှားပစ်ပါ၊
ဘုရားရှင်လက်ထက်ကလူဆိုးကြီးတွေ မဂ်ဖိုလ်ရသွားကြတာရှိခဲ့သားပဲ၊ ပြီးတော့သေခါနီးမှာ ကုက္ကုစ္စစိတ်
တွေဖြစ်ရင် တိရစ္ဆာန်ဖြစ်တတ်တယ်၊ ပြိတ္တာဖြစ်တယ်၊ ဒါကြောင့် ခင်ဗျားတို့ကို သေနည်းသင်ပေးနေရတာ၊
သေခါနီးရင် ကိုယ်ခန္ဓာကိုဖြစ်ပျက်ရှုပေးပါ သားသမီး ပစ္စည်းဥစ္စာတွေအတွက်စိတ်မချတာစွဲလမ်းတာတွေ
လာရင် ပြိတ္တာနဲ့ တိရစ္ဆာန်ဖြစ်တတ်တယ်၊ ဒါကြောင့် ဝိပဿနာလုပ်တဲ့အခါ ရှေးက ဒုစရိုက်မှုတွေကို မတွေး
တော့ဘဲ ဖြစ်ပျက်ရှုဖယ်ရှားပစ်ပြီး မိမိရှုနေတဲ့ မူလကမ္မဋ္ဌာန်းကိုသာ စိုက်စိုက်မတ်မတ် ရှုသွားရမယ်။

(၅) ပဉ္စမအချက် ဝိစိကိစ္ဆာဖြစ်တယ်၊ ဝိစိကိစ္ဆာဆိုတာသံသယရှိတာ၊ ဘုရား တရား သံဃာအပေါ် သံသယ
ရှိမှု၊ မိမိကျင့်နေတဲ့ ဝိပဿနာအကျင့်ပေါ်မှာ သံသယရှိမှုတွေဟာ မဂ်တားဖိုလ်တားပဲ၊ မိမိဉာဏ်မမီတာတွေ
ကို စဉ်းစားပြီး သံသယဖြစ်နေရင် ဒါအန္တရာယ်တစ်ခုပဲ သဒ္ဓါကိုရှေ့သွားပြုပြီးတဖြည်းဖြည်း ဉာဏ်နဲ့ဆင်ခြင်
သွားမှသာ အမှန်ရောက်နိုင်တာ၊ ဒီတော့ တွေးတောယုံမှား သံသယစိတ်တွေဝင်လာရင် ဒါကိုဖြစ်ပျက်ရှုပြီး
ဖယ်ရှားပစ်ရမယ်၊ ဖယ်ရှားပစ်ပြီးမှ မိမိရှုနေတဲ့ မှုလကမ္မဋ္ဌာန်းကိုပြန်ကောက်၊ ရေကန်ထဲကရေတွေအနယ်
ထနေရင် မျက်နှာရိပ်မထင်နိုင်ဘူး၊ အနယ်တွေဖယ်ရှားပစ်မှ မျက်နှာရိပ်ထင်နိုင်တယ်၊ ဝိပဿနာရှုရာမှာလဲ
ဝိစိကိစ္ဆာတွေဝင်ရှုပ်လာရင် ခန္ဓာအရှိကို ဉာဏ်မျက်စိကမမြင်နိုင်ဘူး၊ ဒီတော့ ဒီဝိစိကိစ္ဆာကို ဖယ်ရှားပစ်မှ
သာ ခန္ဓာအရှိနဲ့ ဉာဏ်အသိကိုက်မယ်၊ ခန္ဓာထဲမှာရှိတဲ့ အနိစ္စ၊ ဒုက္ခ၊ အနတ္တတွေကိုတွေ့မြင်နိုင်မယ်။ ။

မိုးကုတ်ဆရာတော်ဘုရားကြီး

Thursday, May 7, 2015

အခန်း(၉) ကမ္မဋ္ဌာန်းပိုင်း -၂

ဝိပဿနာကမ္မဋ္ဌာန်း

ဤအခန်းဝယ် သိမှတ်ဖွယ်ရာ အကြောင်းအရာများမှာ ၀ိသုဒ္ဓိ ၇-ပါး၊ လက္ခဏာ ၃-ပါး၊ အနုပဿနာ ၃-ပါး၊ ၀ိပဿနာဉာဏ် ၁၀-ပါး၊ ၀ိမောက္ခ ၃-ပါး၊ ၀ိမောက္ခမုခ ၃-ပါးတို့တည်း။

က။ ၀ိသုဒ္ဓိ ၇-ပါး။ ။အထူးစင်ကြယ်သောတရား ၇-ပါး။

၁။ သီလ၀ိသုဒ္ဓိ = သီလ၏စင်ကြယ်ခြင်း။
၂။ စိတ္တ၀ိသုဒ္ဓိ = နီဝရဏအညစ်အကြေးတို့မှ စိတ်၏စင်ကြယ်ခြင်း။
၃။ ဒိဋ္ဌိဝိသုဒ္ဓိ = နာမ်ရုပ်တို့ကို လက္ခဏ၊ ရသ၊ ပစ္စုပဋ္ဌာန်၊ ပဒဋ္ဌာန်အားဖြင့် ဆင်ခြင်သဖြင့် အတ္တဟု စွဲလမ်းသော မိစ္ဆာအယူမှ စင်ကြယ်ခြင်း။
၎။ ကင်္ခါဝိတရဏ၀ိသုဒ္ဓိ = နာမ်ရုပ်တို့နှင့် ပတ်သက်သည့် ၁၆-ပါးသော ယုံမှားသံသယကို လွန်မြောက်ကြောင်း ဖြစ်သည့်ဉာဏ်။
၅။ မဂ္ဂါမဂ္ဂဉာဏဒဿန၀ိသုဒ္ဓိ = လမ်းမှန်နှင့် လမ်းမှားတို့ကို ပိုင်းခြား၍ ထင်ရှားစွာ သိမြင်တတ်သောဉာဏ်။
၆။ ပဋိပဒါဉာဏ်ဒဿန၀ိသုဒ္ဓိ = မဂ်ဖိုလ်သို့ ရောက်ကြောင်းဖြစ်သော ဉာဏ်အမြင်၏ စင်ကြယ်ခြင်း။
၇။ ဉာဏဒဿန၀ိသုဒ္ဓိ = နိဗ္ဗာန်ကို သိမြင်တတ်သော မဂ်ဉာဏ် ၄-ပါး။

ခ။ လက္ခဏာ ၃-ပါး။ ။သင်္ခါရတရားတို့၏ အမှတ်အသား ၃-ပါး။
၁။ အနိစ္စလက္ခဏာ = ရုပ်နာမ်တရားတို့၏ မတည်မြဲခြင်း၊ ပျက်စီးတတ်ခြင်း အမှတ်အသား။
၂။ ဒုက္ခလက္ခဏာ = ရုပ်နာမ်တရားတို့၏ အဆက်မပြတ် ဖြစ်ပျက် ပြောင်းလဲခြင်း ပျက်စီးကုန်ဆုံးခြင်းတို့ဖြင့် နှိပ်စက်ညှဉ်းပန်းအပ်သော ဆင်းရဲပင်ပန်းခြင်း အမှတ်အသား။
၃။ အနတ္တလက္ခဏာ = ရုပ်နာမ်တရားတို့သည် ဖြစ်မြဲဓမ္မတာအတိုင်း ဖြစ်ပျက်သွားခြင်း၊ ပုဂ္ဂိုလ်တစ်ဦးစီ၏ အလိုသို့ မလိုက်ပါခြင်း၊ အနှစ်သာရမရှိခြင်း၊ ငါဟုမှတ်အပ်သည့် အတ္တမရှိခြင်းတည်းဟူသော အခြင်းအရာ အမှတ်အသား။

ဂ။ အနုပဿနာ ၃-ပါး။ ။သင်္ခါရတရားတို့ကို အနိစ္စ၊ ဒုက္ခ၊ အနတ္တဟု အဖန်ဖန် ရူတတ်သော ဉာဏ် ၃-ပါး။
၁။ အနိစ္စာနုပဿနာ = ရုပ်နာမ်တို့ကို အနိစ္စတည်းဟု အဖန်ဖန်ရူမှတ်တတ်သောဉာဏ်။
၂။ ဒုက္ခာနုပဿနာ = ရုပ်နာမ်တို့ကို ဒုက္ခတည်းဟု အဖန်ဖန်ရူတတ်သောဉာဏ်။
၃။ အနတ္တာနုပဿနာ = ရုပ်နာမ်တို့ကို အနတ္တတည်းဟု အဖန်ဖန်ရူတတ်သော ဉာဏ်။

ဃ။ ၀ိပဿနာဉာဏ် ၁၀-ပါး။ ။အနုပဿနာဉာဏ်တို့ကို ၀ိပဿနာဉာဏ်အဖြစ်ဖြင့် ဆင်ခြင် သုံးသပ်တတ်သောဉာဏ်။
၁။ သမ္မသနဉာဏ် = ရုပ်နာမ်တရားတို့ကို အနိစ္စ၊ ဒုက္ခ၊ အနတ္တ လက္ခဏာတို့ဖြင့် ဆင်ခြင် သုံးသပ်တတ်သောဉာဏ်။
၂။ ဥဒယဗ္ဗယဉာဏ် = ရုပ်နာမ်တို့၏ ဖြစ်ပျက်ခြင်းကို ရူသိသောဉာဏ်။
၃။ ဘင်္ဂဉာဏ် = ရုပ်နာမ်တို့၏ ပျက်ခြင်းသဘောကို ရူသိသောဉာဏ်။
၎။ ဘယဉာဏ် = ရုပ်နာမ်သင်္ခါရတို့သည် ကြောက်လန့်ဖွယ်ရာ ဘေးဆိုးကြီးပါတကားဟု မြင်သိသောဉာဏ်။
၅။ အာဒီန၀ဉာဏ် = ရုပ်နာမ်တရားတို့၏အပြစ်ကို မြင်သိသောဉာဏ်။
၆။ နိဗ္ဗိဒါဉာဏ် = ရုပ်နာမ်သင်္ခါရတို့ကို ငြီးငွေ့ဖွယ်အဖြစ် ရူမြင်သည့်ဉာဏ်။
၇။ မုစ္စိတုကမျတာဉာဏ် = ခန္ဓာငါးပါးရုပ်နာမ်တရားတို့၏ အနှောင်အဖွဲ့မှ လွတ်မြောက်ရန် အလိုရှိသောဉာဏ်။
၈။ ပဋနိသင်္ခါဉာဏ် = ရုပ်နာမ်အနှောင်အဖွဲ့မှ လွတ်မြောက်ခြင်းအကြောင်း၏ ပြည့်စုံခြင်းအကျိုးငှာ ခန္ဓာငါးပါး ရုပ်နာမ်တရားတို့ကို တစ်ဖန် သိမ်းဆည်းသောဉာဏ်။
၉။ သင်္ခါရုပေက္ခာဉာဏ် = ခန္ဓာငါးပါး သင်္ခါရတရားတို့၌ ကြောက်လန့်ခြင်း နှစ်သက်ခြင်း မဖြစ်ဘဲ လျစ်လျူရူတတ်သောဉာဏ်။
၁၀။ အနုလောမဉာဏ် = အောက်ဝိပဿနာဉာဏ်တို့အား လည်းကောင်း၊ အထက်ဖြစ်သော ဗောဓိပက္ခိယတရား ၃၇-ပါးတို့အား လည်းကောင်း လျော်စွာ ဖြစ်သော ဉာဏ်(၀ါ)မဂ်ဖြစ်ခြင်းငှာလျော်သော ဉာဏ်။

င။ ၀ိမောက္ခ ၃-ပါး။ ။ကိလေသာတို့မှ လွတ်သော မဂ်ဖိုလ်တရားကို ၀ိမောက္ခဟု ခေါ်၏။
၁။ သုညတ၀ိမောက္ခ = ခန္ဓာ ငါးပါး ရုပ်နာမ်တရားတို့၌ `အတ္တ´မရှိဟု အနတ္တာနုပဿနာဉာဏ်ဖြင့် မြင်သိ၍ ကိလေသာမှ လွတ်မြောက်သော မဂ်ဖိုလ်။
၂။ အနိမိတ္တ၀ိမောက္ခ = ခန္ဓာငါးပါး ရုပ်နာမ်တရားတို့၌ `နိမိတ္တ´ခေါ် ပုံသဏ္ဌာန် မရှိကြောင်းကို အနိစ္စာနုပဿနာဉာဏ်ဖြင့် မြင်သိ၍ ကိလေသာမှ လွတ်မြောက်သော မဂ်ဖိုလ်။
၃။ အပ္ပဏိဟိတ၀ိမောက္ခ = ခန္ဓာငါးပါးရုပ်နာမ်တရားတို့၌ `တဏှာပဏိဓိ´ခေါ် တောင့်တတတ်သော တဏှာဖြင့် တောင့်တအပ်သည့် `သုခ´မရှိကြောင်းကို ဒုက္ခာနုပဿနာဉာဏ်ဖြင့် မြင်သိ၍ ကိလေသာမှ လွတ်မြောက်သော မဂ်ဖိုလ်။

စ။ ၀ိမောက္ခမုခ ၃-ပါး။ ။မဂ်ဖိုလ်တည်းဟူသော ၀ိမောက္ခသို့ ၀င်ရောက်ဖို့ရာ တံခါးပေါက်နှင့် တူသည့် ၀ိပဿနာတရားကို ၀ိမောက္ခမုခဟု ခေါ်၏။

၁။ အနတ္တာနုပဿနာ = သုညတာနုပဿနာ မည်သော ၀ိမောက္ခမုခ။
ခန္ဓာကိုယ် ရုပ်နာမ်သင်္ခါရ၌ အတ္တမရှိဘဲ သုညချည်းဖြစ်သည်ကို ရူမြင်တတ်သော အနတ္တာနုပဿနာသည် သုညတာနုပဿနာမည်သော ၀ိမောက္ခမုခ ဖြစ်၏။
၂။ အနိစ္စနုပဿနာ = အနိမိတ္တာနုပဿနာ မည်သော ၀ိမောက္ခမုခ။
ခန္ဓာကိုယ်ရုပ်နာမ် သင်္ခါရ၌ ပုံသဏ္ဌာန်နိမိတ် မရှိကြောင်းကို ရူမြင်တတ်သော အနိစ္စာနုပဿနာသည် အနိမိတ္တာနုပဿနာမည်သော ၀ိမောက္ခမုခ ဖြစ်၏။
၃။ ဒုက္ခာနုပဿနာ = အပ္ပဏိဟိတာနုပဿနာ မည်သော ၀ိမောက္ခမုခ။
ခန္ဓာကိုယ် ရုပ်နာမ်သင်္ခါရ၌ ချမ်းသာ `သုခ´မရှိကြောင်းကို ရူမြင်တတ်သော ဒုက္ခာနုပဿနာသည် အပ္ပဏိဟိတာနုပဿနာ မည်သော ၀ိမောက္ခမုခ ဖြစ်၏။

ဝိသုဒ္ဓိနှင့် ဉာဏ်အဆင့်ဆင့်ဖြစ်ပေါ်ပုံ
ပဇ္ဈိပဋိပဒါလမ်းစဉ်ဟု အမည်ရသော အင်္ဂါရှစ်ပါးရှိသည့် မဂ်လမ်းကြောင်း(၀ါ) သတိပဋ္ဌာန်း ၄-ပါးနှင့်အညီ ပွားများအားထုတ်သည့် ၀ိပဿနာလမ်းကြောင်းသည် ၀ိသုဒ္ဓိ ၇-ပါး၊ ၀ိပဿနာဉာဏ်စဉ် ၁၀-ပါးနှင့် မဂ်ဉာဏ်ဖိုလ်ဉာဏ်တို့ကို ဖြစ်ပေါ်စေနိုင်သည့် တစ်ကြောင်းတည်းသော လမ်းကြောင်းဖြစ်၏။

ဤလမ်းစဉ်တွင် သီလသိက္ခာ၊ သမာဓိသိက္ခာနှင့် ပညာသိက္ခာတို့ ပါဝင်ကြပြီးလျှင် ဤလမ်းစဉ်အတိုင်း ကျင့်ကြံပွားများမူ၌ ဉာဏ်စဉ်အဆင့်ဆင့် ၀ိသုဒ္ဓိအဆင့်ဆင့် ဖြစ်ပေါ်ပုံကို တင်ပြပါအံ့။
၁။ သီလ၀ိသုဒ္ဓိ။ ။သီလ၏ စင်ကြယ်ခြင်း။
လူပုဂ္ဂိုလ်တို့၌ ငါးပါးသီလမကျိုးမပေါက် မပြောက်မကျားအောင် လုံခြုံစွာ ထိန်းထားနိုင်လျှင် သီလ၀ိသုဒ္ဓိ ဖြစ်၏။ ရှစ်ပါးသီလ၊ ကိုးပါးသီလ၊ ဆယ်ပါးသီလ တစ်မျိုးမျိုးကို လုံးခြုံစွာ စောင့်ထိန်းနိုင်လျှင် ပိုကောင်း၏။

ရဟန်းသံဃာများ၌ စတုပါရိသုဒ္ဓိသီလဟုခေါ်သော အောက်ပါ သီလ ၄-မျိုးစလုံး ထက်ဝန်းကျင် စင်ကြယ်မှသာလျှင် သီလ၀ိသုဒ္ဓ ဖြစ်၏။

က။ ပါတိမောက္ခသံဝရသီလ = `ဒွေမာတိကာ´ဟုခေါ်သော ပါတိမောက်နှင့် ၀ိနည်းပါဠိတော်လာ သိက္ခာပုဒ်များကို ကောင်းစွာစောင့်ထိန်းခြင်း။
ခ။ ဣန္ဒြိယသံဝရသီလ = စက္ခုနြေ္ဒ၊ သောတိနြေ္ဒ စသည့် ဣနြေ္ဒ ၆-ပါး၌ အကုသိုလ် မဖြစ်အောင် စောင့်စည်းခြင်း၊ ရူပါရုံ၊ သဒ္ဒါရုံ စသည့် အာရုံ ၆-ပါးနှင့် ဒွါရ ၆-ပါးတို့ အသီးသီး တွေ့ဆုံကြသည့်အခါ လောဘ၊ ဒေါသစသော ကိလေသာမဖြစ်ပေါ်အောင် စောင့်စည်းခြင်း ဖြစ်၏။
ဂ။ အာဇီဝပါရိသုဒ္ဓိသီလ = အသက်မွေးမူ သန့်ရှင်းစင်ကြယ်အောင် စောင့်စည်းခြင်း၊ ဒကာများထံမှ ချော့မော့ဖြားယောင်း သွေးဆောင် ဟန်ဆောင်မူစသည့် မိမိပယောဂမပါဘဲ စင်ကြယ်စွာရအပ်သည့် ပစ္စည်းလေးပါးကို ခံယူသုံးစွဲခြင်းဖြစ်၏။
ဃ။ ပစ္စယသန္နိဿိတသီလ = ဆွမ်း၊ သင်္ကန်း၊ ကျောင်း၊ ဆေးတည်းဟူသော ပစ္စည်း ၄-ပါးတို့ကို သုံးစွဲရသဖြင့် ရရှိသည့် အကျိုးကျေးဇူးများကို ဆင်ခြင်သုံးစွဲလျှင် ဤသီလလုံခြုံ၏။

၂။ စိတ္တ၀ိသုဒ္ဓ။ ။စိတ်၏စင်ကြယ်ခြင်း။
သမထဘာဝနာကို ပွားများသဖြင့် `ဥပစာရသမာဓိ´သို့ ရောက်လျှင် နီဝရဏ အညစ်အကြေးများကို ဖယ်ရှားထားနိုင်လေပြီ။ သို့အတွက် ဥပစာရသမာဓိကို ရလျှင်ပင် စိတ္တ၀ိသုဒ္ဓိဖြစ်၏။

အပ္ပနာသမာဓိကို ရလျှင်မူ ဆိုဖွယ်ရာ မရှိပြီ။ ၀ိပဿနာဘာဝနာပွားများမူ၌ ရရှိသော ခဏိကသမာဓိသည် ဥပစာရသမာဓိနှင့် ဆင်တူ၏။

သမာဓိတရားသည် ငြိမ်မ၀ပ်နေရာမှ နိုးကြားထကြွလာသော ပရိယုဋ္ဌာနကိလေသာတို့ကို နှိပ်ကွပ်ထားနိုင်၏။

၃။ ဒိဋ္ဌိဝိသုဒ္ဓိ။ ။အသိအမြင် ကြည်လင်သန့်ရှင်းခြင်း။
စိတ်စေတသိက်ဟူသော နာမ်တရား၊ နိပ္ဖန္နရုပ် ၁၈-ပါးတည်းဟူသော ရုပ်တရား၊ ဤနာမ်ရုပ်တို့အပေါ်၌ လက္ခဏ၊ ရသ၊ ပစ္စုပဋ္ဌာန်၊ ပဒဋ္ဌာန်တင်၍ အထပ်တပ်ဆင်ခြင်သောအခါ သိမူသည် စိတ်၊ ခံစားမူသည် ဝေဒနာ၊ မှတ်သားမူသည် သညာ၊ ပြုလုပ်အားထုတ်မူသည် သင်္ခါရ၊ ဖောက်ပြန်တတ်သော ခန္ဓာကိုယ်သည် ရုပ်တည်း။ ဤရုပ်၊ ဝေဒနာ၊ သညာ၊ သင်္ခါရ၊ ၀ိညာဏ်တို့မှတစ်ပါး အတ္တဟူသည့် အသက်ကောင် (၀ါ) လိပ်ပြာကောင် ဟူ၍ မရှိပြီဟု သိမြင်လာ၏။

ဤသို့ သိမြင်ခြင်းသည် အတ္တစွဲလမ်းမူဟူသော အညစ်အကြေးမှ ကင်းဝေးစင်ကြယ်သည့် ဉာဏ်ဖြစ်သဖြင့် ဒိဋ္ဌိဝိသုဒ္ဓိဟု မှတ်ယူရ၏။

တစ်ဖန် အာရုံကို သိမူသည် သိညာဏက္ခန္ဓာ ဖြစ်၏။ ကိုယ်နူတ်စိတ်တို့ဖြင့် ပြုလုပ်မူ၊ ပြောဆိုမူ၊ ကြံစည်မူတို့သည် သင်္ခါရက္ခန္ဓာဖြစ်၏။ ထိုအာရုံကို မှတ်သားမူကား သညာက္ခန္ဓာဖြစ်၏။ ကောင်းကောင်းဆိုးဆိုး ဝေဒနာအမျိုးမျိုးကို ခံစာားမူကား ဝေဒနာက္ခန္ဓာ ဖြစ်၏။ ဤကိုယ်ခန္ဓာသည် ဖောက်ပြန်ပျက်စီးတတ်သည့် သဘောရှိသော ရုပ်တည်း။ ၀င်ရိုး၊ လှမ်းဘီး၊ လှည်းအိမ်စသည်တို့ကို ပေါင်းစုထားသော အဆောက်အအုံကို ယာဉ်ရထားဟု ခေါ်ဆိုရသကဲ့သို့ ထို့အတူ ခန္ဓာငါးပါးတို့၏ အပေါင်းအစုကို သတ္တ၀ါဟု ခေါ်ဆိုရ၏။ စင်စစ်သော်ကား `ငါ၊ သူတစ်ပါး၊ ယောက်ျား၊ မိန်းမ´စသည်တို့ မရှိကြကုန်။ ရုပ်နာမ် ၂-ပါးသာ ရှိကြကုန်၏။

ဤသို့ နာမ်ရုပ် ၂-ပါးကို ကွဲကွဲပြားပြား ပိုင်းခြားသိတတ်သော ဉာဏ်သည် `နာမရူပ ပရိစ္ဆေဒဉာဏ်´ဖြစ်၏။ ဤဉာဏ်သည် အတ္တဒိဋ္ဌိအညစ်အကြေးမှ ကင်းစင်သဖြင့် `ဒိဋ္ဌိဝိသုဒ္ဓိ´ဟု မှတ်ယူရ၏။
၎။ ကင်္ခါဝိတရဏ ၀ိသုဒ္ဓိ။ ။ယုံမှား သံသယမှ လွန်မြောက်ကြောင်းဖြစ်သောဉာဏ်။
ရုပ်တရားတို့သည် ကံ၊ စိတ်၊ ဥတု၊ အာဟာရ ဟူသော အကြောင်းတရား ၄-ပါးကြောင့် ဖြစ်ပေါ်ကြ၏။ နာမ်တရာတိးု့သည် ယောနိသောမနသိကာရစသည့် အကြောင်းများကြောင့် ဖြစ်ပေါ်လာ၏။

အရာရာဝယ် သင့်တင့်အောင် နှလုံးသွင်းတတ်သည့် ယောနိသောမနသိကာရကြောင့် ကုသိုလ်ကံ ဖြစ်၏။ မသင့်မတင့်နှလုံးသွင်းလေ့ရှိသည့် အယောနိသောမနသိကာရကြောင့် အကုသိုလ်ကံ ဖြစ်၏။ ကုသိုလ်ကံ၊ အကုသိုလ်ကံတို့ကြောင့် ၀ိပါက်စိတ်များ ဖြစ်ပေါ်ကြ၏။ ၀ိပါက်စိတ်များ၌ တစ်ဖန် စက္ခုဝိဉာဏ်ဖြစ်ဖို့ရာ စက္ခုပသာဒ၊ ရူပါရုံ၊ အာလောကခေါ် အလင်းနှင့် မနသိကာရဟူသည့် နှလုံးသွင်းမူတို့ စုဆုံကြရ၏။ ဤအကြောင်း ၄-ပါးမပြည့်စုံလျှင် ထာဝရဘုရားပေါင်း ထောင်သောင်းမက ၀ိုင်း၍ ဖန်ဆင်းကြသော်လည်း စက္ခုဝိဉာဏ် မဖြစ်ပေါ်နိုင်ချေ။

ထို့ကြောင့် ရုပ်နာမ်တရားတို့သည် အဟေတုကဒိဋ္ဌိအဆိုအရ အကြောင်းမရှိဘဲ ဖြစ်ပေါ်လာကြသည် မဟုတ်။ ၀ိသမဟေတုကဒိဋ္ဌိ၌ ယူဆသကဲ့သို့ ဖန်ဆင်းရှင်ဖန်တီး၍ ဖြစ်ပေါ်လာကြသည်လည်း မဟုတ်။ ပဋိစ္စသမုပ္ပါဒ်တရားတော်နှင့် ပဋ္ဌာန်းဒေသနာတော်တို့၌ ဖော်ပြထားသည့်အတိုင်း အကြောင်းတရားများစွာတို့ ပေါင်းဆုံမိရာမှ ဖြစ်ပေါ်လာကြခြင်း ဖြစ်၏။

ဤသို့ ရုပ်နာမ်တရားတို့၏ အကြောင်းမှန်များကို ဆင်ခြင်သိမြင်သော ဉာဏ်သည် ယထာဘူတဉာဏ် (၀ါ) ပစ္စယပရိဂ္ဂဟဉာဏ် ဖြစ်၏။ ဤဉာဏ်သည်ပင် ယုံမှားခြင်းကင်္ခါ ၁၆-ပါးတို့မှ ကင်းစင်သော `ကင်္ခါဝိတရဏ၀ိသုဒ္ဓိ´ဖြစ်ပေတော့၏။

စူဠသောတာပန်။ ။ဒိဋ္ဌိနှင့် ၀ိစိကိစ္ဆာတို့ကို မိမိသန္တာန်၌ အကြွင်းအကျန် မရှိအောင် ပယ်ထားနိုင်သောသူသည် သောတာပန်အစစ် ဖြစ်၏။ ကင်္ခါဝိတရဏ၀ိသုဒ္ဓိသို့ ရောက်ပြီးသော ယောဂီသည် ဒိဋ္ဌိနှင့် ၀ိစိကိစ္ဆာတို့ကို အကြွင်းမဲ့မပယ်သတ်နိုင် သေးစေကာမူ အတော်ကြာအောင် ပယ်ခွာ ထားနိုင်၏။ ထို့ကြောင့် ထိုယောဂီသည် သောတာပန်နှင့် အလားတူသည့် စူဠသောတာပန်ဖြစ်၏။

စူဠသောတာပန်သည် သီလ၀ိသုဒ္ဓိ၊ စိတ္တ၀ိသုဒ္ဓိတို့နှင့် ပြည့်စုံပြီးဖြစ်၍ ကမ္မပထမြောက်သည့် ဒုစရိုက်မူများကို ပြုကျင့်တော့မည် မဟုတ်ချေ။ ထို့ကြောင့် အရိယာစခန်းသို့ မတက်လှမ်းမီ ကွယ်လွန်သွားလျှင်လည်း သုဂတိဘ၀သို့ ဧကန်မုချရောက်ပေလိမ့်မည်။

၅။ မဂ္ဂါမဂ္ဂဉာဏ်ဒဿန၀ိသုဒ္ဓိ။ ။လမ်းမှန်နှင့် လမ်းမှားကို ခွဲခြား၍ သိမြင်နိုင်သော ဉာဏ်၏စင်ကြယ်ခြင်း။
ဤ၀ိသုဒ္ဓိစခန်း၌ သမ္မသနဉာဏ်နှင့် ဥဒယဗ္ဗဉာဏ်ရှေ့ပိုင်းတို့ ပါဝင်ကြ၏။ သမ္မသနဉာဏ်သည် ရုပ်နာမ်တရားတို့ကို အနိစ္စ၊ ဒုက္ခ၊ အနတ္တဟု သုံးသပ်တတ်သော ဉာဏ်ဖြစ်၏။

ရုပ်နာမ်တရားတို့ကို လက္ခဏာယာဉ်သုံးပါးသို့ တင်၍ သုံးသပ်တတ်သော သမ္မသနနည်း ၄-မျိုး ရှိ၏။ တစ်မျိုးထက် တစ်မျိုးပို၍ အနုစိတ်သွား၏။

၁။ ကာလာပသမ္မသနည်း = ရူပက္ခန္ဓာအားလုံး၊ ဝေဒနာက္ခန္ဓာအားလုံး စသည်ဖြင့် ခန္ဓာတစ်ပါးစီကို အလုံးစုံသိမ်းကျုံးယူပြီး `ရုပ်ခန္ဓာသည် ကုန်ခန်းခြင်းသဘော ရှိသဖြင့် အနိစ္စဖြစ်၏၊ ကြောက်မက်ဖွယ်ဖြစ်သောကြောင့် ဒုက္ခဖြစ်၏၊ အနှစ်သာရကင်းမဲ့ သောကြောင့် အနတ္တဖြစ်၏´ဟု ဆင်ခြင်သုံးသပ်၏၊ ကျန်နာမ်ခန္ဓာ ၄-ပါးကိုလည်း ဤနည်းအတိုင်း ဆက်လက်၍ သုံးသပ်ရ၏။
၂။ အဒ္ဓါနသမ္မသနနည်း = ဤနည်းသည် ရုပ်နာမ်တရားများကို အတိတ်ဘ၀၊ ပစ္စုပ္ပန်ဘ၀၊ အနာဂတ်ဘ၀ဖြင့် ပိုင်းခြား၍ သုံးသပ်ပွားများသည့်နည်းဖြစ်၏။ ပွားများပုံမှာ -
`အတိတ်ဘ၀၌ ဖြစ်သော ရုပ်ခန္ဓာသည် ထိုအတိတ်ဘ၀၌ပင် ချုပ်ခဲ့လေပြီ၊ ဤပစ္စုပ္ပန်ဘ၀သို့ မရောက်နိုင်။ ဤသို့ ကုန်ခြင်းသဘောကြောင့် အနိစ္စ၊ ကြောက်မက်ဖွယ်ရာ ဖြစ်သောကြောင့် ဒုက္ခ၊ အနှစ်သာရ မရှိသောကြောင့် အနတ္တတရားချည်းပါတကား´။
၃။ သန္တတိသမ္မသနနည်း = ဤနည်းသည် `အအေးရုပ်အစဉ်၊ အပူရုပ်အစဉ်´ စသည်ဖြင့် တစ်ဘ၀တည်း၌ပင် အစဉ်အမျိုးမျိုး ခွဲခြား၍ သုံးသပ်သော နည်းဖြစ်၏။ ပွားများပုံမှာ -
`အပူရုပ်အစဉ်သည် အအေးရုပ်အစဉ်သို့ မရောက်၊ ချုပ်ပျောက်ခဲ့လေပြီ။ ဤသို့ ကုန်ခန်းခြင်းသဘောကြောင့် အနိစ္စ၊ ကြောက်မက်ဖွယ်ဖြစ်သောကြောင့် ဒုက္ခ၊ အနှစ်သာရ မရှိသောကြောင့် အနတ္တတရားချည်းပါတကား´
ထို့အတူ ရူပါရုံကို အာရုံပြုသော စိတ်ဝီထိအစဉ်သည် သဒ္ဒါရုံကို အာရုံပြုသည့် စိတ်ဝီထိအစဉ်သို့ မရောက်။ အနိဋ္ဌာရုံကိုအာရုံပြုသော ဒုက္ခဝေဒနာသည် ဣဋ္ဌာရုံကို အာရုံပြုသည့် သုခဝေဒနာသို့ မရောက်။ ရူပါရုံကိုမှတ်သားသော သညာက္ခန္ဓာအစဉ်သည် သဒ္ဒါရုံကို မှတ်သားသည့် သညာက္ခန္ဓအစဉ်သို့ မရောက်စသည်ဖြင့် ကျယ်ဝန်းစွာ ချဲ့ထွင်း၍ သုံးသပ်ရာ၏။
၎။ ခဏသမ္မသနနည်း = ရုပ်နာမ်တို့၏ ခဏအားဖြင့် သုံးသပ်ပွားများမူကို ခဏသမ္မသနနည်းဟု ခေါ်သည်။
`အတိတ်ခဏ၌ဖြစ်သော ရုပ်သည် ပစ္စုပ္ပန်သို့ မရောက်၊ ချုပ်ပျောက်ခဲ့လေပြီ။ ကုန်ခန်းခြင်းသဘောကြောင့် အနိစ္စ၊ ကြောက်မက်ဖွယ်သဘောကြောင့် ဒုက္ခ၊ အနှစ်သာရမရှိသောကြောင့် အနတ္တရားချည်းပါတကား´။
`အတီတဘ၀င်၌ ဖြစ်သော စိတ်စေတသိက်တို့သည် အတီတဘ၀င်ခဏ၌ ချုပ်ငြိမ်းခဲ့ကြလေပြီ၊ ဘ၀င်္ဂစလနသို့ မရောက်ချေ၊ ကုန်ခန်းခြင်းသဘောကြောင့် အနိစ္စ…´

ဥဒယဗ္ဗယဉာဏ်။ ။ရုပ်နာမ်တို့၏ဖြစ်ခြင်း `ဥပါဒ်´နှင့် ပျက်ခြင်း `ဘင်´တို့ကို ထင်မြင်အောင် ရူတတ်သော ဉာဏ်ကို ဥဒယဗ္ဗယဉာဏ်ဟု ခေါ်၏။

သမ္မသနဉာဏ်ရင့်သန်ပြီးသော ယောဂီသည် ရုပ်နာမ်တရားတို့ကို အကြောင်းနှင့် တွဲဖက်၍ ဆက်လက်ရူမှတ်ရာ၏။

ရုပ်ကိုဖြစ်စေသောအကြောင်းတရားတို့သည် အ၀ိဇ္ဇာ၊ တဏှာ၊ ကံ၊ အာဟာရတို့တည်း။ စေတသိက်နာမ်တို့ကို ဖြစ်စေသောအကြောင်းတို့ကား အ၀ိဇ္ဇာ၊ တဏှာ၊ ကံ၊ ဖဿတို့တည်း။ စိတ်နာမ်တရားကိုဖြစ်စေသော အကြောင်းတို့ကား အ၀ိဇ္ဇာ၊ တဏှာ၊ ကံ၊ နာမရူပတို့တည်း။

ဤသို့ ရူမှတ်ဖန်များလျှင် ဥပါဒ်ခဏ၊ ဘင်ခဏအားဖြင့် အဖြစ်အပျက်တို့ အလိုလိုထင်ပေါ်လာကြ၏။ ထိုအခါ အကြောင်းကို မစဉ်းစားတော့ဘဲ ဥပါဒ်ခဏ၊ ဘင်ခဏကိုသာ သတိထား၍ ခဏသမနုပဿနာနည်းဖြင့် ဆက်လက်ပွားများသော် အဖြစ်အပျက်များ အလွန်ထင်ရှားလာပြီး ဥဒယဗ္ဗဉာဏ် ဖြစ်ပေါ်လာ၏။ ထိုအခါ သြဘာသစသည့် ဥပက္ကိလေသတို့လည်း ဖြစ်ပေါ်လာကြ၏။

ဥပက္ကိလေသ ၁၀-ပါး = ၀ိပဿနာကို ညစ်နွမ်းစေတတ်သော တရားကို ဥပက္ကိလေသဟုခေါ်သည်။ ၀ိပဿနုပက္ကိလေသဟုလည်း ခေါ်၏။

၁။ သြဘာသ = ကိုယ်ရောင်ကိုယ်ဝါ။ စိတ်ဓာတ်၏ လွန်စွာကြည်လင်မူကြောင့် ကိုယ်မှ ထွက်သော အရောင်အ၀ါ။
၂။ ပီတိ = ၀ိပဿနာဉာဏ်နှင့် ယှဉ်သော ပီတိစေတသိက်။
၃။ ပဿဒ္ဓိ = ၀ိပဿနာဉာဏ်နှင့် ယှဉ်သော ကာယပဿဒ္ဓိနှင့် စိတ္တပဿဒ္ဓိ စေတသိက် ၂-ပါး။
၎။ အဓိမောက္ခ = ကမ္မဋ္ဌာန်းအာရုံ၌ စူးစိုက်စွာ သက်ဝင်ယုံကြည်သော သဒ္ဓါ စေတသိက်။
၅။ ပဂ္ဂဟ = ၀ိပဿနာစိတ်ကို နောက်မဆုတ်အောင် အားပေးချီးမြှောက်တတ်သည့် ၀ီရိယ။
၆။ သုခ = တစ်ကိုယ်လုံးကို မွန်မြတ်သော စိတ္တဇရုပ်တို့ဖြင့် ထုံမွှမ်၍ ချမ်းမြစေသည့် သုခဝေဒနာ။
၇။ ဉာဏ = ၀ဇိရစိန်လက်နက် မိုးကြိုးစက်ကဲ့သို့ သွက်လက် လျင်မြန်အမြင်သန်သည့် ၀ိပဿနာဉာဏ်။
၈။ ဥပဋ္ဌာန = ကမ္မဋ္ဌာန်းအာရုံ၌ စွဲမြဲစွာတည်သော သတိစေတသိက်။
၉။ ဥပေက္ခာ = တတြမဇ္ဈတ္တုပေက္ခာနှင့် အာဝဇ္ဇနုပေက္ခာ။ ဗျာပါရမများဘဲ အသင့်အားဖြင့် ရူစားတတ်သော တတြမဇ္ဈတ္တတာ စေတသိက်သည် တတြမဇ္ဈတ္တုပေက္ခာဖြစ်၏။ ဖြစ်မူပျက်မူကို အလွန်လျင်မြန်စွာ ဆင်ခြင်နိုင်သော အာဝဇ္ဇန်းနှင့် ယှဉ်သည့် စေတနာကို `အာဝဇ္ဇနုပေက္ခာ´ဟုခေါ်၏။
၁၀။ နိကန္တိ = သိမ်မွေ့သော တဏှာ။ ဤတဏှာကား သြဘာသ၊ ပီတိ၊ ပဿဒ္ဓိ စသည်တို့ဖြင့် တန်ဆာဆင်အပ်သော ၀ိပဿနာဉာဏ်ကို သာယာနှစ်သက်သည့် တဏှာဖြစ်၏။ သြဘာသမှစ၍ ဥပေက္ခာတိုင်အောင် ရှေ့ဥပက္ကိလေသ ၉-ပါးတို့သည် အကုသိုလ်တရားများ မဟုတ်ကြပါ။ ပီတိမှ ဥပေက္ခာအထိ ဖြစ်သော ဥပက္ကိလေသ ၆-ပါးတို့သည် ၀ိပဿနာဉာဏ်နှင့် ယှဉ်သော စေတသိက်များ ဖြစ်ကြ၏။

သို့ရာတွင် သြဘာသ စသည်တို့ ဖြစ်ပေါ်လာသောအခါ `ငါ့မှာဖြစ်၏´ဟု စွဲလမ်းသော ဒိဋ္ဌိ၊ `အလွန်နှစ်သက်ဖွယ်ကောင်း၏´ဟု ထင်မှတ်တတ်သည့် မာနနှင့်´ ငါ၏ သြဘာသတည်း `ဟု စွဲလမ်းတပ်မက်သော တဏှာတို့ ဖြစ်ပေါ်လာကြ၏။ ဤတဏှာ၊ မာန၊ ဒိဋ္ဌိတို့သည် ၀ိပဿနာ စိတ်ကို ညစ်နွမ်းစေတတ်သော ဥပက္ကိလေသာတို့တည်း။

နောက်ဆုံး ဥပက္ကိလေသဖြစ်သော နိကန္တိတဏှာသည်ကား မုချအားဖြင့် ဥပက္ကိလေသဖြစ်၏။ ၎င်းကို အာရုံပြု၍ နောက်ထပ် တဏှာ၊ မာန၊ ဒိဋ္ဌိ တို့လည်း ဖြစ်ပေါ်လာကြ၏။

ဥပက္ကိလေသ ၁၀-ပါးကို ၎င်းတို့အား အာရုံပြုကြသည့် တဏှာ၊ မာန၊ ဒိဋ္ဌိတို့နှင့် မြှောက်ပွားသော် `၀ိပဿနုပက္ကိလေသ ၃၀´ ဖြစ်၏။

မဂ္ဂါမဂ္ဂဉာဏ်ဏဒဿန၀ိသုဒ္ဓိ = သြဘာသ၊ ပီတိ၊ ပဿဒ္ဓိစသည်တို့ ဖြစ်ပေါ်လာကြသည့်အခါ ပရိယတ်၌ မကျွမ်းကျင်ကြသော အချို့ယောဂီတို့သည် ထိုကိုယ်ရောင်ကိုယ်ဝါ၊ ပီတိ၊ မဿဒ္ဓိ စသည်တို့ကို မဂ်စိတ်၊ ဖိုလ်စိတ်က ဖြစ်ပေါ်စေသည်ဟု အထင်မှား၍ `ငါမဂ်ဖိုလ်ရပြီ´ဟု တစ်လွဲယူဆမိကြ၏။ ထိုအခါ ၀ိပဿနာလမ်းလွဲ၍ သာယာမူ တဏှာ၊ အထင်ကြီးမူမာနနှင့် စွဲလမ်းမူ ဒိဋ္ဌိတို့ ဖြစ်ပေါ်ကြ၏။ ထို့ကြောင့် ၀ိပဿနာ ညစ်နွမ်းသွား၏။

ပရိယတ်၌ ကျွမ်းကျင်ကြသည့် ယောဂီတို့ကား ထိုသြဘာသ၊ ပီတိ၊ ပဿဒ္ဓိစသည်တို့သည် တဏှာ၊ မာန၊ ဒိဋ္ဌိ တို့၏ တည်ရာဖြစ်၍ ၀ိပဿနာကို ညစ်နွမ်းစေတတ်သော ဘေးရန်များတည်း။ ထိုသြဘာသစသည်ကို နှစ်သက် စွဲလမ်းနေမူသည် မဂ်ဖိုလ်ရကြောင်း လမ်းကောင်းလမ်းမှန်မဟုတ်၊ လမ်းမှားဖြစ်သည့် `အမဂ္ဂ´တည်း၊ ထိုသြဘာသ စသည်တို့ကို ဂရုမစိုက်ဘဲ အားထုတ်မြဲဖြစ်သည့် ၀ိပဿနာကို ဆက်လက်အားထုတ်ခြင်းသည်သာ မဂ်ဖိုလ်ရကြောင်း လမ်းကောင်း `မဂ္ဂ´ဖြစ်၏။ ဤသို့ လမ်းမှန်-မမှန်ကို ထင်ရှားစွာ ခွဲခြားသိမြင်တတ်သည့် ဉာဏ်ကို `မဂ္ဂါမဂ္ဂဉာဏဒဿန၀ိသုဒ္ဓိ´ဟု ခေါ်သည်။

၆။ ပဋိပဒါဉာဏ်ဒဿန၀ိသုဒ္ဓိ = မဂ်ဖိုလ်ရောက်ကြောင်း စင်ကြယ်သည့် ဉာဏ်အမြင်။ ဥဒယဗ္ဗယဉာဏ်နောက်ပိုင်းမှစ၍ အနုလောမဉာဏ်တိုင်အောင် ၉-ပါးသော ဉာဏ်စုကို ပဋိပဒါဉာဏဒဿန၀ိသုဒ္ဓိဟု ခေါ်သည်။

ဥဒယဗ္ဗယဉာဏ် = လမ်းမှန်နှင့်လမ်းမှားကို ပြတ်သားစွာ ပိုင်းခြားသိမြင်ပြီးသောအခါ ဥဒယဗ္ဗယဉာဏ်ထက်သန်လာအောင် တစ်ဖန်အားထုတ်ရ၏။ ထိုအခါ ရုပ် နာမ်၏ အဖြစ်အပျက် ၂-မျိုးလုံးကို ထင်ရှားစွာ မြင်ရ၏။

ဘင်္ဂဉာဏ် = ရုပ်နာမ်အဖြစ်အပျက်တို့ အလွန်ထင်ပေါ်လာသောအခါ ထိုအဖြစ်အပျက်တို့သည် အလွန်လျင်မြန်လှသဖြင့် အဖြစ်ကို အာရုံမပြုမိတော့ဘဲ အပျက်ကိုသာ ရူမိလေ၏။ ရုပ်နာမ်တို့၏ အပျက်ကိုသာ မြင်သိသောဉာဏ်ကို ဘင်္ဂဉာဏ်ဟု ခေါ်၏။ သင်္ခါရတရား ၁ခုက ဆက်၍ အာရုံပြုနိုင်သည့်အခါ ဘင်္ဂဉာဏ်အထွတ်အထိပ်သို့ ရောက်၏။

ဘယဉာဏ် = ရုပ်နာမ် သင်္ခါရတို့၌ အပျက်သဘောချည်းကိုသာ ဆက်တိုက်မြင်နေရသည့် အခါ ရုပ်နာမ်တို့ကို ကြောက်စရာ ဘေးအဖြစ် ထင်မြင်လာသော ဘယဉာဏ်ဖြစ်ပေါ်၏။

အာဒီန၀၊ နိဗ္ဗိဒါ၊ မုစ္စိတုကမျတာ = ရုပ်နာမ် သင်္ခါရတို့ကို ကြောက်စရာဘေးအဖြစ် မြင်သိလာသည်အခါ ထိုသင်္ခါရတို့၌ အပြစ်မြင်သော အာဒီန၀ဉာဏ်လည်း ဖြစ်ပေါ်လာ၏။ အပြစ်မြင်လျှင် ထိုသင်္ခါရတို့၌ မပျော်ပိုက်နိုင်တော့ဘဲ ငြီးငွေ့သည့် နိဗ္ဗိဒါဉာဏ် ဖြစ်ပေါ်လာ၏။

ရုပ်၊ နာမ်၊ သင်္ခါရတို့၌ ငြီးငွေ့လာသည့်အခါ ပိုက်ကွန်တွင်းမှ ငါးသည်ပိုက်ကွန်တွင်းမှ လွတ်မြောက်လိုသကဲ့သို့၊ မြွေ၏ခံတွင်း၌ အဖမ်းခံနေရသော ဖားငယ်သည် ထိုမြွေခံတွင်းမှ လွတ်မြောက်လိုသကဲ့သို့ ယောဂီ၏ သန္တာန်၌ ထိုသင်္ခါရမှ လွတ်မြောက်လိုသော မုစ္စိတုကမျတဉာဏ်လည်း ဖြစ်ပေါ်လာ၏။

ပဋိသင်္ခါဉာဏ်= ရုပ်၊ နာမ် သင်္ခါရမှ လွတ်မြောက်လိုသော ယောဂီသည် လွတ်မြောက်နိုင်ရေးအတွက် ရုပ်၊ နာမ်၊ သင်္ခါရတို့ကို အနိစ္စ၊ ဒုက္ခ၊ အနတ္တလက္ခဏာတင်၍ တစ်ဖန်ရူမှတ်ပြန်၏။

ဥပမာဆိုသော် ရေမြွေဟောက်တစ်ကောင်းကို ငါးအထင်ဖြင့် အုပ်ဖမ်းမိသော ယောက်ျားသည် မြွေဆိုး၏ အမှတ်လက္ခဏာဖြစ်သည့် လည်ရေးသုံးရစ်ကို မြင်လေလျှင် ကြောက်ရွံ့ ရွံမုန်းသည်ဖြစ်လျက် မြွေကို အလျင်အမြန် လွှင့်ပစ်လို၏။ သို့သော် မွေအကိုက်မခံရရန် မြွေပင်ပန်းသွားအောင် မြွေကို မိမိဦးခေါင်းအထက်သို့ ကိုင်မြှောက်၍ သုံးလေးပတ်မျှ မွှေယမ်းပြီးနောက်မှ အဝေးသို့ လွှင့်ပစ်လိုက်သကဲ့သို့တည်း။

သင်္ခါရုပေက္ခာဉာဏ် = ပဋိသင်္ခါဉာဏ်ဖြင့် သင်္ခါရတို့ကို စွန့်လွှတ်နိုင်ပြီးသည့်နောက် သင်္ခါရတို့ကို ကြောက်စရာ ရွံမုန်းစရာအဖြစ် မရူတော့ဘဲ လျစ်လျူရူသည့် အနေဖြင့် ရူမှတ်နိုင်လာ၏။ ပမာဆိုသော် ဖောက်ပြန်တတ်သော ဇနီးသည်အား ကွားရှင်းလိုက်သည့် ယောက်ျားသည် ထိုဇနီးသည်ဟောင်းက တစ်ဖန် ဖောက်ပြန်သည်ကို မြင်ရလျှင်လည်း မိမိနှင့် မသက်ဆိုင်တော့သဖြင့် လျစ်လျူရူနေနိုင်သကဲ့သို့တည်း။

ရုပ်၊ နာမ်တို့ကို သာယာနှစ်သက်ခြင်းလည်း မရှိ၊ ကြောက်ရွံ့ခြင်းလည်း မရှိဘဲ လျစ်လျူရူသည့်အနေဖြင့် အနိစ္စ၊ ဒုက္ခ၊ အနတ္တဟု ဆင်ခြင်တတ်သော ဉာဏ်ကို သင်္ခါရုပေက္ခာဉာဏ်ဟု ခေါ်၏။

အနုလောမဉာဏ် = သင်္ခါရုပေက္ခာဉာဏ်ဖြင့် သင်္ခါရတို့၌ လျစ်လျူရူသော် သင်္ခါရတို့ကို အာရုံမပြုလိုတော့ဘဲ သင်္ခါရမှ လွတ်ကင်းရာ နိဗ္ဗာန်သို့ စိတ်ညွှတ်နေ၏။ ယောဂီ၏စိတ်သည် နိဗ္ဗာန်ကို မမြင်သေးသမျှ သင်္ခါရကိုပင် အာရုံပြု၍ နိဗ္ဗာန်ကို ဆက်လက်ရှာဖွေနေ၏။ နိဗ္ဗာန်ကို မြင်လောက်သည့် အကြိမ်၌ကား ပရိကမ်၊ ဥပစာ၊ အနုလုံဟု အမည်ရကြသော အနုလောမဉာဏ် ဖြစ်ပေါ်လာပြီးနောက် ဂေါတြဘုဖြင့် နိဗ္ဗာန်ကို အာရုံပြုလျက် မဂ်ဖိုလ်ရောက်အောင် တိုးတက်သွားလေသည်။

ရှေးအခါက ပင်လယ်ခရီးသွားသည့် ရွက်လှေကြီးမှ ဒိသာကာက ခေါ် ကျီးငှက်ကို လွှတ်လိုက်သောအခါ ကျီးငှက်သည် ကမ်းခြေကို မမြင်လျှင် ရွက်တိုင်ထိပ်သို့ ပြန်လာ၏။ ကမ်းခြေကိုတွေ့သည့်အခါ ပြန်မလာတော့ဘဲ ကမ်းအရောက် ပျံသွားလေ၏။ ဤဥပမာအားဖြင့် အနုလောမဉာဏ်ဖြစ်ပုံကို နိူင်းယှဉ်အပ်၏။

ထို့ကြောင့် အနုလောမဉာဏ်သည် မဂ္ဂ၀ီထိ၌ ပါသော ပရိကမ်၊ ဥပစာ၊ အနုလုံတို့ ပင်တည်း။ ဂေါတြဘုကား သင်္ခါရကို အာရုံမပြုနိုင်ဘဲ နိဗ္ဗာန်ကို အာရုံပြုသောကြောင့် ၀ိပဿနာဉာဏ်၌ မပါဝင်ချေ။ သို့သော် ၀ိပဿနာဉာဏ်များ၏ အထွတ်အထိပ်နှင့်တူသောကြောင့် `၀ိပဿနာတွင် သွင်းယူရမည်´ဟုဆို၏။

ဂေါတြဘုစိတ် = ပုထုဇဉ်အနွယ်ကို လွှမ်းမိုးကျော်လွန်နိုင်သောစိတ်။
မဂ္ဂ၀ီထိ၌ ပါဝင်ကြသော ပရိကမ်၊ ဥပစာ၊ အနုလုံစိတ်တို့သည် အနိစ္စ၊ ဒုက္ခ၊ အနတ္တဟူသော လက္ခဏာ တစ်ပါးပါးကို အာရုံပြု၏။ ဂေါတြဘုစိတ်သည်ကား ရုပ်နာမ်သင်္ခါရကို အာရုံမပြုဘဲ နိဗ္ဗာန်ကို အာရုံပြု၏။ ဂေါတြဘုသည် `မဂ်ရှေ့မှ နိဗ္ဗာန်ကို ညွှန်ပြတတ်သောကြောင့် မဂ်ဇောဖိုလ်ဇောတို့၏ ရှေ့သွားဖြစ်သည့် အာဝဇ္ဇန်းနှင့်တူ၏´ဟု မှတ်ချက်ချကြ၏။

၇။ ဉာဏ်ဒဿန၀ိသုဒ္ဓိ = မဂ်ဉာဏ်လေးပါး။ ဂေါတြဘုစိတ်ချုပ်ငြိမ်းပြီးသည်နှင့် တစ်ပြိုင်နက် နိဗ္ဗာန်ကို အာရုံပြုလျက် မဂ်စိတ်ဖြစ်ပေါ်လာ၏။

ဆီမီးသည် မီးစာကိုလောင်၊ အမှောင်ပယ်ခွင်း၊ အလင်းရောင်လွှမ်း၊ ဆီကုန်ခန်းစေမူ၊ ဤကိစ္စ၄-ခုကို တစ်ပြိုင်တည်း ပြုနိုင်သကဲ့သို့ ထို့အတူ မဂ်တရားသည်လည်း ဒုက္ခသစ္စာကို ပိုင်းခြား၍ သိခြင်း၊ သမုဒယသစ္စာကို ပယ်ခြင်း၊ နိရောဓသစ္စာကို မျက်မှောက်ပြုခြင်း၊ မဂ္ဂသစ္စာကို ဖြစ်ပေါ်လာစေခြင်းဟူသော ကိစ္စ ၄-ချက်ကို တစ်ပြိုင်နက်တည်း ပြီးစေနိုင်၏။

မဂ်စိတ်တစ်ကြိမ် ဖြစ်ပြီးနောက် မန္ဒပညာပုဂ္ဂိုလ်ဖြစ်လျှင် ဖိုလ်စိတ် ၂-ကြိမ်ဖြစ်၏။ တိက္ခပညာပုဂ္ဂိုလ်ဖြစ်လျှင် ဖိုလ်စိတ် ၃-ကြိမ်ဖြစ်၏။ ထို့နောက် ဘ၀င်ကျ၏။

မန္ဒပုဂ္ဂိုလ်၏ မဂ္ဂ၀ီထိပုံ
`န-ဒ-မ-ပ-ဥ-နု-ဂေါ-မဂ်-ဖိုလ်-ဖိုလ်-´ဘ၀င်-ဘ၀င်

တိက္ခပုဂ္ဂိုလ်၏ မဂ္ဂ၀ီထိပုံ
`န-ဒ-မ-ဥ-နု-ဂေါ-မဂ်-ဖိုလ်-ဖိုလ်-ဖိုလ်-´ဘ၀င်-ဘ၀င်…

ပစ္စဝေက္ခဏာဝီထိ = မဂ္ဂ၀ီထိနောက် ဘ၀င်ကျ၍ ဘ၀င်အစဉ် ပြတ်သည့်အခါ (၁)မဂ်ကိုဆင်ခြင်သော ၀ီထိ၊ (၂)ဖိုလ်ကိုဆင်ခြင်သော ၀ီထိ၊ (၃)နိဗ္ဗာန်ကိုဆင်ခြင်သော ၀ီထိ၊ (၄)ပယ်ပြီးသည့် ကိလေသာကိုဆင်ခြင်သော ၀ီထိ၊ (၅)ကြွင်းကျန်သည့် ကိလေသာကို ဆင်ခြင်သော ၀ီထိဟူ၍ ပစ္စဝေက္ခဏာဝီထိ ၅-မျိုးဖြစ်၏။

ဉာဏဒဿန၀ိသုဒ္ဓိ = သီလ၀ိသုဒ္ဓိမှစ၍ အားထုတ်ခဲ့ရာတွင် မဂ်၏ရှေ့နားရှိ အနုလုံသို့ ရောက်လျှင် အောက်ဝိသုဒ္ဓိ ၆-ပါ ပြည့်စုံလေပြီ။ သောတာပတ္တိမဂ်၊ သကဒါဂါမိမဂ်၊ အနာဂါမိမဂ်နှင့် အရဟတ္တမဂ်ဟူသော မဂ် ၄-ပါးသည် ကိလေသာမှ စင်ကြယ်၍ သစ္စာ ၄-ပါးကို တိုက်ရိုက် သိတတ်သောကြောင့် `ဉာဏဒဿန၀ိသုဒ္ဓိ´ဟု ခေါ်၏။

အရိယာပုဂ္ဂိုလ်များ
ပထမအကြိမ် မဂ်ဆိုက်ပြီးသော ပုဂ္ဂိုလ်ကို သောတာပန်၊ ဒုတိယအကြိမ် မဂ်ဆိုက်ပြီးသော ပုဂ္ဂိုလ်ကို သကဒါဂါမ်၊ တတိယအကြိမ် မဂ်ဆိုက်ပြီးသော ပုဂ္ဂိုလ်ကို အနာဂါမ်၊ စတုတ္ထအကြိမ် မဂ်ဆိုက်ပြီးသော ပုဂ္ဂိုလ်ကို ရဟန္တာဟုခေါ်၏။

၁။ သောတာပန် = အရိယာမဂ်တည်းဟူသော ရေအလျင်သို့ ရောက်သူဟု အဓိပ္ပါယ်ရှိ၏။ အရိယာမဂ္ဂင် ရေအလျဉ်သို့ ရောက်ပြီဖြစ်၍ ရှေးတိုးလျှင် နိဗ္ဗာန်တည်းဟူသော သမုဒ္ဒရာသို့ ၀င်ဖို့ရာသာ ရှိတော့၏။
သောတာပတ္တိမဂ်သည် ကိလေသာ ၁၀-ပါးတွင် ဒိဋ္ဌိနှင့် ၀ိစိကိစ္ဆာတို့ကို အကြွင်းအကျန်မရှိ ပယ်၏။ ဥဒ္ဓစ္စနှင့် တစ်ပါး ကျန်ကိလေသာများကို အပါယဂါမနိယသတ္တိ (အပါယ် ကျရောက်ဖို့ရန် ရုန့်ရင်းကြမ်းတမ်းသောသတ္တိ) လောက်ကိုသာ ပယ်သေး၏။

အကုသိုလ်စိတ် ၁၂-ပါးတွင် ဒိဋ္ဌိဂတသမ္ပယုတ်စိတ် ၄-ပါးနှင့် ၀ိစိကိစ္ဆာသဟဂုတ်စိတ် ၁-ပါး၊ ပေါင်း ၅-ပါးကို အကြွင်းမရှိပယ်၏။ ဥဒ္ဓစ္စသည် အပါယ်မချနိုင်သဖြင့် ဥဒ္ဓစ္စသဟဂုတ်စိတ်ကို တို့ရုံမျှမတို့သေး။ ကြွင်းသော အကုသိုလ်စိတ် ၆-ပါးတို့၏ အပါယ်ချနိုင်သော အစွမ်းသတ္တိကိုကား ဖယ်ရှားလိုက်လေပြီ။

ထို့ကြောင့် သောတာပန်သည် အပါယ်ရောက်စေနိုင်သည့် အမူများကို မပြုလုပ်တော့။ ကာမဘုံ၌ ၇-ကြိမ်ထက် လွန်၍လည်း ပဋိသန္ဓေမနေတော့။ ဗြဟ္မာဘုံ၌ကား ၇-ကြိမ်ထက်ပို၍ ပဋိသန္ဓေနေနိုင်၏။
၂။ သကဒါဂါမ် = ကာမဘုံ၌ ၁-ကြိမ်သာ ပဋိသန္ဓေနေရပြီး ရဟန္တာဖြစ်မည့် ပုဂ္ဂိုလ်။ သကဒါဂါမိမဂ်သည် သောတာပတ္တိမဂ် မပယ်နိုင်သော ကိလေသာများကို နည်းပါးအောင်သာ ပြုနိုင်၏။
၃။ အနာဂါမ် = ကာမဘုံ၌ ပဋိသန္ဓေထပ်မံနေခြင်းမရှိသော ပုဂ္ဂိုလ်။ အနာဂါမိမဂ်သည် ကာမရာဂခေါ် ကာမဂုဏ်ငါးပါး၌ တပ်မက်သော တဏှာနှင့်ဗျာပါဒခေါ် ဒေါသကိလေသာတို့ကို အကြွင်းမဲ့ ပယ်သတ်၏။ ထို့ကြောင့် အနာဂါမ်သည် ကာမဂုဏ်ခံစားခြင်း မရှိ၊ ဒေါသလည်း မထွက်တော့ပြီ။
၎။ ရဟန္တာ = ကိလေသာအားလုံးမှ ဝေးကွာသော ပုဂ္ဂိုလ်။ အရဟတ္တသဖြင့် ကြွင်းကျန်ရစ်သည့် ကိလေသာ ၇-ပါးစလုံးကို ပယ်သတ်၏။ စိတ်အားဖြင့် ရေတွက်သော ရူပရာဂနှင့် အရူပရာဂတို့ကို ပြုတတ်သည့် ဒိဋ္ဌိဂတ ၀ိပ္ပယုတ်စိတ် ၄-ပါးကို လည်းကောင်း၊ ဥဒ္ဓစ္စသဟဂုတ်စိတ်ကို လည်းကောင်း အကြွင်းမဲ့ပယ်သတ်၏။

သန့်ရှင်း၍ မြေသြဇာကြွယ်ဝသော လယ်မြေ၌ စိုက်ပျိုးကြဲချလိုက်သည့် မျိုးစေ့ဟူသမျှသည် သန်မာထွားကျိုင်းစွာ ပေါက်ပွားရှင်သန်လာကြပြီးလျှင် အသီးအပွင့်များကို ဆောင်သကဲ့သို့ ထို့အတူ ကိလေသာအညစ်အကြေး ကင်းစင်သဖြင့် သန့်ရှင်းမြင့်မြတ်သော အဖြစ်သို့ ရောက်ပြီးသည့် ရဟန္တာအရှင်မြတ်သည် လှူဒါန်းပူဇော်သူတို့အား ကြီးကျယ်သည့် အကျိုးကျေးဇူးများကို ဖြစ်ထွန်းစေ၏။ ထို့ကြောင့် ရဟန္တာသည် အလှူခံပုဂ္ဂိုလ်တို့တွင် အမြတ်ဆုံးအလှူခံ ဖြစ်တော်မူ၏။

ဖလသာမပတ္တိဝီထိ
အရိယာပုဂ္ဂိုလ်တို့သည် မိမိတို့ ရရှိပြီးသော မဂ်၏ အကျိုးဖြစ်သည့် ဖိုလ်ကို အလိုရှိသမျှ ခံစားနိုင်ကြ၏။ သောတာပန်သည် သောတာပတ္တိဖိုလ်ကို အလိုရှိသမျှ ခံစားနိုင်ကြ၏။ သောတာပန်သည် သောတာပတ္တိဖိုလ်ကို ၀င်စားနိုင်၏။ သကဒါဂါမ်သည် သကဒါဂါမိဖိုလ်ကို ၀င်စားနိုင်၏။ အနာဂါမ်သည် အနာဂါမိဖိုလ်ကို ၀င်စားနိုင်၏။ ရဟန္တာသည် အရဟတ္တဖိုလ်ကို ၀င်စားနိုင်၏။ ဖိုလ်စိတ်တစ်မျိုးတည်းက ကြိမ်ဖန်များစွာ ထပ်ကာထပ်ကာ ဖြစ်နေခြင်းကို ဖလသမာ ပတ်ဝင်စားသည်ဟု ခေါ်၏။

မန္ဒပုဂ္ဂိုလ်၏ ဖလသမာပတ္တိဝီထိ
`တီ-န-ဒ-မ-ပ-ဥ-နု-ဝေါ-ဖိုလ်-ဖိုလ်(များစွာ)-´ဘွင်-ဘွင်

တိက္ခပုဂ္ဂိုလ်၏ ဖလသမာပတ္တိဝီထိ
`တီ-န-ဒ-မ-ဥ-နု-ဝေါ-ဖိုလ်-ဖိုလ်(များစွာ)-´ဘွင်-ဘွင်

သမာပတ် ၈-ပါး ၀င်စားနိုင်သော အနာဂါမ်များနှင့် ရဟန္တာများသာ နိရောဓသမာပတ်ကို ၀င်စားနိုင်ကြ၏။ နိရောဓသမာပတ်ကို ၀င်စားလိုသော် ရှေးဦးစွာ လောကီပထမဈာန်ကို ၀င်စားပြီးနောက် ထိုဈာန်မှထကာ ထိုဈာန်၌ ပါဝင်သော သင်္ခါရ(စိတ်စေတသိက်)တို့ကို အနိစ္စ-ဒုက္ခ-အနတ္တတင်၍ ၀ိပဿနာရူရ၏။ ထိုနည်းအတူ ဒုတိယဈာန်၊ တတိယဈာန်စသည်ဖြင့် အာကိဉ္စညာယတန ဈာန်အထိ အစဉ်အတိုင်း ဈာန်တစ်ခုစီကို ၀င်စားပြီးလျှင် ထိုဈာန်မှထကာ ထိုဈာန်၌ပါသော သင်္ခါရတရားတို့ကို ၀ိပဿနာရူရ၏။
ထို့နောက် နေ၀သညာနာသညာယတနဈာန်ကို မ၀င်စားသေးဘဲ ပုဗ္ဗကိစ္စ ၄-ပါးကိုပြု၏။ ၎င်းနောက်နေ၀သညာနာသညာယတနဈာန်ကိုဝင်စားရာ အပ္ပနာဇော ၂-ကြိမ်သာ ဖြစ်ပြီးနောက် စိတ်အစဉ်ပြတ်စဲလေ၏။ ထိုအခါ စေတသိက်များနှင့် စိတ္တဇရုပ်များလည်း ဖြစ်ခွင့်မရှိတော့ဘဲ ချုပ်ငြိမ်းနေကြ၏။ ကမ္မဇရုပ်၊ ဥတုဇရုပ်၊ အာဟာရဇရုပ်များကား ဆက်လက်ဖြစ်ပျက်နေကြ၏။
ထိုသို့ စိတ်စေတသိက်၊ စိတ္တဇရုပ်တို့ ချုပ်ငြိမ်းနေခြင်းကိုပင် `နိရောဓသမာပတ်ဝင်စားသည်´ဟု ဆို၏။
`ထမင်းအသက် ခုနှစ်ရက်´ဟူသော စကားနှင့်အညီ လူ့ဘုံ၌ ၇-ရက်အထိသာ နိရောဓသမာပတ်ကို ၀င်စားနိုင်၏။ အစာမသုံးဆောင်ကြရသော ရူပဗြဟ္မာများမှာ ကြာရှည်စွာ ၀င်စားနိုင်ကြ၏။ အရူပဗြဟ္မာများကား ရူပဈာန်ကို မ၀င်စားနိုင်ကြသဖြင့် နိရောဓသမာပတ်ကို မ၀င်စားနိုင်ကြချေ။
အဓိဋ္ဌာန်ခဲ့သည့် အချိန်စေ့ရောက်၍ စိတ်စေတသိက်တို့ ပြန်လည်ဖြစ်ပေါ်ခြင်းကို `နိရောဓသမာပတ်´မှ ထသည်ဟုဆို၏။ ထိုအခါ အနာဂါမ်ပုဂ္ဂိုလ်၌ အနာဂါမိဖိုလ်စိတ် ၁-ကြိမ်၊ ရဟန္တာပုဂ္ဂိုလ်၌ အရဟတ္တဖိုလ်စိတ် ၁-ကြိမ်ဖြစ်ပြီးနောက် ဘ၀င်ကျပြီးလျှင် မိမိဖိုလ်ကို ပြန်၍ ဆင်ခြင်သော ပစ္စဝေက္ခဏာဝီထိဖြစ်၏။

အခန်း(၉) ကမ္မဋ္ဌာန်းပိုင်း -၁

လွန်စွာအကျိုးများသဖြင့် မိမိတို့၏ သန္တာန်၌ အဖန်ဖန်ဖြစ်စေထိုက်သောတရားကို `ဘာဝနာ´ဟုခေါ်၏။

၁။ သမထဘာဝနာ
ကုသိုလ်တရားနှင့် မဂ်ဉာဏ်ဖိုဉာဏ်တို့ မဖြစ်ပေါ်နိုင်အောင် ပိတ်ပင်တားဆီးတတ်သော နီဝရဏတရားတို့ကိုလည်းကောင်း၊ ၀ိတက်, ၀ိစာရ, ပီတိ, သုခတည်းဟူသော အောက်ဈာန် အင်္ဂါများကိုလည်းကောင်း၊ ငြိမ်သက်စေနိုင်သည့် သမာဓိကို `သမထဘာဝနာ´ဟု ခေါ်၏။
တရားကိုယ်မှာ လောကီကုသိုလ်စိတ်တို့နှင့် မဟာကြိယာစိတ်တို့၌ ယှဉ်တွဲဖြစ်ပေါ်သော သမာဓိခေါ် ဧကဂ္ဂတာ စေတသိက်ဖြစ်၏။

၂။ ၀ိပဿနာဘာဝနာ
ဘုံသုံးပါး၌ ထင်ရှားရှိကြသော တေဘူမက ရုပ်နာမ်တရားတို့ကို အနိစ္စ၊ ဒုက္ခ၊ အနတ္တဟု မြင်တတ်သည့် ဉာဏ်ပညာကို `၀ိပဿနာဘာဝနာ´ဟုခေါ်၏။

တရားကိုယ်မှာ ဟာကုသိုလ်စိတ်နှင့် မဟာကြိယာစိတ်တို့၌ ယှဉ်တွဲဖြစ်ပေါ်သော ဉာဏ်ပညာခေါ် ပညိနြေ္ဒစေတသိက်ဖြစ်၏။

ကမ္မဋ္ဌာန်း
သမထဘာဝနာပွားများအားထုတ်မူ၏ တည်ရာဖြစ်သော ပထ၀ီကသိုစ်း၊ အာပေါကသိုဏ်း စသည့်အာရုံများသည် လည်းကောင်း၊ ၀ိပဿနာဘာဝနာ ပွားများအားထုတ်မူ၏ တည်ရာဖြစ်သော ရုပ်နာမ်အာရုံတို့သည် လည်းကောင်း `ကမ္မဋ္ဌာန်း´ ဖြစ်ကြ၏။

၁။ သမထကမ္မဋ္ဌာန်း
ကသိုဏ်း ၁၀-ပါး၊ အသုဘ ၁၀-ပါး၊ အနုဿတိ ၁၀-ပါး၊ အပ္ပမညာခေါ် ဗြဟ္မ၀ိဟာရ ၄-ပါး၊ အာရုပ္ပ ၄-ပါး၊ အာဟာရေပဋိကူလသညာ ၁-ပါး၊ စတုဓာတု၀၀တ္ထာန် ၁-ပါးဟူသည့် ၄၀-သော ကမ္မဋ္ဌာန်းတို့ကို `သမ္မထကမ္မဋ္ဌာန်း´ဟု ခေါ်၏။
၂။ ၀ိပဿနာကမ္မဋ္ဌာန်း
ရုပ်နာမ်တို့၏ အနိစ္စလက္ခဏာ၊ ဒုက္ခလက္ခဏာ၊ အနတ္တလက္ခဏာ တည်းဟူသော လက္ခဏာရေးသုံးပါးကို `၀ိပဿနာ ကမ္မဋ္ဌာန်း´ဟုခေါ်၏။

ကသိုဏ်း ၁၀-ပါး
ကမ္မဋ္ဌာန်းရူသူက အကြွင်းအကျန်မရှိ၊ အလုံးစုံ အကုန်အစင် တစ်ပြိုင်နက်ထင်မြင်အောင် ဆင်ခြင်ကြည့်ရူအပ်သော အာရုံကို `ကသိုဏ်း´ဟု ခေါ်၏။ ကသိုဏ်းဝန်းသည် အချင်း ၁-ထွာနှင့် လက် ၄-သစ်ခန့်ရှိသင့်၏။

၁။ ပထ၀ီကသိုဏ်း = မြေကသိုဏ်း (မြေသားဒြပ်အ၀န်း)

၂။ အာပေါကသိုဏ်း = ရေကသိုဏ်း (သပိတ်ဖုံးစသည်၌ ထည့်ထားသော ရေအ၀န်း)
၃။ တေဇောကသိုဏ်း = မီးကသိုဏ်း (အ၀န်းအ၀ိုင်းသဏ္ဌာန် စီထားသော မီးကျည်းစု)
၎။ ၀ါယောကသိုဏ်း = လေကသိုဏ်း (ဆံပင်ဖျား၊ မြက်ပင်ဖျားတို့ကို လေတိုးဝှေ့သွားသည့် အခြင်းအရာ)

၅။ နီလကသိုဏ်း = အညိုရောင် အဆင်းကသိုဏ်း (အဖြူခံပေါ် အညိုရောင်အ၀န်း)

၆။ ပီတကသိုဏ်း = ရွှေရောင်အဆင်းကသိုဏ်း

၇။ လောဟိတကသိုဏ်း = အနီရောင်အဆင်းကသိုဏ်း

၈။ သြဒါတကသိုဏ်း = အဖြူရောင် အဆင်းကသိုဏ်း (အမည်းခံပေါ် အဖြူရောင်အ၀န်း)

၉။ အာကာသကသိုဏ်း = ကောင်းကင်ဟင်းလင်းပြင်ကသိုဏ်း (နံရံပေါက်စသည်)

၁၀။ အာလောကကသိုဏ်း = အလင်းရောင်ကသိုဏ်း (နံရံပေါက်ဝမှဝင်လာသော နေရောင်ကွက်)

အသုဘ ၁၀-ပါး
သေလွန်ပြီးနောက်ဖြစ်ပေါ်လာသော မတင့်တယ်သည့် ကိုယ်ခန္ဓာ၏ ပုံသဏ္ဌာန်ဒြပ် အမျိုးမျိုးကို `အသုဘ´ဟု ခေါ်၏။

၁။ ဥဒ္ဓုမာတက = သေလွန်ပြီး ၂-ရက်၊ ၃-ရက်ကြာသည့်အခါ ဖူးဖူးရောင်ပုပ်သဖြင့် စက်ဆုပ်ဖွယ်သော မသာလောင်း။

၂။ ၀ိနီလက = အနီအဖြူရောင်စပ်လျက် ညိုမည်းပုပ်ပွနေသော မသာလောင်း။
၃။ ၀ိပုဗ္ဗက = ပြည်တစိုစိုပေါက်ကွဲယိုလျက် စက်ဆုပ်ဖွယ်ရာ မသာလောင်း။
၎။ ၀ိစ္ဆိဒ္ဒက = အထက်အောက် ၂-ပိုင်း၊ ၃-ပိုင်းပြတ်နေသော မသာလောင်း။

၅။ ၀ိက္ခာယိတက = ခွေး၊ ဠင်းတ၊ ကျီး စသည်တို့ ခဲစားကိုက်ဖြတ်ထားသော မသာလောင်း။

၆။ ၀ိက္ခိတ္တက = လက်ခြေ ဦးခေါင်း ကိုယ်ခန္ဓာ တို့ကို တစ်ကွဲတစ်ပြားစီ ဖရိုဖရဲ ကြဲပစ်ထားသော မသာလောင်း။

၇။ ဟတ၀ိက္ခိတ္တက = ဒါး လှံ လက်နက်တို့ဖြင့် အစိတ်စိတ် အမြွာမြွာ လှီးဖြတ် နှိပ်စက်ထားသော မသာလောင်း။

၈။ လောဟိတက = သွေးများထွက်ယိုလျက် တစ်ကိုယ်လုံး သွေးလိမ်းကျံနေသော မသာလောင်း။

၉။ ပုဠုဝက = ပိုးလောက်များ ပြည့်နှက်နေသော မသာလောင်း။

၁၀။ အဋ္ဌိက = အရိုးများသာ စုပေါင်း၍လည်းကောင်း၊ ပြန့်ကြဲ၍လည်းကောင်း ကြွင်းကျန်ရစ်သော မသာလောင်း။

အနုဿတိ ၁၀-ပါး
အဖန်ဖန်အောက်မေ့ဆင်ခြင်မူ (သတိစေတသိက်)ကို `အနုဿတိ´ဟု ခေါ်၏။

၁။ ဗုဒ္ဓါနုဿတိ = ဘုရား၏ ပုံသဏ္ဌာန်တော်နှင့် ဂုဏ်တော်များကို အဖန်ဖန်အောက်မေ့ ဆင်ခြင်မူ။

၂။ ဓမ္မာနုဿတိ = ပိဋကတရား၊ မဂ်ဖိုလ်နိဗ္ဗာန် တရားများ၏ ဂုဏ်တော်ကို အဖန်ဖန်အောက်မေ့ ဆင်ခြင်မူ။

၃။ သံဃာနုဿတိ = အရိယာသံဃာတော်များ၏ ဂုဏ်တော်ကို အဖန်ဖန်အောက်မေ့ ဆင်ခြင်မူ။
၎။ သီလာနုဿတိ = မိမိစောင့်ထိန်းထားသော သီလ၏ ဂုဏ်တော်များနှင့် မကျိုးမပေါက် မပြောက် မကျားပုံတို့ကို အဖန်ဖန်အောက်မေ့ ဆင်ခြင်မူ။
၅။ စာဂါနုဿတိ = ရက်ရက်ရောရော မိမိစွန့်ကြဲလှူဒါန်းအပ်သော အလှူဒါန၏ ဂုဏ်တော်ကို အဖန်ဖန်အောက်မေ့ ဆင်ခြင်မူ။

၆။ ဒေ၀တာနုဿတိ = နတ် ဗြဟ္မာများကို သက်သေပြု၍ မိမိ ကုသိုလ်ကောင်းမူများကို အဖန်ဖန်အောက်မေ့ ဆင်ခြင်မူ။

(သဒ္ဒါ၊ သတိ၊ ၀ိရိယ၊ သုတ၊ ပညာ၊ ဟိရီ၊ သြတ္တပ္ပ ဟူသော သူတော်ကောင်းတရားတို့နှင့် ပြည့်စုံသူများသည် သေလွန်ကြသည့်အခါ နတ်ဗြဟ္မာများ ဖြစ်ကြရ၏။ ငါ့တွင်လည်း ထိုတရားများရှိပေ၏ဟု မိမိ၏ ကုသိုလ်တရားတို့ကို အောက်မေ့ကာအားရနေမူ)

၇။ ဥပသမာနုဿတိ = နိဗ္ဗာန်၏ ဂုဏ်ကျေးဇူးများကို အဖန်ဖန်အောက်မေ့ ဆင်ခြင်မူ။

၈။ မရဏာနုဿတိ = မိမိ၏သေခြင်းသဘောကို အဖန်ဖန် တွေးတော အောက်မေ့ ဆင်ခြင်မူ။

၉။ ကာယဂတာသတိ = ဆံပင်၊ မွေးညင်း စသည့် ၃၂ ကောဋ္ဌာသကို ထင်မြင်အောင် အဖန်ဖန်ကြည့်ရူအောက်မေ့ ဆင်ခြင်မူ။

၁၀။ အာနာပါနဿတိ = ထွက်သက်ဝင်သက်ကို အောက်မေ့ဆင်ခြင်သော သတိတရား။

အာဟာရေ ပဋိကူလသညာ၊ စတုဓာတု၀၀တ္ထာန်နှင့် အရုပ္ပ ၄-ပါး

အာဟာရေ ပဋိကူလသညာ
စားသောက်မျိုသွင်းအပ်သော ခဲဖွယ်ဘောဇဉ်စသည့် အစာအာဟာရတို့၌ စက်ဆုပ်ဖွယ်ဟု ထင်မြင်လာအောင် အောက်မေ့ဆင်ခြင်ရူမှတ်တတ်သော သညာကို `အာဟာရေ ပဋိကူလသညာ´ဟု ခေါ်၏။

စတုဓာတု၀၀တ္ထာန်
ခန္ဓာကိုယ်၌ ပထ၀ီ၊ အာပေါ၊ တေဇော၊ ၀ါယော ဟူသည့် ဓာတ်ကြီး ၄-ပါးကို ပိုင်းခြားတတ်သော ဉာဏ်သည် `စတုဓာတု၀၀တ္ထာန်´ ဖြစ်၏။
အရုပ္ပ ၄-ပါး
အာကာသာနဉ္စာယတနဈာန်၊ ၀ိညာဏဉ္စာယတနဈာန်၊ အာကိဉ္စညာယတနဈာန်၊ နေ၀သညာ နာသညာယတနဈာန်တို့ ဖြစ်ပွားရန်ရူပွားရသော ကမ္မဋ္ဌာန်း ၄-ပါးကို `အာရုပ္ပ ၄-ပါး´ဟုခေါ်၏။

စရိုက် ၆-ပါး
ပင်ကိုရိုးရာ သူတကာဖြစ်နေကျထက် လွန်ကဲပိုမို၍ အဖြစ်များသည့် အမူအရာကို `စရိုက်´ဟုခေါ်၏။

ရာဂစရိုက်၊ ဒေါသစရိုက်၊ မောဟစရိုက်၊ သဒ္ဓါစရိုက်၊ ဗုဒ္ဓိ(ပညာ)စရိုက်နှင့် ၀ိတက်စရိုက်ဟူ၍ စရိုက် ၆-ပါးရှိ၏။

၁။ ရာဂစရိုက်ရှိသူသည် လောကီအာရုံကာမဂုဏ်များကို မရှက်မကြောက်လိုက်စား၏။

၂။ ဒေါသစရိုက်ရှိသူသည် နေရာတကာတွင် ရူးရူးရှဲရှဲ အမြဲစိတ်တို၏။
၃။ မောဟစရိုက်ရှိသူသည် ထိုင်းမိူင်းဖျင်းအပြီး အောက်ကျ နောက်ကျရှိ၏။
၎။ သဒ္ဓါစရိုက်ရှိသူသည် ရတနာမြတ်သုံးပါးကို လွန်စွာကြည်ညို၏။

၅။ ဗုဒ္ဓိစရိုက်(၀ါ)ပညာစရိုက်ရှိသူသည် ထက်မြက်သော ဉာဏ်ပညာဖြင့် အရာရာတွင် စဉ်းစား ဆင်ခြင်လေ့ရှိ၏။ သူများပြောတိုင်း မယုံချေ။

၆။ ၀ိတက်စရိုက်ရှိသူသည် အကြံအစည်များပြီး အလုပ်မတွင်ကျယ်ဘဲ ရှိတတ်၏။

သပ္ပါယဘေဒ
စရိုက်နှင့် ကမ္မဋ္ဌာန်းကို သင့်တင့်လျောက်ပတ်အောင် တွဲစပ်သော အခန်းကို `သပ္ပါယဘေဒ´ဟု ခေါ်၏။

၁။ ရာဂစရိုက်ရှိသူသည် အသုဘ ၁၀-ပါးနှင့် ကာယဂတာသတိဟူသော ကမ္မဋ္ဌာန်း ၁၁-ပါးတို့နှင့် လျောက်ပတ်၏။ ဤကမ္မဋ္ဌာန်းတို့သည် ရာဂမီးကို ငြိမ်းအေးစေနိုင်၏။

၂။ ဒေါသစရိုက်ရှိသူသည် မေတ္တာ, ကရုဏာ, မုဒိတာ, ဥပေက္ခာဟူသော အပ္ပမညာ ၄-ပါး၊ နီလ, ပီတ, လောဟိတ, သြဒါတ ဟူသော ကသိုဏ်း ၄-ပါး၊ ပေါင်း ၈-ပါသော ကမ္မဋ္ဌာန်းတို့နှင့် လျောက်ပတ်၏။ ဤကမ္မဋ္ဌာန်းတို့သည် သန့်ရှင်းကြည်လင်ကြသဖြင့် အာရုံပြုသူတို့အား စိတ်ရွှင်လန်းဝမ်းမြောက်စေ၏။
၃။ မောဟစရိုက်နှင့် ၀ိတက်စရိုက်ရှိသူတို့သည် အာနာပါနသတိ ကမ္မဋ္ဌာန်းနှင့် သင့်လျော်လျောက်ပတ်၏။ မောဟစရိုက်ရှိသူသည် ၀ိစိကိစ္ဆာနှင့် ဥဒ္ဓစ္စတို့ အယှဉ်များသဖြင့် စိတ်ပျံ့လွင့် တုန်လူပ်၏။။ ၀ိတက်စရိုက်ရှိသူသည်လည်း စိတ်ကူးအကြံအစည်များသဖြင့် စိတ်ပျံ့လွင့်၏။ အာနာပါနဿတိ ကမ္မဋ္ဌာန်းကား ထွက်သက်နှင့် ၀င်သက်တို့ကို အချက်ကျကျ လိုက်၍ ရူမှတ်ရသဖြင့် တုန်လူပ်ပျံ့လွင့်သည် စိတ်ကို ချုပ်ထိန်း ဖမ်းဆွဲထားနိုင်၏။
၎။ သဒ္ဓါစရိုက်ရှိသူသည် ဗုဒ္ဓါနုဿတိ, ဓမ္မာနုဿတိ, သံဃာနုဿတိ, သီလာနုဿတိ, စာဂါနုဿတိ, ဒေ၀တာနုဿတိ ဟူသော ကမ္မဋ္ဌာန်း ၆-ပါးတို့နှင့် သင့်လျော်၏။ ပင်ကိုကကောင်းနေသော သဒ္ဒါတရားသည် ဘုရားတရားသံဃာစသည့် အာရုံများနှင့် ကြုံတွေ့လျှင် ပို၍ ဖွံ့ဖြိုးတိုးတက်လာဖွယ်ရာရှိ၏။ ထို့ကြောင့် အကျိုးများ၏။

၅။ ပညာစရိုက်ရှိသူသည် သိမ်မွေ့နက်နဲသော မရဏာနုဿတိ, ဥပသမာနုဿတိ၊ အာဟာရေပဋိကူလသညာ, စတုဓာတု၀၀တ္ထာန်ဟူသော ကမ္မဋ္ဌာန်း ၄-ပါးနှင့် သင့်လျော်လျောက်ပတ်၏။ ပင်ကိုက စဉ်းစားချင့်ချိန်လေ့ရှိသူသည် သိမ်မွေ့နက်နဲသော အာရုံနှင့် ကြုံတွေ့လျှင် ပို၍ နက်နက်နဲနဲ စဉ်းစား ဆင်ခြင်သဖြင့် ဉာဏ်ပညာတိုးပွားထက်မြက်လာဖွယ်ရာ ရှိ၏။

၆။ အများနှင့်ဆိုင်သော ကမ္မဋ္ဌာန်းတို့ကား ပထ၀ီကသိုဏ်း၊ အာပေါကသိုဏ်း၊ တေဇောကသိုဏ်း၊ ၀ါယောကသိုဏ်း၊ အာကာသကသိုဏ်း၊ အာလောကကသိုဏ်းနှင့် အာရုပ္ပ ၄-ပါးတို့ ဖြစ်ကြ၏။

ဘာဝနာဘေဒ
ကမ္မဋ္ဌာန်း ၄၀တို့ကို ဘာဝနာ အမျိုးအစားအားဖြင့် ခွဲပြရာ ကဏ္ဍကို ဘာဝနာဘေဒဟု ခေါ်၏။

၁။ ပရိကမ္မဘာဝနာ = ကသိုဏ်းဝန်းစသည့် ကမ္မဋ္ဌာန်းကို အာရုံပြု၍ `ပထ၀ီ-ပထ၀ီ´ စသည်ဖြင့် ရွတ်ဆို၍ လည်းကောင်း၊ စိတ်ဖြင့်မှန်းဆ၍ လည်းကောင်း၊ ရှေးဦးစွာ ပွားများမူကို ပရိကမ္မဘာဝနာဟု ခေါ်၏။ ဤဘာဝနာသည် အထက် အထက်သော ဘာဝနာတို့ဖြစ်ပွားရန် ပြုပေးတတ်၏။
၂။ ဥပစာရဘာဝနာ = ဈာန်, မဂ်, ဖိုလ် တရားတည်းဟူသော အပနာဘာဝနာ၏ အနီးအပါးဖြစ်သည့် ဘာဝနာပွားများမူကို ဥပစာရဘာဝနာဟု ခေါ်၏။ ပရိကမ္မဘာဝနာသည်ပင် တဖြည်းဖြည်း ရင့်သန်လာသည့်အခါ ဥပစာရဘာဝနာဟု အမည် ရ၏။
၃။ အပ္ပနာဘာဝနာ = ဆိုင်ရာအာရုံ၌ စွဲမြဲစွာ သက်ဝင်တည်နေသော ဈာန်, မဂ်, ဖိုလ် တရားများကို အပ္ပနာဘာဝနာဟု ခေါ်၏။ ဥပစာရဘာဝနာထက် လွန်ကဲ၍ အာရုံ၌ စွဲမြဲစွာ သက်ဝင်တည်နေသော ဘာဝနာသည် အပ္ပနာဘာဝနာ ဖြစ်၏။

ဘာဝနာ၊ ဈာန်တို့ဖြင့် ကမ္မဋ္ဌာန်းများကို ဝေဖန်ပုံ

ဘာဝနာဖြင့် ကမ္မဋ္ဌာန်းများကို ဝေဖန်ပုံ
၁။ ဘာဝနာ = ပရိကမ္မဘာဝနာ
ကမ္မဋ္ဌာန်း = ကမ္မဋ္ဌာန်းအားလုံး
ပေါင်း = ၄၀

၂။ ဘာဝနာ = ပရိကမ္မဘာဝနာနှင့် ဥပစာရဘာဝနာ
ကမ္မဋ္ဌာန်း = ဗုဒ္ဓါနုဿတိမှ မရဏနုဿတိအထိ ၈-ပါး၊ အာဟာရေပဋိကူလသညာ၊ စတုဓာတု၀၀တ္ထာန်။
ပေါင်း = ၁၀
၃။ ဘာဝနာ = အပ္ပနာဘာဝနာအထိ ဘာဝနာ ၃-ပါးစလုံး

ကမ္မဋ္ဌာန်း = ကသိုဏ်း ၁၀-ပါး၊ အသုဘ ၁၀-ပါး၊ အပ္ပမညာ ၄-ပါး အာရုပ္ပ ၄-ပါး၊ ကာယဂတာသတိ၊ အာနာပါနဿတိ
ပေါင်း = ၃၀

ဈာန်တို့ဖြင့် ကမ္မဋ္ဌာန်းများကို ဝေဖန်ပုံ
၁။ ကမ္မဋ္ဌာန်း = ကသိုဏ်း ၁၀-ပါး၊ အာနာပါနဿတိ
ပေါင်း = ၁၁
ရနိုင်သောဈာန် = ရူပါဝစရဈာန် ၅-ပါးစလုံး

၂။ ကမ္မဋ္ဌာန်း = အသုဘ ၁၀-ပါး၊ ကာယဂတာသတိ
ပေါင်း = ၁၁
ရနိုင်သောဈာန် = ရူပ ပထမ ဈာန် ၁-ပါး

၃။ ကမ္မဋ္ဌာန်း = မေတ္တာ၊ ကရုဏာ၊ မုဒိတာ
ပေါင်း = ၃
ရနိုင်သောဈာန် = ပ-ဒု-တ စရူပဈာန် ၄-ပါး

၎။ ကမ္မဋ္ဌာန်း = ဥပေက္ခာ ၁-ပါး
ပေါင်း = ၁
ရနိုင်သောဈာန် = ရူပါဝစရပဉ္စမဈာန် ၁-ပါး

၅။ ကမ္မဋ္ဌာန်း = အာရုပ္ပ ၄-ပါး
ပေါင်း = ၄
ရနိုင်သောဈာန် = အရူပဈာန် ၄-ပါး

ထို့ကြောင့်
၁။ ပထမဈာန်၏ အာရုံကမ္မဋ္ဌာန်းများ (၀ါ) ပထမဈာန်ကို ဖြစ်စေနိုင်သော ကမ္မဋ္ဌာန်းများ = ၂၅-ပါး (နံပါတ်စဉ် - ၁ + ၂ + ၃ အရ)

၂။ ဒုတိယ တတိယ စတုတ္ထဈာန်တို့၏ အာရုံကမ္မဋ္ဌာန်းများ = ၁၄-ပါး (နံပါတ်စဉ် - ၁ + ၃ အရ)

၃။ ပဉ္စဈာန်၏ အာရုံ ကမ္မဋ္ဌာန်းများ = ၁၂-ပါး (နံပါတ်စဉ် ၁ + ၄ အရ)

၎။ အရူပဈာန်တို့၏ အာရုံကမ္မဋ္ဌာန်းများ = အာရုပ္ပ ၄-ပါး။

၅။ ဗုဒ္ဓါနုဿတိမှ မရဏနုဿတိအထိ ရှေ့အနုဿတိ ၈-ပါး၊ အာဟာရေပဋိကူလသညာနှင့် စတုဓာတုဝတတ္ထာန်ဟူသော ကမ္မဋ္ဌာန်း ၁၀-ပါးတို့သည် မည်သည့်ဈာန်ကိုမျှ မဖြစ်စေနိုင်ကြပါ။

ဂေါစရဘေဒ
နိမိတ်အာရုံကို အခြေခံ၍ ကမ္မဋ္ဌာန်းများကို ခွဲခြားဝေဖန်မူကို ဂေါစရဘေဒ ဟုခေါ်၏။

၁။ ပရိကမ္မနိမိတ် = ပရိကမ္မဘာဝနာ၏ အာရုံ၊ ကမ္မဋ္ဌာန်းစ၍ စီးဖြန်းသောအခါ အာရုံပြုအပ်သော ပထ၀ီကသိုဏ်းဝန်းစသည့် အာရုံကို ပရိကမ္မနိမိတ်ဟု ခေါ်၏။

၂။ ဥဂ္ဂဟနိမိတ် = မျက်စိဖြင့် တိုက်ရိုက်မကြည့်တော့ဘဲ စိတ်ဖြင့်မှန်း၍ယူနိုင်သော ပရိကမ္မနိမိတ်ကို ဥဂ္ဂဟနိမိတ်ဟုခေါ်၏။
ကမ္မဋ္ဌာန်းစီးဖြန်းစအခါ၌ ကသိုဏ်းဝန်းစသည်တို့ကို တိုက်ရိုက် ကြည့်ရူရသဖြင့် မြင်ရသောအာရုံသည် ပရိကမ္မနိမိတ်ဖြစ်၏။ ထိုနိမိတ်သည် ရူမှတ်ဖန်များသောအခါ၌ စိတ်ထဲဝယ် စွဲမြဲလာသဖြင့် မျက်စိကို ပိတ်လိုက်လျှင်ဖြစ်စေ၊ မျက်နှာလွှဲလိုက်လျှင်ဖြစ်စေ ပကတိ မြင်ရသကဲ့သို့ပင် ထင်ထင်ရှားရှားထင်ပေါ်နေ၏။ ဤသို့ ထင်ပေါ်လာသော နိမိတ်သည် ဥဂ္ဂဟနိမိတ် ဖြစ်၏။
၃။ ပဋိဘာဂနိမိတ် = ဥဂ္ဂဟနိမိတ်ကို ဆက်လက်၍ ကမ္မဋ္ဌာန်း ရူမှတ်ဖန်များလာသောအခါ ထိုနိမိတ်သည် ကြေးမုံအိမ်မှ ကြည်လင်သည့် ကြေးမုံချပ်ကို ထုတ်ယူလိုက်သကဲ့သို့ အလွန် သန့်စင်ကြည်လင်လာ၏။ ဤနိမိတ်သည် မူလစီစဉ်ခဲ့သော ကသိုဏ်းဝန်းစသည်နှင့် တူစွာ စိတ်ထဲ၌ ထင်ပေါ်လာသော အာရုံဖြစ်၏။ သို့သော် ပရိကမ္မနိမိတ်ထက် အဆပေါင်းများစွာ ကြည်လင်တောက်ပနေပြီး အပြစ်အနာအဆာ ကင်းစင်နေ၏။ ငြိမ်သက်၏။ ဤနိမိတ်ကို ပဋိဘာဂနိမိတ်ဟု ခေါ်၏။

နိမိတ်နှင့် ကမ္မဋ္ဌာန်းတွဲစပ်ပုံ

၁။ ကမ္မဋ္ဌာန်း = ကမ္မဋ္ဌာန်းအားလုံး
ပေါင်း = ၄၀
ရနိုင်သောနိမိတ် = ပရိကမ္မနိမိတ်နှင့် ဥဂ္ဂဟနိမိတ် (အချို့ကမ္မဋ္ဌာန်းတို့၌ ခွဲခြား၍ မရ။)

၂။ ကမ္မဋ္ဌာန်း = ကသိုဏ်း ၁၀-ပါး၊ အသုဘ ၁၀-ပါး၊ ကာယဂတာသတိ၊ အာနာပါနဿတိ
ပေါင်း = ၂၂
ရနိုင်သောနိမိတ် = ပရိကမ္မနိမိတ်နှင့် ဥဂ္ဂဟနိမိတ်တို့ကို ခွဲခြား၍ ရကောင်း၏။ ပဋိဘောဂနိမိတ်ကိုပါ ရကောင်း၏။
၃။ ကမ္မဋ္ဌာန်း = ရှေ့အနုဿတိ ၈-ပါး၊ အပ္ပမညာ ၄-ပါး၊ အာရုပ္ပ ၄-ပါး၊ အာဟာရေပဋိကူလသညာ၊ စတုဓာတု၀၀တ္ထာန်

ပေါင်း = ၁၈
ရနိုင်သောနိမိတ် = ပရိကမ္မနိမိတ်နှင့် ဥဂ္ဂဟနိမိတ် ၂-ပါးကို ပရိယာယ်ဖြင့် ရကောင်း၏။ ပဋိဘာဂနိမိတ်ကို မရနိုင်။

ဘာဝနာနှင့် နိမိတ်တွဲစပ်ပုံ
ပရိကမ္မဘာဝနာသည် ပရိကမ္မနိမိတ်နှင့် ဥဂ္ဂဟနိမိတ်တို့ကို အာရုံပြု၏။ ဥပစာရဘာဝနာနှင့် အပ္ပနာဘာဝနာတို့သည် ပဋိဘာဂနိမိတ်ကို အာရုံပြုကြ၏။

၁။ ပရိကမ္မနိမိတ်နှင့် ပရိကမ္မဘာဝနာ = တစ်ထွာလက်လေးသစ်ခန့်ရှိသော ပထ၀ီကသိုဏ်းဝန်းကို မျက်စိပကတိ အနေထားဖြင့် ကြည့်ရူ၍ `ပထ၀ီ-ပထ၀ီ´ သို့မဟုတ် `မြေ-မြေ´ဟု နူတ်ကရွတ်ဆို၍ဖြစ်စေ၊ မရွတ်ဆိုဘဲ စိတ်ဖြင့်ရူမှတ်၍ဖြစ်စေ အဖန်ဖန်ပွားများအပ်၏။ ရံခါ မျက်စိကို မှိတ်၍ ကသိုဏ်းဝန်းအာရုံကို မှန်းဆ၍ ပွားများအပ်၏။ ဤသို့ ယူအပ်သော အာရုံကို `ပရိကမ္မနိမိတ်´ဟုခေါ်ပြီး ရူမှတ်ပွားများမူကို `ပရိကမ္မဘာဝနာ´ဟုခေါ်၏။
၂။ ဥဂ္ဂဟနိမိတ်နှင့် ပရိကမ္မဘာဝနာ = ပရိကမ္မနိမိတ်ကို ရူမှတ်ဖန်များသည့်အခါ ထိုနိမိတ်သည် မျက်စိကိုမှိတ်ထားလျှင်လည်း မျက်စိဖြင့် တိုက်ရိုက်မြင်နေရသကဲ့သို့ စိတ်ထဲ၌ ထင်ထင်ရှားရှားထင်ပေါ်လာ၏။ ဤသို့စိတ်ဖြင့်ကောင်းစွာ ယူမိသောအာရုံကို `ဥဂ္ဂဟနိမိတ်´ဟု ခေါ်၏။ ဤနိမိတ်ကို ပွားများသော ဘာဝနာသည် ရှေးကထက် သမာဓိရင့်ကျက် တည်ကြည်လာသော်လည်း `ပရိကမ္မဘာဝနာ´ဟုပင် ခေါ်ဆိုရ၏။
၃။ ပဋိဘာဂနိမိတ်နှင့် ဥပစာရဘာဝနာ = ဥဂ္ဂဟနိမိတ်ကို ပရိကမ္မဘာဝနာဖြင့် ဆက်လက်ပွားများပြန်သောအခါ တစ်ချိန်၌ ထို ဥဂ္ဂဟနိမိတ်နှင့် ပုံသဏ္ဌာန်အရွယ်တူသော အာရုံတစ်မျိုးသည် စိတ်၌ ငြိမ်သက်စွာ တည်လာ၏။ စိတ်ထဲ၌ ကောင်းစွာ သွင်းထားအပ် သကဲ့သို့ တည်ငြိမ်နေ၏။ မပျောက်မပျက် ကွက်ကွက်ကွင်းကွင်း ထင်ပေါ်နေ၏။ ဤကား ပဋိဘာဂနိမိတ်တည်း။ ပဋိဘာဂ နိမိတ်ပေါ်လာသည့် အချိန်မှစ၍ ဘာဝနာ စ်ိတ်အစဉ်သည် ပရိကမ္မဘာဝနာ အဆင့်ကို လွန်၍ ဥပစာရဘာဝနာအဆင့်သို့ ရောက်လေပြီ။

ဥပစာရဘာဝနာ ဖြစ်ပေါ်လာသည့်အခါ နီဝရဏများ ကင်းကွာ၍ ဈာန်အင်္ဂါ ၅-ပါးတို့သည် မိမိတို့၏ ဆိုင်ရာကိစ္စများကို အထင်အရှား ဆောင်ရွက်ကြလေပြီ။ သို့အတွက် ဥပစာရဘာဝနာကို `ဥပစာရဈာန်´ဟုလည်း ခေါ်၏။

၎။ ပဋိဘာဂနိမိတ်နှင့် အပ္ပနာဘာဝနာ = ပဋိဘာဂနိမိတ်ကို အာရုံပြု၍ ဆက်လက်အားထုတ်သည့်အခါ ဉာဏ်ပညာ ထက်မြက်သူဖြစ်လျှင် မကြာမတင်ပင် `အပ္ပနာဘာဝနာ´ဟုခေါ်သော ရူပါဝစရဈာန် ဖြစ်ပ်ါလာ၏။ ဉာဏ်ပညာ မထက်မြက်သူတို့လည်း ရအပ်ပြိးသော ပဋိဘာဂနိမိတ်ကို မပျောက်မပျက်အောင် အထူးစောင့်ရှောက်၍ အဆက်မပြတ် ပွားများအားထုတ်လျှင် `အပ္ပနာဘာဝနာ´သို့ အနှေးနှင့်အမြန် ရောက်ရှိနိုင်၏။

ပထမအကြိမ် အပ္ပနာဘာဝနာသို့ ရောက်သော ယောဂီသည် ရူပါဝစရ ပထမဈာန်ကို ရလေပြီ။ (အထက်ပါ ၁ မှ ၄ အထိ စကားစဉ်သည် ပထမဈာန်ကို ရအောင် အားထုတ်မူပင်တည်း။)

ဒုတိယဈာန် စသည်တက်ပုံ
ရူပါဝစရ ပထမဈာန်ရပြီးသော ယောဂီသည် ထိုဈာန်ကို ၅-တန်သော ၀သိဘော်တို့ဖြင့် အစွမ်းထက်မြက်အောင် လေ့ကျင့်ရ၏။

၁။ အာဝဇ္ဇန၀သိဘော် = ဈာန်အင်္ဂါများကို လျင်မြန်စွာ ဆင်ခြင်နိုင်သော စွမ်းရည်။

၂။ သမာပဇ္ဇန၀သိဘော် = လျင်မြန်စွာ ဈာန်ဝင်စားနိုင်သော စွမ်းရည်။

၃။ အဓိဋ္ဌာန၀သိဘော် = ဘ၀င်စိတ်ကို လွှမ်းမိုး၍ ဈာန်စိတ်အစဉ်ကို အလိုရှိသမျှ ထိန်းထားနိုင်သော စွမ်းရည်။
၎။ ၀ုဋ္ဌာန၀သိဘော် = ရည်မှန်းထားသော ကာလအပိုင်းအခြားကို မကျော်လွန်စေဘဲ ဈာန်မှထနိုင်သော စွမ်းရည်။
၅။ ပစ္စဝေက္ခဏ၀သိဘော် = ဈာန်အင်္ဂါဆင်ခြင်သော ၀ီထိတို့ကို ဘ၀င်များစွာ မခြားစေဘဲ ဆင်ခြင်နိုင်သော စွမ်းရည်။

ပထမဈာန်၌ ၀သိဘော် နိုင်လာသောအခါ ထိုဈာန်၏ အင်္ဂါများအနက် ၀ိတက်သည် ရုန့်ရင်းကြမ်းတမ်းသည်ဟု ထင်မြင်လာ၏။ ၀ိတက်သည် ကာမဂုဏ်အာရုံသို့ စိတ်ကိုတင်ပေးတတ်သဖြင့် ကာမစ္ဆန္ဒနီဝရဏဟူသော ရန်သူကို ဖိတ်ခေါ်နေသကဲ့သို့ ရှိ၏။ ၀ိတက်မပါသော ဒုတိယဈာန်သည် ပိုငြိမ်သက်၏။

ဤသို့ ၀ိတက်ကို စက်ဆုပ်၍ ၀ိတက်ကို ပယ်စွန့်ပြီး ဒုတိယဈာန်သို့ တက်လှမ်းနိုင်အောင် ရည်မှန်းကာ ရရှိထားပြီးသော ပဋိဘာဂနိမိတ်ကိုပင် အာရုံပြုလျက် ဘာဝနာသုံးပါးကို အစဉ်အတိုင်း ဖြစ်ပေါ်စေ၏။ ၀ိတက်ကို စက်ဆုပ်ခြင်းသဘောပါသော ဤဘာဝနာအစဉ်သည် `၀ိတက္က၀ိရာဂဘာဝနာ´ဟု အမည်ရ၏။

ပဋိဘာဂနိမိတ်ကို ပရိကမ္မဘာဝနာဖြင့် ပြန်လည်ပွားများရာ၌ ၀ိတက်အပေါ် တပ်မက်တွယ်တာနေသည့် နိကန္တိတဏှာ ကောင်းစွာကင်းကွာသွားသည့်အခါ ဒုတိယဈာန်၏ အနီးဥပစာဖြစ်သော ဥပစာရဘာဝနာသို့ ရောက်၏။ ထို့နောက်ဆက်၍ အားထုတ်သော် ၀ိတက်မပါဘဲ ယခင်ပထမဈာန်တုန်းကထက် ပိုမိုသိမ်မွေ့ထက်မြက်သည့် ဈာန်အင်္ဂါ ၄-ပါးနှင့် ပြည့်စုံသော ဒုတိယဈာန်ခေါ် အပ္ပနာဘာဝနာသို့ ရောက်၏။

ထို့နည်းအတူ ၀ိစာရကို ပယ်စွန့်၍ တတိယဈာန်သို့ လည်းကောင်း၊ ပီတိကို ပယ်စွန့်၍ စတုတ္ထဈာန်သို့ လည်းကောင်း၊ သုခကို လျစ်လျူရူ၍ ပဉ္စမဈာန်သို့ လည်းကောင်း အဆင့်ဆင့် တက်လှမ်းနိုင်ပါသည်။

အရူပ္ပဈာန်တက်ခန်း
ရူပါဝစရ ပဉ္စမဈာန်ကို အခြေခံ၍ အာရုပ္ပဈာန်သို့ တက်လှမ်းရ၏။ ပဉ္စမဈာန်ကို ၀သိဘော်နိုင်အောင် လေ့ကျင့်ပြီးလျှင် ရုပ်ခန္ဓာအပေါ် အပြစ်မြင်၍ အာကာသာနဉ္စာယတနဈာန် (ပထမရုပ္ပဈာန်)သည် သိမ်မွေ့ငြိမ်သက်လှ၏ဟု ယုံကြည်ရန်လို၏။ ထို့နောက် အာကာသကသိုဏ်းမှ အပဖြစ်သော ကျန်ကသိုဏ်း ၉-ပါးတို့တွင် တစ်ပါးပါးကို ဘာဝနာဖြင့်ပယ်ခွာ၍ ရအပ်သည့် ကောင်းကင်ပညတ်ကို အာရုံပြုလျက် ရူပ၀ိရာဂဘာဝနာကို ဘာဝနာစဉ်အတိုင်း ပွားများအားထုတ်ရ၏။
ပွားများအားထုတ်ပုံမှာ ကသိုဏ်းဝန်း၏ ပဋိဘာဂနိမိတ်ကို မိမိအလိုရှိသော အတိုင်းအတာအထိ ဖြန့်ကျက်ထားပြီးလျှင် ထိုကသိုဏ်းဝန်းကို အာရုံမပြုတော့ဘဲ ထိုကသိုဏ်းဝန်းပျံ့နှံ့ရာ အရပ်ကို `အနန္တောအာကာသော = ကောင်းကင်ပညတ်သည် ဥပါဒ် - ဘင်အားဖြင့် အဆုံးအပိုင်းအခြားမရှိ´ဟု နှလုံးသွင်းဆင်ခြင်ရ၏။ ဤသို့ဆင်ခြင်မူကို ပရိကမ်ပြုသည်ဟု ခေါ်၏။
ဤသို့ဆင်ခြင်ရူမှတ်ဖန်များသော် ထမင်းအိုးဝ၌ ဖုံးအုပ်ထားသော အ၀တ်ကို ဆွဲဖွင့်လိုက်သည့်အခါ အ၀တ်ကွယ်ပျောက်၍ အိုးဝဟင်းလင်းပေါ်ပေါက်လာသကဲ့သို့ ထို့အတူကသိုဏ်းနိမိတ်ကွယ်ပျောက်၍ ထိုနိမိတ်ပျံ့နှံ့ခဲ့ရာ အရပ်တို့၌ ဟင်းလင်းပြင် (၀ါ) ကောင်းကင်ပညတ်ထင်လာ၏။

ထိုကောင်းကင် ပညတ်ကို ပရိကမ္မဘာဝနာဖြင့် ဆက်လက်ရူမှတ်၍ ရူပပဉ္စမဈာန်အပေါ်၌ နှစ်သက်မူ နိကန္တိတဏှာကင်းကွာသွားသောအခါ ဥပစာရဘာဝနာအဆင့်သို့ ရောက်၏။ ထိုကောင်းကင် ပညတ်ကိုပင် ဆက်လက်အာရုံပြု၍ တိုးတက်ကာ အားထုတ်လျှင် အာကာသာနဉ္စာယတနဈာန် အပ္ပနာသို့ ရောက်၏။

ထို့နောက် ဒုတိယာရုပ္ပခေါ် ၀ိညာဏဉ္စာယတနဈာန်ကို အလိုရှိသော် ပထမအာရုပ္ပ၀ိညာဏ်ကိုအာရုံပြု၍ `၀ိညာဏအနန္တ - ပထမာရုပ္ပ၀ိညာဏ်သည် အဆုံး အပိုင်းအခြားမရှိ´ဟု ပရိကမ်ပြုရ၏။ ပထမာရုပ္ပဈာန်၌ နိကန္တိတဏှာ ကင်းကွာသွားသောအခါ ဥပစာရဘာဝနာသို့ ရောက်၏။

ထို့နောက်တစ်ဖန် ပထမာရုပ္ပ၀ိညာဏ်၏ မရှိခြင်းဟူသော နတ္ထိဘောပညတ်ကို အာရုံပြု၍ တတိယာရုပ္ပဈာန် အပ္ပနာသို့ လည်းကောင်း၊ တတိယာရုပ္ပ၀ိညာဏ်ကို အာရုံပြု၍ စတုတ္ထာရုပ္ပဈာန် အပ္ပနာသို့ လည်းကောင်း တက်လှမ်းနိုင်ပါသည်။
အဘိညာဉ်ခန်း
အလွန်အကျူးအထူးသိတတ်သော ရူပပဉ္စမဈာန်နှင့် ယှဉ်သည့်ဉာဏ်ကို `အဘိညာ´ဟု ခေါ်သည်။

ရူပါဝစရ ပဉ္စမဈာန်ကို အခြေခံ၍ လောကီအဘိညာဉ် ၅-ပါး သို့မဟုတ် ၇-ပါးကိုရအောင် အားထုတ်နိုင်၏။

၁။ ဣဒ္ဓိဝိဓအဘိညာဉ် = တန်ခိုးအမျိုးမျိုးကို ဖန်ဆင်းနိုင်သော အဘိညာဉ်။

၂။ ဒိဗ္ဗစက္ခုအဘိညာဉ် = နတ်မျက်စိကဲ့သို့ မြင်နိုင်သော အဘိညာဉ်။

၃။ ဒိဗ္ဗသောတအဘိညာဉ် = နတ်နားကဲ့သို့ ကြားနိုင်သော အဘိညာဉ်။
၎။ ပရစိတ္တ၀ိဇာနန အဘိညာဉ် = သူတစ်ပါး၏ စိတ်အကြံကို သိနိုင်သော အဘိညာဏ်။
၅။ ပုဗ္ဗေနိဝါသာနုဿတိအဘိညာဉ် = ရှေးရှေးဘ၀များကို ပြန်ပြောင်း၍ အောက်မေ့နိုင်သော အဘိညာဉ်။

၆။ ယထာကမ္မူပဂအဘိညာဉ် = ကံအားလျော်စွာ ထိုထိုဘုံများ၌ဖြစ်ရသော သတ္တ၀ါများကို မြင်နိုင်သည့် အဘိညာဉ်။

၇။ အနာဂတံတအဘိညာဉ် = နောင်အနာဂတ် ကာလ၌ ဖြစ်လတ္တံ့သော အကြောင်းအရာများကို သိနိုင်သည့် အဘိညာဉ်။

အဘိညာဉ် ၅-ပါးကို ရေတွက်သည့်အခါ အမှတ် ၆ နှင့် ၇ အဘိညာဉ် ၂-ပါးကို ဒိဗ္ဗစက္ခု အဘိညာဉ်၌ သွင်း၍ ရေတွက်ရ၏။

`အဘိညာဉ် ၆-ပါးဟု ရေတွက်သည့်အခါ အမှတ် ၁ မှ ၅ အထိ အဘိညာဉ် ၅-ပါးကို ဖော်ပြပြီးနောက် လောကုတ္တရာ အဘိညာဉ်ဖြစ်သည့် အာသ၀က္ခယအဘိညာဉ်ကို ထည့်ပေါင်းရ၏။

၈။ အာသ၀က္ခယအဘိညာဉ် = အာသဝေါတရား ၄-ပါးတို့ကို ကုန်ခန်းစေနိုင်သော အရဟတ္တမဂ်ဉာဏ်။

အခန်း(၈) ပစ္စည်းပိုင်း -၂

ပဋ္ဌာန်းဒေသနာနည်း

ဟေတုပစ္စယော၊ အာရမ္မဏပစ္စယော၊ အဓိပတိပစ္စယော၊ အနန္တရပစ္စယော၊ သမနန္တရပစ္စယော၊ သဟဇာတပစ္စယော၊ အညမညပစ္စယော၊ နိဿယပစ္စယော၊ ဥပနိဿယပစ္စယော၊ ပုရေဇာတပစ္စယော၊ ပစ္ဆာဇာတပစ္စယော၊ အာသေ၀နပစ္စယော၊ ကမ္မပစ္စယော၊ ၀ိပါကပစ္စယော၊ အာဟာရပစ္စယော၊ ဣန္ဒြိယပစ္စယော၊ ဈာနပစ္စယော၊ မဂ္ဂပစ္စယော၊ သမ္ပယုတ္တပစ္စယော၊ ၀ိပ္ပယုတ္တပစ္စယော၊ အတ္ထိပစ္စယော၊ နတ္ထိပစ္စယော၊ ၀ိဂတပစ္စယော၊ အ၀ိဂတပစ္စယောတိ´ ဟူ၍ ရှေးဦးစွာ ပစ္စည်းတရား ၂၄-ပါးကိုဖော်ပြပြီးလျှင် ထို့နောက်၌ ပစ္စည်း ပစ္စယုပ္ပန်နှင့် ပစ္စယသတ္တိတို့ကို အကျယ်တ၀င့် ဟောကြားတော်မူ၏။
ပစ္စယ = ပစ္စည်း = အကြောင်းတရား

ပစ္စယုပ္ပန္န = ပစ္စယုပ္ပန် = အကျိုးတရား
ပစ္စယသတ္တိ = ပစ္စည်း တစ်မျိုးစီ၏ ကျေးဇူးပြုနိုင်သောသတ္တိ
ထို့ကြောင့် ပဋ္ဌာန်းနည်းသည် အကြောင်းအကျိုးဆက်သွယ်ပုံကိုသာမက ပစ္စယ သတ္တထူးကိုပါ ဖော်ပြသော နည်းဖြစ်၏။

၁။ ပစ္စယသတ္တိများ
ဗဟုသုတဖြစ်စိမ့်ငှာ ပစ္စည်း ၂၄-ပါးတို့၏ ပစ္စယသတ္တိများကို အကျဉ်း ဖော်ပြပါအံ့။

၁။ ဟေတု = ရေသောက်မြစ်သည် သစ်ပင်အားမြဲမြံခိုင်ခံ့သန်စွမ်းစွာ တည်စေခြင်းငှာ အကျိုးပြုသကဲ့သို့ ဟိတ် ၆-ပါးသည် သမ္ပယုတ်တရားတို့အား မြဲမြံခိုင်ခန့်သန်စွမ်းစွာ တည်နေအောင် ကျေးဇူးပြုကြ၏။

၂။ အာရမ္မဏ = ကြိုးတန်းနှင့် တောင်ဝှေးတို့သည် မစွမ်းသန်သော သူတို့အား ဆွဲတွယ်ထောက်တည်ရန်အလို့ငှာ ကျေးဇူးပြုသကဲ့သို့ အာရုံ ၆-ပါးတို့သည် စိတ်စေတသိက်တို့အား ဆွဲတွယ်ထောက်တည်ရာ အဖြစ်ဖြင့် ကျေးဇူးပြုကြ၏။

၃။ အဓိပတိ = စကြ၀တေးမင်းသည် အထွတ်အထိပ် အချုပ်အခြာအာဏာတန်ခိုးဖြင့် တစ်ပါးသူတို့၏ ကြီးစိုးခြင်းကိုတားမြစ်၍ နိုင်ငံသားအပေါင်းတို့အား မိမိအလိုသို့ လိုက်ပါစေကာ ရှေ့ဆောင် အကြီးအကဲအဖြစ်ဖြင့် ကျေးဇူးပြုသကဲ့သို့ အာရမ္မဏာ ဓိပတိပစ္စည်းနှင့် သဟဇာတာဓိပတိပစ္စည်းတို့သည် ပစ္စယုပ္ပန်တရားတို့အား မိမိအလိုသို့ လိုက်ပါစေ၍ ရှေ့ဆောင်ပြီး အကြီးအကဲအဖြစ်ဖြင့် ကျေးဇူးပြုမူကို အဓိပတပစ္စယသတ္တိဟု ခေါ်၏။

၎။ အနန္တရ = ဧကရာဇ်ဘုရင်၏ နတ်ရွာလားခြင်းသည် သားကြီးရတနာအား မင်းအဖြစ် ဘိသိက်ခံခြင်းငှာ ကျေးဇူးပြုသကဲ့သို့ ရှေးရှေးဖြစ်သော စိတ်စေတသိက်တို့သည် နောက်နောက် အခြားမဲ့ဖြစ်ကြသည့် စိတ်စေတသိက်တို့အား အနန္တရသတ္တိဖြင့် ကျေးဇူးပြုကြ၏။

၅။ သမနန္တရ = ဧကရာဇ်မင်း၏ အရည၀ါသီတောရပ်မှီ၍ ရဟန်းပြုခြင်းသည် သားကြီးရတနာအားမင်းဖြစ်ကို ရစေခြင်းငှာ ကျေးဇူးပြုသကဲ့သို့ ရှေ့ရှေ့ဖြစ်သော စိတ်စေတသိက်တို့သည် နောက်နောက် အခြားမဲ့ဖြစ်ကြသည့် စိတ် စေတသိက်တို့အား ကောင်းစွာ အခြားမရှိစေဘဲ ကျေးဇူးပြုကြကုန်၏။

၆။ သဟဇာတ = ဆီမီးသည် မိမိ တောက်သည်နှင့် တစ်ပြိုင်နက် အရောင်အလင်းကို အတူတကွ ဖြစ်စေသကဲ့သို့ အကြောင်းတရားတို့ ဖြစ်ပေါ်လာကြသည်နှင့်တစ်ပြိုင်နက် အကျိုးတရားတို့အား တစ်ပြိုင်နက် အတူတကွ ဖြစ်ပေါ်လာအောင် ကျေးဇူးပြုမူကို သဟဇာတပစ္စယသတ္တိဟုခေါ်၏။

၇။ အညမည = သစ်သားသုံးခွ တိဒဏ္ဍသည် အချင်းချင်း တစ်ချောင်းသည် တစ်ချောင်းအား ထောက်ပံ့ခိုင်စေခြင်းငှာ အပြန်အလှန် ကျေးဇူးပြုသကဲ့သို့ အချင်းချင်းအပြန်အလှန် ကျေးဇူးပြုမူကို အညမညပစ္စယသတ္တိဟုခေါ်၏။

၈။ နိဿယ = လှေနှင့်လူသည် အချင်းချင်းမှီရာ ဖြစ်သကဲ့သို့ လည်းကောင်း၊ မြေကြီးသည် သစ်ပင်များနှင့်သတ္တ၀ါတို့၏ မှီရာဖြစ်သကဲ့သို့ လည်းကောင်း၊ ပစ္စယုပ္ပန်တရားတို့အား မှီရာအဖြစ်ဖြင့် ကျေးဇူးပြုမူကို နိဿယပစ္စယသတ္တဟုခေါ်၏။

၉။ ဥပနိဿယ = မိုးရေသည် မိမိကို မှီကုန်သော သစ်ပင်၊ သတ္တ၀ါတို့အား အားကြီးသော မှီရာ ဖြစ်သကဲ့သို့ ပစ္စယုပ္ပန်တရားတို့အား အားကြီးသော မှီရာအဖြစ်ဖြင့် ကျေးဇူပြုမူကို ဥပနိဿယပစ္စယသတ္တိဟုခေါ်၏။

၁၀။ ပုရေဇာတ = ကမ္ဘာဦးအခါ၌ ဖြစ်ကြသော နေလတို့သည် မိမိတို့ ထင်ရှားရှိခိုက် အလင်းကိုမှီကုန်သော သတ္တ၀ါတို့အားရှေး၌ ဖြစ်နှင့်၍ ကျေးဇူးပြုသကဲ့သို့ ရှေး၌ဖြစ်နှင့်ပြီး နောက်၌ ဖြစ်ကြသော ပစ္စယုပ္ပန်တရားတို့အား ကျေးဇူးပြုမူကို ပုရေဇာတပစ္စယသတ္တိဟုခေါ်၏။

၁၁။ ပစ္ဆာဇာတ = ဠင်းတငယ်တို့၏ အာဟာရ၌ချင်ခြင်း စေတနာသည် နောက်မှဖြစ်၍ ရှေး၌ ဖြစ်နှင့်ပြီးသော ခန္ဓာကိုယ်အား ကျေးဇူးပြုသကဲ့သို့ နောက်မှဖြစ်၍ ပစ္စယုပ္ပန်တရားတို့အား ကျေးဇူးပြုမူကို ပစ္ဆာဇာတပစ္စယသတ္တိဟုခေါ်၏။

၁၂။ အာသေ၀န = ရှေးရှေး၌ ထုံအပ်သော နံ့သာသည် နောက်နောက်၌ ထုံအပ်သည့် နံ့သာအား အဆင်းအနံ့ လွန်စွာတိုးပွားစေလျက် ခိုင်မြဲစွာဖြစ်စေခြင်းငှာ ကျေးဇူးပြုသကဲ့သို့ လည်းကောင်း၊ ရှေ့ရှေ့၌ ကျမ်းဂန်သင်ကြားခြင်းသည် နောက်နောက်၌ ကျမ်းဂန်သင်ကြားခြင်းကို လွယ်ကူထက်သန်အားရှိအောင် ကျေးဇူးပြုသကဲ့သို့ လည်းကောင်း၊ ထို့အတူ နောက်နောက်ဇောတို့အား ထက်သန်အားရှိအောင် အထုံအဟုန် ပေးသည့်အနေဖြင့် ရှေ့ရှေ့ဇောတို့၏ ကျေးဇူးပြုမူကို အာသေ၀နပစ္စယသတ္တိဟုခေါ်၏။

၁၃။ ကမ္မ = ကောင်းစွာ သိုမှီးသိမ်းဆည်း စီရင်ထားသော မျိုးစေ့သည် အညွှန့်အညှောက်နှင့်တကွ အပင်သစ်ကို ဖြစ်စေသကဲ့သို့ ၀ိပါက်နာမက္ခန္ဓာနှင့် ကဋတ္တာရုပ်တို့ဖြစ်ဖို့ရန် မျိုးစေ့အဖြစ်ဖြင့် ကျေးဇူးပြုမူကို ကမ္မပစ္စယသတ္တိဟုခေါ်၏။

၁၄။ ၀ိပါက = ချမ်းအေးသောလေသည် ချမ်းအေးသည့်အရိပ်၌ နေသောသူအား ချမ်းငြိမ်းစေခြင်းငှာ ကျေးဇူးပြုသကဲ့သို့ လည်းကောင်း၊ အေးယာဉ်စီးသော သူငယ်အား သီချင်သံဖြင့် ကျူးရင့်ဘိသကဲ့သို့ လည်းကောင်း၊ ပစ္စယုပ္ပန် တရားတို့အား ကြိယာ ဗျာပါရကင်းစေ၍ မှေးမှိန် ငြိမ်သက်စွာဖြစ်စေသောအဖြစ်ဖြင့် ကျေးဇူးပြုမူကို ၀ိပါကပစ္စယသတ္တဟုခေါ်၏။

၁၅။ အာဟာရ = မိဘတို့သည် သားသမီးတို့ကို ဖြစ်ထွန်းလာစေပြီးနောက် စောင့်ရှောက်ထောက်ပံ့ ထမ်းဆောင်ထားသကဲ့သို့ လည်းကောင်း၊ အိမ်အိုးကို ထောက်ကန်ထားသော ကျားတိုင်တို့သည် အိမ်အိုအား ခိုင်စေခြင်းငှာ ကျေးဇူးပြုသကဲ့သို့ လည်းကောင်း၊ ပစ္စယုပ္ပန်တရားတို့အား ဖြစ်စေခြင်း၊ ထက်သန်အားကောင်းအောင် စောင့်ရှောက် ထောက်ပံ့ထမ်းဆောင်ခြင်း ကိစ္စတို့ဖြင့် ကျေးဇူးပြုမူကို အာဟာရပစ္စယသတ္တိဟုခေါ်၏။

၁၆။ ဣန္ဒြိယ = နိုင်ငံတစ်နိုင်ငံ၌ တိုင်းရေး ပြည်ရေးကိစ္စများကို ခွဲဝေစီမံအုပ်ချုပ်ကြသော ၀န်ကြီးများသည် မိမိနှင့်ဆိုင်သော ကိစ္စရပ်များ၌ အခြားဝန်ကြီးများနှင့် ပြည်သူတို့အား မိမိ၏အလိုသို့ လိုက်ပါစေ၍ အစိုးရသည်အဖြစ်ဖြင့် ကျေးဇူးပြုသကဲ့သို့ ပစ္စယုပ္ပန်တရားတို့အား မိမိအလိုသို့ လိုက်ပါစေ၍ အစိုးရသည် အဖြစ်ဖြင့် ကျေးဇူးပြုမူကို ဣန္ဒြိယပစ္စယသတ္တိဟုခေါ်၏။

၁၇။ ဈာန = ထောင်ဖျား၊ သစ်ပင်ဖျားသို့တက်ပြီး ကြည့်သောသူသည် အဝေးအနီးအရပ်တို့ကို မြင်ခြင်းဟူသည့် အကျိုးကျေးဇူးကိုရသကဲ့သို့ ပစ္စယုပ္ပန်တရားတို့အား အာရုံသို့ ရှေးရူစူးစိုက်ပြီး ရူစေသည့်အဖြစ်ဖြင့် ကျေးဇူးပြုမူကို ဈာနပစ္စယသတ္တိဟု ခေါ်၏။

၁၈။ မဂ္ဂ = ဤမှာဘက်မှာ ထိုမှာဘက်သို့ ကူးသွားသော သူသည် ဤမှာဘက်မှ လွတ်မြောက်ကြောင်းဖြစ်သကဲ့သို့ လည်းကောင်း၊ ထိုမှာဘက်မှ ဤမှာဘက်သို့ ကူးလာသောသူသည် ထိုမှာဘက်မှ လွတ်မြောက်ကြောင်း ဖြစ်သကဲ့သို့ လည်းကောင်း၊ လက်ရှိဘ၀မှ သုဂတိ (သို့မဟုတ်) ဒုဂ္ဂတိဘ၀သို့ရောက်ကြောင်း မဂ်ဖြစ်၍ ထွက်မြောက်ရန် ကျေးဇူးပြုမူကို မဂ္ဂပစ္စယသတ္တိဟုခေါ်၏။

၁၉။ သမ္ပယုတ္တ = နှမ်းဆီ၊ ထောပတ်၊ ပျားရည်၊ သကာ ဟူသော စတုမဓုလေးပါးသည် ၀ဲ၊ ယာ၊ ရှေ့၊ နောက်၊ ထက်၊ အောက်၊ တွင်၊ ပြင် ရွေးချယ်မရအောင် ရောနှောသမနေသကဲ့သို့ တစ်ခုတည်းဖြစ်ခြင်း ချုပ်ခြင်းရှိအောင် အတူတကွယှဉ်ခြင်းဖြင့် ကျေးဇူးပြုမူကို သမ္မယုတ္တပစ္စယသတ္တိဟုခေါ်၏။

၂၀။ ၀ိပ္ပယုတ္တ = ခြောက်ပါးသော အရသာတို့သည် အချင်းချင်း မနှီးမနှော ရောပြွမ်းသောအားဖြင့် ကျေးဇူပြုသကဲ့သို့ လည်းကောင်း၊ ရွှေမကိုဋ်၌ ခြယ်စီထားသော ရတနာကျောက်မျက်တို့သည် ရွှေနှင့် အချင်းချင်းမရောယှက်ကြသကဲ့သို့ လည်းကောင်း၊ ထို့အတူ နာမ်ရုပ်တရားတို့သည် အချင်းချင်း မှီတွယ်ဖွဲ့စပ်၍ ဖြစ်ကြငြားသော်လည်း ဧကုပ္ပါဒ စသည်ဖြစ်အောင် တစ်လုံးတစ်ဝတည်း မရောယှက်သည်အဖြစ်ဖြင့် ကျေးဇူးပြုမူကို ၀ိပ္ပယုတ္တပစ္စယသတ္တိဟုခေါ်၏။

၂၁။ အတ္ထိ = ဟိမ၀န္တာတောင်မင်းသည် မိမိကို မှီ၍ ဖြစ်ကြသော သစ်ပင်ပန်းပင် စသည်တို့အား ရှင်သန်ပြန့်ပွားစေခြင်းငှာ မိမိထင်ရှား ရှိနေခြင်းအားဖြင့် ကျေးဇူးပြုဘိသကဲ့သို့ လည်းကောင်း၊ ပြည့်ရှင်မင်းသည် သားမယားမှစ၍ တိုင်းသူပြည်သားအပေါင်းတို့အား ထက်သန်အားရှိအောင် မိမိအသက်ရှင်စဉ် မိမိထင်ရှားတည်နေခြင်းဖြင့် ကျေးဇူးပြုသကဲ့သို့ လည်းကောင်း၊ ပစ္စယုပ္ပန်တရားတို့အား ထက်သန်အားရှိအောင် ထင်ရှားစွာတည်ရှိသည်အဖြစ်ဖြင့် ကျေးဇူးပြုမူကို အတ္ထိပစ္စယသတ္တိ ဟုခေါ်၏။

၂၂။ နတ္ထိ = ညဉ့်၏ကင်းခြင်းသည် နေ့ဖြစ်ခြင်းငှာ ကျေးဇူးပြုသကဲ့သို့ လည်းကောင်း၊ ဆီမီး၏ ငြိမ်းခြင်းသည် အမိုက်မှောင် ဖြစ်ခြင်းငှာ ကျေးဇူးပြုသကဲ့သို့ လည်းကောင်း၊ ဘုရင်မင်းမြတ်၏ နတ်ရွာစံခြင်းသည် မိမိသားကြီးအား ဘုရင်ဖြစ်ခွင့်ကို အပ်နင်းသကဲ့သို့ လည်းကောင်း၊ မိမိချုပ်ငြိမ်း၍ မရှိခြင်းဖြင့် ကျေးဇူးပြူမူကို နတ္တိပစ္စယသတ္တိဟုခေါ်၏။

၂၃။ ၀ိဂတ = နေ၏၀င်ခြင်းသည် လရောင်လင်းစေခြင်းငှာ ကျေးဇူးပြုသကဲ့သို့ ကင်းချုပ်သည်၏အဖြစ်ဖြင့် ကျေးဇူးပြုမူကို ၀ိဂတပစ္စယသတ္တိဟုခေါ်၏။

၂၄။ အ၀ိဂတ = မဟာသမုဒ္ဒရာသည် မိမိကို မှီကြကုန်သော ငါးလိပ်မကာရ်းစသည်တို့အား ပီတိသောမနဿပွားစေခြင်းငှာ မိမိ၏ မကင်းသည်အဖြစ်ဖြင့် ကျေးဇူးပြုသကဲ့သို့ မကင်းသည်၏ အဖြစ်ဖြင့် ကျေးဇူးပြုမူကို အ၀ိဂတပစ္စယဟုခေါ်၏။

ပစ္စည်းအကျဉ်း ၆-မျိုး
ပဋ္ဌာန်းပစ္စည်း ၂၄-ပါးတို့ကို သဘောတူရာ ပေါင်းစုလျှင် ပစ္စည်း ၆-မျိုးကို ရ၏။

၁။ နာမ်သည် နာမ်အား ကျေးဇူးပြုသော ပစ္စည်း ၆-ပါး။ နာမ်ဖြစ်၍ နာမ်အားသာလျှင် ကျေးဇူးပြုကြသော ပစ္စည်းတို့သည် အနန္တရ၊ သမနန္တရ၊ အာသေ၀န၊ သမ္ပယုတ္တ၊ နတ္ထိ၊ ၀ိဂတ တို့ ဖြစ်ကြ၏။

၂။ နာမ်သည် နာမ်ရုပ်အား ကျေးဇူးပြုသော ပစ္စည်း ၅-ပါး။ နာမ်ဖြစ်၍ နာမ်ရုပ် ၂-ပါးအား ကျေးဇူးပြုကြသော ပစ္စည်းတို့သည် ဟေတု၊ ဈာန၊ မဂ္ဂ၊ ကမ္မ၊ ၀ိပါကတို့ ဖြစ်ကြ၏။
၃။ နာမ်သည် ရုပ်အားသာ ကျေးဇူးပြုသော ပစ္စည်း ၁-ပါး။ နာမ်ဖြစ်၍ ရုပ်အားသာလျှင် ကျေးဇူးပြုသော ပစ္စည်းသည် ပစ္ဆာဇာတ ဖြစ်၏။
၎။ ရုပ်သည် နာမ်အားကျေးဇူးပြုသော ပစ္စည်း ၁-ပါး။ ရုပ်ဖြစ်၍ နာမ်အားသာလျှင် ကျေးဇူးပြုသော ပစ္စည်းသည် ပုရေဇာတ ဖြစ်၏။

၅။ နာမ်ရုပ်ပညတ်တို့သည် နာမ်အား ကျေးဇူးပြုသော ပစ္စည်း ၂-ပါး။ နာမ်ရုပ် ပညတ်ဖြစ်၍ နာမ်အားသာလျှင် ကျေးဇူးပြုသော ပစ္စည်းတို့သည် အာရမ္မဏနှင့် ဥပနိဿယတို့ ဖြစ်ကြ၏။

၆။ နာမ်ရုပ် ၂-ပါးက နာမ်ရုပ် ၂-ပါးအား ကျေးဇူးပြုကြသော ပစ္စည်း ၉-ပါး။ နာမ်ရုပ် ၂-ပါးစုံဖြစ်၍ နာမ်ရုပ် ၂-ပါးစုံအား ကျေးဇူးပြုကြသော ပစ္စည်းတို့သည် အဓိပတ္တိ၊ သဟဇာတ၊ အညမည၊ နိဿယ၊ အာဟာရ၊ ဣန္ဒြိယ၊ ၀ိပ္ပယုတ္တ၊ အတ္ထိ၊ အ၀ိဂတပစ္စည်းတို့ ဖြစ်ကြ၏။

ပစ္စည်း ၆-မျိုးတို့၏ ကျေးဇူးပြုပုံများ

၁။ နာမ်သည် နာမ်အား ကျေးဇူးပြုပုံမှာ -
အခြားမဲ့ဖြစ်၍ ချုပ်ကုန်ပြီးသော စိတ်စေတသိက်တို့သည် အကြောင်းကိုစွဲ၍ ဖြစ်ကုန်သော စိတ်စေတသိက်တို့အား အနန္တရ၊ သမနန္တရ၊ နတ္ထိ၊ ၀ိဂတပစ္စည်းတို့၏ အစွမ်းဖြင့် ကျေးဇူးပြုကြ၏။

ရှေးရှေးဖြစ်သော ဇောတို့သည် နောက်နောက်ဖြစ်သော ဇောတို့အား အာသေ၀နပစ္စည်း၏ အစွမ်းဖြင့် ကျေးဇူးပြုကြ၏။

အတူတကွ ဖြစ်ကြကုန်သော စိတ်စေတသိက်တို့သည် အချင်းချင်းအား သမ္ပယုတ္တပစ္စည်း၏ အစွမ်းဖြင့် ကျေးဇူးပြုကြ၏။
၂။ နာမ်သည် နာမ်ရုပ်အား ကျေးဇူးပြုပုံမှာ -
ဟိတ်၊ ဈာနင်၊ မဂ္ဂင်တို့သည် အတူတကွ ဖြစ်ကြကုန်သော နာမ်ရုပ်တို့အား ဟေတု၊ ဈာန၊ မဂ္ဂပစ္စည်းတို့၏ အစွမ်းဖြင့် ကျေးဇူပြုကြ၏။

တကွဖြစ်သော စေတနာသည် တကွဖြစ်သော နာမ်ရုပ်တို့အား လည်းကောင်း၊ အသီးသီးသော ခဏတို့၌ ဖြစ်ကြသော စေတနာတို့သည် ကံကြောင့်ဖြစ်သော နာမ်ရုပ်တို့အား လည်းကောင်း၊ ကမ္မပစ္စည်း၏ အစွမ်းဖြင့် ကျေးဇူးပြုကြ၏။

ဝိပါက်နာမက္ခန္ဓာတို့သည် အချင်းချင်းအား လည်းကောင်း၊ အတူတကွဖြစ်ကုန်သော ရုပ်တို့အား လည်းကောင်း၊ ၀ိပါကပစ္စည်း၏ အစွမ်းဖြင့် ကျေးဇူးပြုကြ၏။

၃။ နာမ်သည် ရုပ်အားကျေးဇူးပြုပုံမှာ -
နောက်နောက်၌ ဖြစ်ကုန်သော စိတ်စေတသိက်တို့သည် ရှေ့ရှေ့၌ ဖြစ်ကုန်သော ရူပကာယအား ပစ္ဆာဇာတပစ္စည်း၏ အစွမ်းဖြင့် ကျေးဇူးပြု၏။

၎။ ရုပ်သည် နာမ်အား ကျေးဇူးပြုပုံမှာ -
ဝတ္ထုရုပ် ၆-ပါးတို့သည် ပ၀တ္တိအခါ၌ ၀ိညာဏဓာတ် ၇-ပါးတို့အား လည်းကောင်း၊ အာရုံ ၅-ပါးတို့သည် ပဉ္စ၀ိညာဏ၀ီထိတို့အား လည်းကောင်း၊ ပုရေဇာတပစ္စည်း၏ အစွမ်းဖြင့် ကျေးဇူးပြုကြ၏။

၅။ ပညတ် နာမ် ရုပ်က နာမ်အား ကျေးဇူးပြုသော -
၂-ပစ္စည်းကား အာရမ္မဏနှင့် ဥပနိဿယတို့တည်း။

အာရမ္မဏပစ္စည်းသည် ရူပါရုံ၊ သဒ္ဒါရုံ၊ ဂန္ဓာရုံ, ရသာရုံ, ဖောဋ္ဌဗ္ဗာရုံနှင့် ဓမ္မာရုံတို့ ဖြစ်ကြ၏။ ဤအာရုံတို့သည် စိတ်စေတသိက်တို့အား အာရမ္မဏသတိဖြင့် ကျေးဇူးပြုကြ၏။

ဥပနိဿယပစ္စည်းသည် အာရမ္မဏူပနိဿယ၊ အနန္တရူပနိဿယ၊ ပကတူပနိဿယဟု ၃-မျိုးပြား၏။ ထို ၃-မျိုးတွင် အလေးဂရုပြုအပ်သော အာရုံသည်ပင်လျှင် အာရမ္မဏူပနိဿယ ပစ္စည်းမည်၏။ အခြားမဲ့ဖြစ်၍ ချုပ်ပြီးကုန်သော စိတ်စေတသိက်တို့သည် အနန္တရူပနိဿယပစ္စည်းမည်၏။ ပကတူပနိဿယပစ္စည်းကား များပြားလှ၏။

ရာဂအစရှိသော အကုသိုလ်တရားတို့သည် လည်းကောင်း၊ သဒ္ဓါအစရှိသော ကုသိုလ်တရားတို့သည် လည်းကောင်း၊ ကာယိကသုခသည် လည်းကောင်း၊ ကာယိကဒုက္ခသည် လည်းကောင်း၊ ပုဂ္ဂိုလ်သည် လည်းကောင်း၊ ဘောဇဉ်သည် လည်းကောင်း၊ ဥတုသည် လည်းကောင်း၊ ကျောင်း, အိမ်ရာ, နေရာတို့သည် လည်းကောင်း၊ ပကတူပနိဿယပစ္စည်းများဖြစ်ကြပြီး ထိုက်သည့်အားလျော်စွာ အဇ္ဈတ္တသန္တာန်, ဗဟိဒ္ဓသန္တာန်တို့၌ နောင်ဖြစ်ပေါ်လာကြမည့် အကုသိုလ်, ကုသိုလ်, ၀ိပါက်, ကြိယာတို့အား ဥပနိဿယ သတ္တိဖြင့် ကျေးဇူးပြုကြကုန်၏။
၆။ နာမ်ရုပ် ၂-ပါးက နာမ်ရုပ် ၂-ပါးအား ကျေးဇူးပြုပုံမှာ -
အဓိပတိ၊ သဟဇာတ၊ အညမည၊ နိဿယ၊ အာဟာရ၊ ဣန္ဒြိယ၊ ၀ိပယုတ္တ၊ အတ္ထိ၊ အ၀ိဂတ ဟူသော ပစ္စည်း ၉-ပါးတို့သည် ထိုက်သည့်အားလျောင်စွာ ၉-ပစ္စယ သတ္တိတို့ဖြင့် နာမ်ရုပ်တို့အား ကျေးဇူးပြုကြကုန်၏။

ဤတွင် အဓိပတိပစ္စည်းသည် အရမ္မဏာ ဓိပတိ၊ သဟဇာတာ ဓိပတိဟူ၍ ၂-မျိုးပြား၏။ အာရမ္မဏာ ဓိပတိဟူသည်မှာ သာမန်အာရုံ, အလေးဂရုပြုအပ်သော အာရုံ ၂-ပါးတို့တွင် အာရုံမပြုလျှင် မနေနိုင်လာက်အောင် စိတ်ကို ဆွဲဆောင်နိုင်သော ဂရုကတအာရုံမျိုးဖြစ်၏။

သဟဇာတာဓိပတိပစ္စည်း ၄-ပါးတို့သည် တကွဖြစ်ကြကုန်သော နာမ်ရုပ်တို့အား သဟဇာတာဓိပတိပစ္စည်း၏ အစွမ်းဖြင့် ကျေးဇူးပြုကြ၏။

သဟဇာတပစ္စည်းတို့သည် စိတ် ၈၉-ပါး၊ စေတသိက် ၅၂-ပါး၊ စတုဇမဟာဘုတ် ၄-ပါး၊ ပဉ္စဝေါကာရ ပဋိသန္ဓေ ၁၅-ပါးနှင့် ဟဒယ၀တ္ထုတို့ ဖြစ်ကြ၏။

စိတ်စေတသိက်တို့သည် အချင်းချင်းအား လည်းကောင်း၊ တကွဖြစ်သော ရုပ်တို့အားလည်းကောင်း၊ သဟဇာတပစ္စယသတ္တိဖြင့် ကျေးဇူးပြုကြ၏။

မဟာဘုတ် ၄-ပါးတို့သည် အချင်းချင်းအား လည်းကောင်း၊ ဥပါဒါရုပ်တို့အား လည်းကောင်း၊ သဟဇာတပစ္စယ သတ္တိဖြင့် ကျေးဇူးပြုကြ၏။

ပဋိသန္ဓေခဏ၌ ဟဒယ၀တ္ထုနှင့် ၀ိပါက်နာမက္ခန္ဓာတို့သည် အချင်းချင်းအား သဟဇာတ ပစ္စယသတိဖြင့် ကျေးဇူးပြုကြ၏။

အညမညပစ္စည်းတို့သည် စိတ် ၈၉-ပါး၊ စေတသိက် ၅၂-ပါး၊ စတုဇမဟာဘုတ် ၄-ပါး၊ ပဉ္စဝေါကာရ ပဋိသန္ဓေ ၁၅-ပါးနှင့် ဟဒယ၀တ္ထုတို့ပင် ဖြစ်ကြ၏။

စိတ်စေတသိက်တို့သည် အချင်းချင်းအား လည်းကောင်း၊ မဟာဘုတ် ၄-ပါးတို့သည် အချင်းချင်းအား လည်းကောင်း၊ ဟဒယ၀တ္ထုနှင့် ၀ိပါက်နာမက္ခန္ဓာတို့သည် အချင်းချင်းအား လည်းကောင်း၊ အညမည ပစ္စယသတ္တိဖြင့် ကျေးဇူးပြုကြကုန်၏။

နိဿယပစ္စည်းတို့သည် သဟဇာတ နိသယနှင့် ပုရေဇာတ နိဿယဟူ၍ ၂-မျိုးပြား၏။ သဟဇာတ နိဿယပစ္စည်းတို့သည် မဇ္ဈိမာယုကပသာဒ ၅-ပါး၊ ပဋိသန္ဓေစိတ် စသည့် ရှေ့ရှေ့အနန္တရစိတ်နှင့်အတူ ဥပါဒ်သော ဟဒယ၀တ္ထု၊ နိရောဓသမာပတ်မှထသည့်အခါ ရှေ့စိတ္တက္ခဏ တစ်ချက်စာကာလ၌ဖြစ်သော ဟဒယ၀တ္ထု၊ မရဏာသန္နအခါစုတိစိတ်မှ အထက် ၁၇-ချက်မြောက်သော စိတ်နှင့်အတူ ဥပါဒ်သော ဟဒယ၀တ္ထုတို့ ဖြစ်ကြ၏။

(၁) စိတ်စေတသိက်တို့သည် အချင်းချင်းအား လည်းကောင်း၊ (၂) မဟာဘုတ် ၄-ပါးတို့သည် အချင်းချင်းအား လည်းကောင်း၊ ဥပါဒါရုပ်အား လည်းကောင်း၊ (၃) ၀တ္ထုရုပ် ၆-ပါးတို့သည် ၀ိညာဏဓာတ် ၇-ပါးတို့အား လည်းကောင်း၊ နိဿယပစ္စယာသတ္တိဖြင့် အသီးသီးကျေးဇူးပြုကြကုန်၏။

အာဟာရပစ္စည်းသည် ရုပ်အာဟာရနှင့် နာမ်အာဟာရဟူ၍ ၂-မျိုးရှိ၏။ ရုပ်အာဟာရသည် အဇ္ဈတ္တစတုဇသြဇာနှင့် စားသောက်မျိုသွင်းအပ်သည့် အစာအာဟာရ၌ ပါရှိသော ဗဟိဒ္ဓသြဇာဖြစ်၏။ နာမ်အာဟာရမှာ ဖဿ၊ စေတနာနှင့် ၀ိညာဏ်တို့ ဖြစ်ကြ၏။

အလုပ်အလွေးပြုအပ်သော ရပ်အာဟာရသည် ဤရူပကာယအား လည်းကောင်း၊ နာမ်အာဟာရတို့သည် တကွဖြစ်ကုန်သော နာမ်ရုပ်တို့အား လည်းကောင်း၊ အာဟာရပစ္စယသတ္တိဖြင့် အသီးသီး ကျေးဇူးပြုကြကုန်၏။

ဣန္ဒြိယပစ္စည်း၏ ကျေးဇူးပြုပုံမှာ (၁) ပသာဒရုပ် ၅-ပါးတို့သည် ပဉ္စ၀ိညာဏ်တို့အား လည်းကောင်း၊ (၂) ရူပဇီဝိတိနြေ္ဒသည် ဥပါဒိန္ဒ(ကမ္မဇ) ရုပ်တို့အား လည်းကောင်း၊ (၃) နာမ်ဣနြေ္ဒ ၈-ပါးတို့သည် အတူတကွ ဖြစ်ကြသော နာမ်ရုပ်တို့အား လည်းကောင်း၊ ဣန္ဒြိယပစ္စယ သတ္တိဖြင့် ကျေးဇူးပြုကြကုန်၏။

နာမ်ဣနြေ္ဒ ၈-ပါးမှာ နာမ်ဇီဝိတ၊ စိတ်၊ ဝေဒနာ၊ သဒ္ဓါ၊ ၀ီရိယ၊ သတိ၊ သမာဓိနှင့် ပညာတို့ ဖြစ်ကြကုန်၏။

ဝိပ္ပယုတ္တပစ္စည်း၏ ကျေးဇူးပြုပုံမှာ -
(၁) ပဋိသန္ဓေခဏ၌ ဟဒယ၀တ္ထုသည် ၀ိပါက်ခန္ဓာအား လည်းကောင်း၊ စိတ်စေတသိက်တို့သည် တကွဖြစ်သော ရုပ်တို့အား လည်းကောင်း၊ သဟဇာတ ၀ိပ္ပယုတ္တပစ္စည်း၏ အစွမ်းအားဖြင့် ကျေးဇူးပြုကြ၏။

(၂) နောက်နောက်၌ဖြစ်ကုန်သော စိတ်စေတသိက်တို့သည် ရှေးရှေး၌ဖြစ်သော ဤရူပကာယအား ပစ္ဆာဇာတ၀ိပ္ပယုတ္တ ပစ္စည်း၏ အစွမ်းဖြင့် ကျေးဇူးပြု၏။

(၃) ၀တ္ထုရုပ် ၆-ပါးတို့သည် ပ၀တ္တိအခါ၌ ၀ိညာဏဓာတ် ၇-ပါးတို့အား ပုရေဇာတ၀ိပ္ပယုတ္တ ပစ္စည်း၏ အစွမ်းဖြင့် ကျေးဇူးပြု၏။

အတ္ထိပစ္စည်းနှင့် အ၀ိဂတပစ္စည်းတို့ကား ရှေး၌ပြုခဲ့သော သဟဇာတမျိုး၊ ပုရေဇာတမျိုး၊ ပစ္ဆာဇာတမျိုး၊ ကဗဠီကာရအာဟာရနှင့် ရူပဇီဝိတိနြေ္ဒတို့တည်း။ ဤပစ္စည်းတို့သည် ထိုက်သည့်အားလျော်စွာ နာမ်ရုပ်တို့အား အတ္ထိပစ္စယသတ္တိ အ၀ိဂတပစ္စယသတ္တိတို့ဖြင့် ကျေးဇူးပြုကြကုန်၏။
ပညတ် ၂-မျိုး
ပညတ်တရားသည် အတ္ထပညတ်နှင့် သဒ္ဒပညတ်ဟူ၍ ၂-မျိုး ရှိ၏။

အတ္တပညတ်သည် သူတစ်ပါးကို နားလည်အောင် ပြောပြအပ်၊ သိစေအပ်သော အကြောင်းအရာအနက် ဒြပ်များဖြစ်ကြ၏။ ထိုအနက်ဒြပ်ဟူသည်မှာ စိတ်၌ထင်လာသမျှသော အကောင်အထည် ၀တ္ထုတိုပင်တည်း။
သဒ္ဒပညတ်သည် စကားသံဖြစ်၏။ ပါဠိစကားသံ၊ မြန်မာစကားသံ၊ အင်္ဂလိပ်စကားသံ၊ ထိုထိုစကားသံ(သဒ္ဒါ) ဟူသမျှသည် မိမိတို့ ဘာသာအလျောက် ဆိုလိုရာအနက်ဒြပ်၊ အထည်ဝတ္ထုတစ်ခုခုကို အမျိုးမျိုးအစားစားအားဖြင့် သိစေသည်ချည်းဖြစ်၏။ ဤသို့ အပြောအားဖြင့် သိစေအပ်သောကြောင့် စကားသံကို သဒ္ဒပညတ်ဟုခေါ်၏။

အတ္ထပညတ်အကျယ်
အတ္ထပညတ်အမျိုးမျိုးကို ဆွေးနွေးရာ၌ ဗဟိဒ္ဓအဋ္ဌကကလာပ်ရုပ်အစုတို့ကို `မဟာဘုတ်´ ဟူ၍သာ ခေါ်ဝေါ်သုံးစွဲသွားပါမည်။

၁။ သန္တာနပညတ်
မဟာဘုတ်တို့၏ ပေါင်းစုတည်နေပုံ အခြင်းအရာ (၀ါ) မဟာဘုတ်တို့၏ တွဲယှက်တည်နေပုံ အစဉ်သန္တာန်ကိုစွဲ၍ သမုတ်ထားအပ်သော အမည်ပညတ်များကို သန္တာန်ပညတ်ဟု ခေါ်၏။ သမူဟပညတ်ဟုလည်းခေါ်၏။

ပုံစံ။ ။မဟာဘုတ်တို့၏ ပြန့်ကျယ်ပြားချပ်လျက် တွဲယှက်တည်နေပုံ အခြင်းအရာကို အာရုံပြု၍ ဤအရာသည် `ဘူမိ´(မြေကြီး)ဟု အမည် သမုတ်အပ်၏။
မဟာဘုတ်တို့ တွဲယှဉ်ကာ မို့မောက်မတ်စောက်စွာ စုပုံတည်နေသော အခြင်းအရာကို အာရုံပြု၍ ဤအရာသည် `ပဗ္ဗတ´(တောင်)ဟု အမည်သမုတ်အပ်၏။

၂။ သဏ္ဌာနပညတ်
မဟာဘုတ်များ အစဉ်အဆက် တွဲယှက်ကာ ပေါင်းစုတည်နေဟန် ပုံသဏ္ဌာန်ကိုစွဲ၍ သမုတ်ထားအပ်သော အမည်ပညတ်များကို သဏ္ဌာနပညတ်ဟုခေါ်၏။ သမူဟပညတ်ဟုလည်းခေါ်သေးသည်။

ပုံစံ။ ။ ဂေဟ(အိမ်)၊ ရထ(ရထား)၊ သကဋ(လှည်း)၊ ဂါမ(ရွာ)၊ ဃဋ(အိုး)၊ ပဋ(ပုဆိုး)။

၃။ သတ္တပညတ်
ခန္ဓာငါးပါး အပေါင်းအစု ဖြစ်ကြသည့် သတ္တ၀ါများကိုစွဲ၍ သမုတ်ထားအပ်သော အမည်ပညတ်များကို သတ္တပညတ်ဟု ခေါ်၏။

ပုံစံ။ ။ ပုရိသ(ယောက်ျား)၊ ဣတ္ထိယ(မိန်းမ)၊ ပုဂ္ဂလ်(ပုဂ္ဂိုလ်)

၎။ ဒိသာပညတ်
နေလနက္ခတ်တို့၏ အသွားအလာကိုစွဲ၍ ထိုဂြိုဟ်နက္ခတ်တို့ ရှေးဦးစွာ ထွက်ပေါ်လာသောအရပ်ကို `ပုဗ္ဗဒိသာ = ပုရတ္ထိမဒိသာ´ (အရှေ့အရပ်)ဟု လည်းကောင်း၊ ထိုဂြိုလ်နက္ခတ်တို့ နောက်ဆုံးဖြစ်ရာအရပ်ကို `ပစ္ဆိမဒိသာ´ (အနောက်အရပ်)ဟု လည်းကောင်း၊ လက်ယာဘက်အရပ်ကို `ဒက္ခိဏဒိသာ´ (တောင်အရပ်)ဟု လည်းကောင်း၊ လက်ဝဲဘက်အရပ်ကို `ဥတ္တရဒိသာ´ (မြောက်အရပ်)ဟု လည်းကောင်း ပညတ်ထားကြ၏။ ဤသို့ အရပ်မျက်နှာနှင့် ပတ်သက်သော အမည်ပညတ်များကို ဒိသာပညတ်ဟုခေါ်၏။

၅။ ကာလပညတ်
အချိန်ကာလကိုစွဲ၍ သတ်မှတ်ထားသည့် အမည်ပညတ်များကို ကာလပညတ်ဟုခေါ်၏။

ပုံစံ။ ။ `ပုဗ္ဗဏှ´(နံနက်ပိုင်း)၊ `မဇ္ဈဏှ´(နေ့လည်ပိုင်း)၊ `အပရဏှ´(ညနေပိုင်း)

ဥတုရာသီကိုစွဲ၍ သမုန်ထားသော ပညတ်များကို ဥတုပညတ်ဟုခေါ်၏။

၆။ အာကာသပညတ်
မဟာဘုတ်ရုပ်ကလာပ်တို့ ထိစပ်ခြင်းမရှိဘဲ ဟာလာဟင်းလင်းဖြစ်နေပုံကို အာရုံပြု၍ သမုတ်ထားသည့် အမည်ပညတ်များကို အာကာသပညတ်ဟုခေါ်၏။

ပုံစံ။ ။ ကုပ(တွင်း)၊ ဂုဟာ(ဂူ)၊ လေဏ(လိုဏ်)၊ ဆိဒ္ဒ(အပေါက်)။

၇။ ကသိဏပညတ်
လွန်ကဲသော မဟာဘုတ်၏ အာရုံကို စွဲ၍ ပထ၀ီဓာတ်လွန်ကဲသော ရုပ်ကလာပ် မြေအ၀န်းကို `ပထ၀ီကသီဏ´ (မြေကသိုဏ်း)၊ အာပေါဓာတ်လွန်ကဲသော ရုပ်ကလာပ်ရေအယဉ်ကို `အာပေါကသိဏ´ (ရေကသိုဏ်း) စသည်ဖြင့် ပညတ်ထားကြ၏။ ဤအမည်ပညတ်များကို ကသိဏပညတ်ဟုခေါ်၏။

ကမ္မဋ္ဌာန်းဘာဝနာအစဉ်ထူးကိုစွဲ၍ ပညတ်ထားသည့် `ပရိကမ္မနိမိတ်´ `ဥဂ္ဂဟနိမိတ်´ `ပဋိဘာဝနိမိတ်´တို့ကို နိမိတ္တပညတ်ဟု ခေါ်၏။

မှတ်ချက်။ ။ အတ္တပညတ်စုသည် ပရမတ္တအားဖြင့် ထင်ရှား မရှိပါ။ ပရမတ္တတရားတို့ကို စွဲ၍ ထင်ယောင်မြင်ယောင်ဖြစ်လာသော စိတ်စေတသိက်တို့၏ အာရုံမျှသာ ဖြစ်၏။ စိတ္တုပ္ပါဒ်၌ ထင်လာသော အခြင်းအရာ အရိပ်အယောင်မျှသာဖြစ်၏။

သဒ္ဒပညတ်အကျယ်
ဘာသာစကားအမျိုးမျိုး၏ စကားသံတို့သည် သဒ္ဒပညတ်ချည်းဖြစ်ကြ၏။ သဒ္ဒပညတ်ဟူသမျှသည်လည်း နာမ၊ နာမကမ္မ၊ နာမဓေယျ၊ နိရုတ္တိ၊ ဗျဉ္ဇန၊ အဘိလာပ ဟုအမည် ၆-မျိုးရ၏။ လူတစ်ဦးက အမည် ၆-မျိုးရသကဲ့သို့တည်း။

၁။ နာမမည်ပုံ
`နာမ´ သဒ္ဒါသည် `အနက်သို့ညွှတ်တတ်၏´(၀ါ) `မိမိထံသို့ အနက်ကို ညွတ်လာစေတတ်၏´ ဟု အဓိပ္ပာယ်ရ၏။
ပုံစံ။ ။ `ဘူမိ´ သဒ္ဒါသည် `မြေကြီး´ ဟူသော အနက်ကို ဟောစွမ်းနိုင်၏။ ထိုသို့ ဟောစွမ်းနိုင်သော သတ္တိရှိသည့် အားလျော်စွာ `မြေကြီး´ဟူသည့်အနက်ကို ဟောဖို့ရာ အမြဲညွတ်နေသကဲ့သို့ ဖြစ်၏။
ထို့အပြင် ထိုသို့ ဟောစွမ်းနိုင်သော သတ္တိရှိသည့် အားလျော်စွာ `ဘူမိ´ သဒ္ဒါသည် `မြေကြီး´ ဟူသော အနက်ကို မိမိ၏ ဟောနက်အဖြစ်ဖြင့် အမြဲကိုင်းညွတ်လာစေသကဲ့သို့ ရှိ၏။

ထို့ကြောင့် `ဘူမိ´ သည် `နာမ´ဟူသော အမည်ကို ရ၏။

၂။ နာမကမ္မမည်ပုံ
ထို `ဘူမိ´ဟူသော သဒ္ဒါသည်ပင် အရေးပါအပ်သော အမည်နာမဖြစ်ခြင်းကြောင့် `နာမကမ္မ´ဟု အမည်ရပြန်၏။

၃။ နာမေဓယ်မည္ပံု
ထို `ဘူမိ´ဟူသော သဒ္ဒါနာမ်သည်ပင် ပညာရှိတို့ ပညတ် တင်ထားအပ်သောကြောင့် `နာမဓေယျ´မည်ပြန်၏။

၎။ နိရုတ္တိမည်ပုံ
ထို `ဘူမိ´ ဟူသော သဒ္ဒါနာမသည်ပင် မရွတ်ဆိုမီ တိမ်မြုပ်ငုပ်လျှိုနေသော အဖြစ်မှ ထုတ်ဖော်၍ ရွတ်ဆိုအပ်သောကြောင့် `နိရုတ္တိ´ မည်၏။

၅။ ဗျဉ္ဇနမည်ပုံ
ထို `ဘူမိ´ဟူသော သဒ္ဒါနာမသည်ပင် အနက်ကို ထင်ရှားစွာ ပြတတ်သောကြောင့် `ဗျဉ္ဇန´ မည်၏။

၆။ အဘိလာပမည်ပုံ
ထို `ဘူမိ´ ဟူသော သဒ္ဒါနာမသည်ပင် ၀ဒန္တပုဂ္ဂိုလ်တို့က အနက်ကို ရှေးရူ၍ ရွတ်ဆိုအပ်သောကြောင့် `အဘိလာပ´ မည်၏။

ဝိဇ္ဇမာနစသည့် ဘဒ္ဒပညတ် ၆-မျိုး
သဒ္ဒပညတ်သည် ၀ိဇ္ဇမာနပညတ် စသည်အားဖြင့်လည်း ၆-မျိုးရှိ၏။

၁။ ၀ိဇ္ဇမာနပညတ်
ပညတ်အပ်သော အနက်ဒြပ်အတ္ထပညတ်က ပရမတ္ထအားဖြင့် ထင်ရှားရှိလျှင် ထိုအနက်ဒြပ်အတ္ထပညတ်ကို သိစေကြောင်းဖြစ်သည့် သဒ္ဒပညတ်သည် ၀ိဇ္ဇမာနပညတ် မည်၏။

ပုံစံ။ ။ ရူပ၊ စိတ္တ၊ စေတသိက၊ ဝေဒနာ၊ သညာ၊ ၀ိတက်။

၂။ အ၀ိဇ္ဇမာနပညတ်
ပရမတ္ထအားဖြင့် ထင်ရှားမရှိသော အနက်ဒြပ်အတ္ထပညတ်ကို သိစေကြောင်း ဖြစ်စေသည့် သဒ္ဒပညတ်သည် အ၀ိဇ္ဇမာနပညတ်မည်၏။
ပုံစံ။ ။ ပဗ္ဗတ၊ ဂေဟ၊ အိမ်၊ ကျောင်း၊ လိုဏ်၊ ဂူ။

၃။ ၀ိဇ္ဇမာနေန အ၀ိဇ္ဇမာနပညတ်
ပရမတ္ထအားဖြင့် ထင်ရှားရှိသော အနက်ဒြပ်အတ္ထပညတ်နှင့် ထင်ရှားမရှိသည့် အနက်ဒြပ်အတ္ထပညတ်ကို ရောစပ်၍ သိစေကြောင်း ဖြစ်သည့် သဒ္ဒပညတ်ကို ၀ိဇ္ဇမာနေန အ၀ိဇ္ဇမာန ပညတ်ဟုခေါ်၏။

ပုံစံ။ ။ ဆဋ္ဌဘိည = ခြောက်ပါးသော အဘိဉာဏ်ရှိသူ။
တေ၀ိဇ္ဇ = ၀ိဇ္ဇာဉာဏ် ၃-ပါးနှင့် ပြည့်စုံသူ။
လောဘလူသား၊ ရာဂကွန်ယက်၊ မောဟအမှောင်။

၎။ အ၀ိဇ္ဇမာနေန ၀ိဇ္ဇမာနပညတ်
ပရမတ္ထအားဖြင့် ထင်ရှား မရှိသော အနက်ဒြပ်အတ္ထပညတ်နှင့် ထင်ရှားရှိသည့် အနက်ဒြပ်အတ္ထပညတ်ကို ရောစပ်၍ သိစေကြောင်းဖြစ်သည့် သဒ္ဒပညတ်ကို အ၀ိဇ္ဇမာနေန ၀ိဇ္ဇမာနပညတ်ဟု ခေါ်၏။

ပုံစံ။ ။ ဣတ္ထိသဒ္ဒ(မိန်းမအသံ)၊ ဣတ္ထိရူပံ(မိန်းအအဆင်း)၊ ပုရိသသဒ္ဒ။

၅။ ၀ိဇ္ဇမာနေန ၀ိဇ္ဇမာနပညတ်
ပရမတ္ထအားဖြင့် ထင်ရှားရှိသော အနက်ဒြပ်အတ္ထပညတ် ၂-ခုကို တွဲစပ်၍ သိစေကြောင်းဖြစ်သည့် သဒ္ဒပညတ်ကို ၀ိဇ္ဇမာနေန ၀ိဇ္ဇမာန ပညတ်ဟုခေါ်၏။

ပုံစံ။ ။ စက္ခုဝိညာဏ၊ သောတပသာဒ၊ စက္ခုသမ္ဖဿ၊ ရူပတဏှာ။

၆။ အ၀ိဇ္ဇမာနန အ၀ိဇ္ဇမာနပညတ်
ပရမတ္ထအားဖြင့် ထင်ရှားမရှိသော အနက်ဒြပ်အတ္ထပညတ် ၂-ခုကို တွဲစပ်၍ သိစေကြောင်းဖြစ်သည့် သဒ္ဒပညတ်ကို အ၀ိဇ္ဇမာနေန အ၀ိဇ္ဇမာန ပညတ်ဟုခေါ်၏။

ပုံစံ။ ။ ရာဇပုတ္တ(ဘုရင့်သား)၊ သေဋ္ဌိပုတ္တ(သူဋ္ဌေးသား)၊ ရုပ်ရှင်မင်းသား၊ မင်းသမီး။

အခန်း(၈) ပစ္စည်းပိုင်း-၁

ပစ္စည်းနှင့် ပစ္စယုပ္ပန်

ပစ္စယ= ပစ္စည်း= ဆိုင်ရာ အကျိုးများ၏ အကြောင်းတရား။
ပစ္စယုပ္ပန္န = ပစ္စယုပ္ပန် = အကြောင်းတရားကြောင့်ဖြစ်သော အကျိုးတရား။
ပစ္စည်းသည် အကြောင်းတရားဖြစ်၍ ပစ္စယုပ္ပန်သည် အကျိုးတရားဖြစ်၏။ ပစ္စည်းတရားတို့က ပစ္စယုပ္ပန် တရားတို့ကို `ကျေးဇူးပြုသည်´ဆိုရာ၌ (၁) မဖြစ်သေးသော ပစ္စယုပ္ပန် အကျိုးတရားကို ဖြစ်စေခြင်း (၂) ဖြစ်ပြီးသော ပစ္စယုပ္ပန် အကျိုးတရားကို တည်တံ့ခိုင်မြဲအောင် ထောက်ပံ့ခြင်းတို့ကို ဆိုလို၏။

ကျေးဇူးပြုနည်း ၂-မျိုး
၁။ ပဋိစ္စသမုပ္ပါဒ်နည်း = `အ၀ိဇ္ဇာပစ္စယာသင်္ခါရာ၊ သင်္ခါရပစ္စယာ ၀ိညာဏံ၊ ပေ၊ ဒေါမနဿုပါယာသာ သမ္ဘ၀န္တိ´။

`အ၀ိဇ္ဇာပစ္စယာသင်္ခါရာ´သည် အ၀ိဇ္ဇာဟူသော ပစ္စည်းတရားကြောင့် သင်္ခါရဟူသည့် ပစ္စယုပ္ပန်တရားဖြစ်သည်ကို ပြ၏။ ထို့ကြောင့် ပဋိစ္စသမုပ္ပါဒ်နည်းသည် ပစ္စည်းနှင့် ပစ္စယုပ္ပန်တို့၏ အကြောင်းအကျိုး ဆက်နွှယ်မူကိုသာ ပြ၏။ မည်သည့် ပစ္စယသတ္တိဖြင့် ကျေးဇူးပြုသည် ဟူသော ပစ္စယသတ္တိထူးကို မပြချေ။

၂။ ပဋ္ဌာန်းနည်း = `ဟေတူ ဟေတုသမ္ပယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော…´

ဤပဋ္ဌာန်းပါဠိတွင် `ဟေတု´ဖြင့် ပစ္စည်းကိုပြ၏။ ဟေတုသမ္ပယုတ္တကာနံဓမ္မာနံ တံသမုဋ္ဌာနာနဉ္စရူပါနံ´ဖြင့် ပစ္စယုပ္ပန်ကိုပြ၏။ `ဟေတု ပစ္စယေန´ဖြင့် ဟေတုပစ္စယ သတ္တိကို ပြ၏။

ထို့ကြောင့် ပဋ္ဌာန်းနည်းသည် ပစ္စည်း-ပစ္စယုပ္ပန်တို့ကိုသာမက ပစ္စယသတ္တိထူးကိုပါ သေချာစွာ ထုတ်ဖော်ပြ၏။

ပဋိစ္စသမုပ္ပါဒ်နည်း
ဤနည်းသည် အကြောင်းပစ္စည်းတရားကို အစွဲပြု၍ အကျိုးပစ္စယုပ္ပန်တရားတို့ ဖြစ်ပေါ်လာပုံကို ပြသောနည်းဖြစ်၏။

၁။ အ၀ိဇ္ဇာပစ္စယာ သင်္ခါရာ
သိထိုက်သည်ကို မသိ၊ မသိထိုက်သည်ကို သိသော အ၀ိဇ္ဇာတရားကြောင့် ပုညာဘိသင်္ခါရ၊ အပုညာဘိသင်္ခါရ၊ အာနေဉ္ဇာဘိသင်္ခါရတည်းဟူသော သင်္ခါရ တရားတို့ ဖြစ်ပေါ်လာကြ၏။


အ၀ိဇ္ဇာ = အ + ၀ိဇ္ဇာ = ဆန့်ကျင်ဘက် + ဉာဏ်
`ဉာဏ်၏ ဆန့်ကျင်ဘကတရား´ကို အ၀ိဇ္ဇာဟု ခေါ်၏။ တရားကိုယ်မှာ အကုသိုလ်စိတ် ၁၂-ပါး၌ ယှဉ်သော မောဟဖြစ်၏။

အမှန်သဘောကို မသိအောင် အ၀ိဇ္ဇာဖုံးကွယ်ထားသော တရား ၈-ဌာနမှာ-
(၁) ဒုက္ခသစ္စာ
(၂) သမုဒ္ဒယသစ္စာ
(၃) နိရောဓသစ္စာ
(၄) မဂ္ဂသစ္စာ
(၅) ပုဗ္ဗန္တ ခေါ် အတိတ် ခန္ဓာ အာယတန ဓာတ်အဖို့အစု
(၆) အပရန္တ ခေါ် အနာဂတ် ခန္ဓာ အာယတန ဓာတ်အဖို့အစု
(၇) ပုဗ္ဗန္တာပရန္တ ခေါ် ခန္ဓာအာယတနဓာတ်၏ ရှေ့နောက်အစွန်း၂-ပါး
(၈) ပဋိစ္စသမုပ္ပါဒ်တရားတို့ ဖြစ်ကြ၏။

သင်္ခါရဟူသည်မှာ ယခုဘ၀ ကိုယ်မူ၊ နူတ်မူ၊ စိတ်မူများနှင့် နောက်ဘ၀အတွက် အကျိုးဝိပါက်များကို ပြုစီမံတတ်သော ကံတရား ဖြစ်၏။

တရားကိုယ်မှာ လောကီကုသိုလ်စိတ် ၁၇-ပါးနှင့် အကုသိုလ်စိတ် ၁၂-ပါးတို့၌ ယှဉ်သော စေတနာ ၂၉-ပါးဖြစ်၏။

မဟာကုသိုလ်စိတ် ၈-ပါးနှင့် ရူပါဝစရကုသိုလ်စိတ် ၅-ပါးတို့၌ ယှဉ်သော စေတနာ ၁၃-ပါးကို ပုညာဘိသင်္ခါရဟု ခေါ်၏။

အကုသိုလ်စိတ် ၁၂-ပါး၌ ယှဉ်သော စေတနာ ၁၂-ပါးကို အပုညာဘိသင်္ခါရဟု ခေါ်၏။

အရူပါဝစရကုသိုလ်စိတ် ၄-ပါး၌ ယှဉ်သော စေတနာ ၄-ပါးကို အာနေဉ္ဇာဘိသင်္ခါရဟု ခေါ်၏။

ကံပြုပုံ - သတ္တ၀ါတို့သည် အ၀ိဇ္ဇာတည်းဟူသော မသိမိုက်မဲမူကြောင့် ပုညာဘိသင်္ခါရ၊ အပုညာဘိသင်္ခါရ၊ အာနေဉ္ဇာဘိသင်္ခါရတို့ကို ပြုစီမံကြသည်ဆိုခြင်းမှာ ကာမချမ်းသာနှင့် ဈာန်ချမ်းသာတို့ကို တကယ့်ချမ်းသာအစစ်ဟု ထင်မှားမိခြင်းကြောင့် ဖြစ်၏။ ကာမချမ်းသာ၊ ဈာန်ချမ်းသာတို့သည်လည်း အနိစ္စတရားများးဖြစ်ကြသဖြင့် ကံကုန်သည့်အခါ စုတေပျက်စီးရခြင်းဟူသော ၀ိပရိဏာမဒုက္ခနှင့် မုချမသွေရင်ဆိုင်ကြုံတွေ့ ရမည်ဖြစ်၏။

၂။ သင်္ခါရပစ္စယာ ၀ိညာဏံ
သင်္ခါရကြောင့် ၀ိညာဏ်ဖြစ်သည်ဟု ဆိုရာ၌ `သင်္ခါရ´သည် ပုညာဘိသင်္ခါရ၊ အပုညာဘိသင်္ခါရနှင့် အာနေဉ္ဇာဘိသင်္ခါရတို့ပင်ဖြစ်၏။ `၀ိညာဏ်´ဟူသည်မှာ ပဋိသန္ဓေ၀ိညာဏ်ကို ဆိုလို၏။ သို့ရာတွင် ပ၀တ္တိအခါ၌ ဖြစ်ပေါ်ကြသော ၀ိပါက် စိတ်များကိုလည်း ထည့်သွင်းယူရ၏။

ပဋိစ္စသမုပ္ပါဒ်တရားတော်သည် ၀ဋ်တရားတို့၏ လည်ပတ်ပုံကိုပြသော တရားဖြစ်ခြင်းကြောင့် ၀ိညာဏ်အရကောက်တွင် လောကုတ္တရာ ၀ိပါက်စိတ်များကို မထည့်သွင်းနိုင်ပါ။ လောကီဝိပါက် ၃၂-ပါးကိုသာ ယူရမည်။

သင်္ခါရကြောင့် ၀ိညာဏ်ဖြစ်ပုံမှာ -
၁။ အပုညာဘိသင်္ခါရကြောင့် အကုသလ၀ိပါက်ဝိညာဏ် ၇ -ပါး ဖြစ်၏။

၂။ ပုညာဘိသင်္ခါရကြောင့် အဟိတ်ကုသလ၀ိပါက် ၈-ပါး၊ မဟာဝိပါက် ၈-ပါးနှင့် ရူပါဝစရ၀ိပါက် ၅-ပါး၊ ပေါင်း ၀ိပါက်ဝိညာဏ် ၂၁-ပါး ဖြစ်ကြ၏။

၃။ အာနေဉ္ဇာဘိသင်္ခါရကြောင့် အရူပါဝစရ၀ိပါက် ၀ိညာဏ် ၄-ပါး ဖြစ်၏။

၃။ ၀ိညာဏပစ္စယာ နာမရူပံ
ဝိညာဏ်ကြောင့် နာမ်ရပ်တို့ ဖြစ်သည်ဆိုရာ၌ `၀ိညာဏ်´အဖြစ် ရှေးဘ၀က ပြုခဲ့သော ကမ္မ၀ိညာဏ်နှင့် ပစ္စုပ္ပန်ဘ၀၌ဖြစ်သော ၀ိပါက်ဝိညာဏ်တို့ကို ကောက်ယူရမည်။

စေတနာကံနှင့် ယှဉ်သည့် စိတ်ကို ကမ္မ၀ိညာဏ်ဟုခေါ်၏။ `နာမရူပံ´၌ နာမအရ ၀ိပါက်ဝိညာဏ်နှင့် ယှဉ်သော စေတသိက်များ (နာမ်ခန္ဓာ ၃-ပါး)ကို ကောက်၍ ရူပအရ ကမ္မဇရုပ် ၁၈-ပါးကိုသာ ကောက်ယူရမည်။

သို့ဖြစ်၍ ရှေးရှေးဘ၀က ပြုခဲ့သော ကမ္မ၀ိညာဏ်နှင့် ပစ္စုပ္ပန်ဘ၀၌ဖြစ်သော ၀ိပါက်ဝိညာဏ် ၃၂-ပါးတို့ကြောင့် ထိုဝိပါက် ၀ိညာဏ်တို့နှင့် ယှဉ်ကြသည့် စေတသိက် နာမ်ခန္ဓာ ၃-ပါးနှင့် ကမ္မဇရုပ် ၁၈-ပါးတို့ ဖြစ်ပေါ်ကြ၏။

၎။ နာမရူပပစ္စယာသဠာယတနံ
နာမ်ရုပ်ကြောင့် သဠာယတန ဖြစ်သည်ဆိုရာဝယ် နာမ်ရုပ်အဖြစ် လောကီဝိပါက် ၃၂-ပါး၌ ယှဉ်ကြသော စေတသိက် ၃၅-ပါး (စေတသိက်နာမ်ခန္ဓာ ၃-ပါး)နှင့် ကမ္မဇရုပ် ၁၈-ပါးတို့ကိုပင် ကောက်ယူရမည်။

သဠာယတနအဖြစ် စက္ခာယတန၊ သောတာယတန၊ ဃာနာယတန၊ ဇိဝှာယတန၊ ကာယာယတန၊ မနာယတနတည်းဟူသော အဇ္ဈတ္တိကာယတန ၆-ပါးကိုယူရမည်။ ပထမအာယတန ၅-ပါးသည် စက္ခုပသာဒ၊ သောတပသာဒ၊ ဃာနပသာဒ၊ ဇိဝှာပသာဒ၊ ကာယပသာဒများ ဖြစ်ကြသဖြင့် ရုပ်အကြည်ဓာတ်များ ဖြစ်ကြ၏။ ထို့ောကာင့် ပဉ္စဝေါကာရဘုံ (ခန္ဓာ ၅-ပါးရှိသော ဘုံ (၀ါ) ရုပ်နာမ် ၂-ပါးရှိသောဘုံ)တို့၌သာ ဖြစ်ပေါ်နိုင်ကြ၏။

မနာယတနတွင် လောကီဝိပါက်စိတ် ၃၂-ပါးကိုသာ ကောက်ယူရမည်။ ၀ိညာဏ်ကြောင့် စေတသိက်နာမ်ဖြစ်ပြီး စေတသိက်နာမ်ကြောင့် မနာယတနဟူသော ၀ိညာဏ်ဖြစ်ရကား စိတ်နှင့် စေတသိက်တို့သည် အညမညသတ္တိဖြင့် ကျေးဇူးပြုကြ၏။

၅။ သဠာယတနပစ္စယာ ဖေဿာ
သဠာယတနကြောင့် ဖဿဖြစ်သည်ဆိုရာ၌ သဠာယတနအရ အဇ္ဈတ္တိကာယတန ၆-ပါးကိုပင် ယူရမည်။

စက္ခာယတနကြောင့် စက္ခုသမ္ဖဿဖြစ်၏။ သောတာယတနကြောင့် သောတသမ္ဖဿ ဖြစ်၏။ ဃာနယတနကြောင့် ဃာနသမ္ဖဿ ဖြစ်၏။ ဇိဝှာယတနကြောင့် ဇိဝှာသမ္ဖဿ ဖြစ်၏။ ကာယာယတနကြောင့် ကာယသမ္ဖဿ ဖြစ်၏။ မနာယတနကြောင့် မနောသမ္ဖဿ ဖြစ်၏။ သမ္ဖဿသည် ဖဿနှင့် အနက်တူ၏။

၆။ ဖဿပစ္စယာ ဝေဒနာ
ဖဿကြောင့် ဝေဒနာဖြစ်သည်ဆိုရာဝယ် ဖဿအဖြစ် လောကီဝိပါက်စိတ် ၃၂-ပါး၌ ယှသ်သော ဖဿစေတသိက်ကို ကောက်ယူရမည်။ ဝေဒနာအရ ထိုလောကီ ၀ိပါက်စိတ် ၃၂-ပါး၌ ယှဉ်သော ဝေဒနာ စေတသိက်ကို ကောက်ယူရမည်။

စက္ခုသမ္ဖဿကြောင့် စက္ခုသမ္ဖဿဇာဝေဒနာ ဖြစ်၏။ သောတသမ္ဖဿကြောင့် သောတသမ္ဖဿဇာဝေဒနာ ဖြစ်၏။ ဃာနသမ္ဖဿကြောင့် ဃာနသမ္ဖဿဇာဝေဒနာ ဖြစ်၏။ ဇိဝှာသမ္ဖဿကြောင့် ဇိဝှာသမ္ဖဿဇာဝေဒနာ ဖြစ်၏။ ကာယသမ္ဖဿကြောင့် ကာယသမ္ဖဿဇာဝေဒနာ ဖြစ်၏။ မနောသမ္ဖဿကြာင့် မနောသမ္ဖဿဇာ ဝေဒနာဖြစ်၏။

၇။ ဝေဒနာပစ္စယာ တဏှာ
ဝေဒနာကြောင့် တဏှာ ဖြစ်သည်ဆိုရာဝယ် ဝေဒနာအဖြစ် လောကီဝိပါက် ၃၂-ပါးတို့၌ ယှဉ်သော ဝေဒနာကိုပင် ကောက်ယူရမည်။ တဏှာအရ လောဘမူစိတ် ၈-ပါး၌ရှိသော လောဘ စေတသိက်ကို ကောက်ယူရမည်။

ဝေဒနာ ၆-ပါးကြောင့် ဖြစ်ပေါ်ကြသော တဏှာတို့မှာ ရူပတဏှာ၊ သဒ္ဒတဏှာ၊ ရသတဏှာ၊ ဖောဋ္ဌဗ္ဗတဏှာ၊ ဓမ္မတဏှာတို့ ဖြစ်ကြ၏။ အာရုံ ၆-ပါး၌ နှစ်သက်သာယာသော တဏှာတို့တည်း။ ရူပတဏှာသည် ရူပါရုံကို နှစ်သက်သာယာ၏။ သဒ္ဒတဏှာသည် သဒ္ဒါရုံကို နှစ်သက်သာယာ၏ စသည်ဖြင့် သိပါ။

၈။ တဏှာပစ္စယာ ဥပါဒါနံ
တဏှာကြောင့် ဥပါဒါန်ဖြစ်သည်ဆိုရာ၌ တဏှာသည် ရူပတဏှာ၊ သဒ္ဒတဏှာ၊ ဂန္ဓတဏှာ၊ ရသတဏှာ၊ ဖောဋ္ဌဗ္ဗတဏှာ၊ ဓမ္မတဏှာတို့ ဖြစ်ကြ၏။ ဥပါဒါန်သည် ကာမုပါဒါန်၊ ဒိဋ္ဌုပါဒါန်၊ သီလဗ္ဗတုပါဒါန်၊ အတ္တ၀ါဒုပါဒါန်တို့တည်း။

ဤတွင် ကာမုပါဒါန်သည် ကာမဂုဏ်၌ ပြင်းထန်စွာ စွဲလမ်းတပ်မက်သော တဏှာလောဘ ဖြစ်၏။ သို့ဖြစ်၍ အကြောင်းတဏှာနှင့် အကျိုးကာမုပါဒါန်တို့ မည်သို့ ထူးခြားသနည်းဟု မေးဖွယ်ရာရှိ၏။ အဖြေကား -

၁။ အချင်းချင်းထောက်ဆ၍ ရှေးကျပြီး အားသေးသော လိုချင်တပ်မက်မူသည် တဏှာ ဖြစ်၏။ နောက်ကျ၍ အားကြီးသော တပ်မက်မူသည် ဥပါဒါန်ဖြစ်၏။

၂။ ကေစိဆရာ (၀ါဒကွဲဆရာ)တို့က တစ်စုံတစ်ခုသော အာရုံကို မရသေးခင် လိုချင်တပ်မက်မူသည် တဏှာမည်၏၊ ရရှိပြီးနောက် စုံစုံမက်မက် နှစ်သက်စွဲလမ်းမူသည် ကာမုပါဒါန်မည်၏ဟု ဆိုကြ၏။

၃။ ထို့အပြင် တဏှာသည် အပ္ပိစ္ဆတာ(အလိုနည်းမူ)၏ ဆန့်ကျင်ဘက်ဖြစ်၏။ ကာမုပါဒါန်သည် သန္တုဋ္ဌိတာ(တင်းတိမ်ရောင့်ရဲမူ)၏ ဆန့်ကျင်ဘက် ဖြစ်၏။

၎။ တဏှာသည် တောင့်တမူ ရှာဖွေမူ ဒုက္ခစု၏ အကြောင်းရင်း ဖြစ်၏။ ကာမုပါဒါန်သည် ရရှိထားသော အာရုံကို ကြောင့်ကြရမူ၊ စောင့်ရှောက်ရမူ ဒုက္ခစု၏ အကြောင်းရင်း ဖြစ်၏။

ကျန်ဥပါဒါန် ၃-မျိုးတို့၏ တရားကိုယ်မှာ အယူလွဲမူ ဒိဋ္ဌိဖြစ်၏။ အတ္တ၀ါဥပါဒါန်သည် အတ္တရှိ၏ဟု စွဲယူသော သက္ကာယဒိဋ္ဌိဖြစ်၏ သီလဗ္ဗတုပါဒါန်သည် ခွေးအကျင့်၊ နွားအကျင့် စသည်တို့ဖြင့် သံသရာမှ လွတ်မြောက်နိုင်၏ဟု စွဲလမ်းသော ဒိဋ္ဌိ ဖြစ်၏။ ဒိဋ္ဌုဒါပါန်မှာ ကျန်မအယူလွဲမူ ဒိဋ္ဌိအမျိုးမျိုးဖြစ်၏။

မိမိကိုယ်ကို တဏှာဖြင့် ခင်မင်တွယ်တာနေမူကြောင့် သက္ကာယဒိဋ္ဌိဖြစ်၏။ မိမိကိုယ်ကို တဏှာဖြင့် ခင်မင်တွယ်တာမူကြောင့်ပင် နောင်ဘ၀၌ ချမ်းသာဖို့ရန် ရည်မှန်းလျက် ခွေးအကျင့်၊ နွားအကျင့်တို့ကို ကျင့်၏။ ဒိဋ္ဌုပါဒါန်ဟူသော ဒိဋ္ဌိများကိုလည်း တဏှာကြောင့်သာ ကောင်းနိုးရာရာ ထင်သည်တို့ကို ယူမှားမိခြင်းဖြစ်၏။

၉။ ဥပါဒါနပစ္စယာ ဘဝေါ
ဥပါဒါန်ကြောင့် ဘ၀ဖြစ်သည်ဆိုရာဝယ် ဥပါဒါန်သည် အထက်၌ ဖော်ပြခဲ့သော ဥပါဒါန် ၄-ပါး ဖြစ်၏။ ဘ၀အရမူ ကမ္မဘ၀နှင့် ဥပပတ္တိဘ၀ ၂-မျိုးကို ကောက်ယူရ၏။

ကမ္မဘ၀ ဟူသည်မှာ အကုသိုလ်စိတ် ၁၂-ပါး၊ မဟာကုသိုလ်စိတ် ၈-ပါး၊ မဟဂ္ဂုတ်ကုသိုလ်စိတ် ၉-ပါးတို့၌ ယှဉ်သော စေတနာ ကံ ၂၉-ပါးဖြစ်၏။ (သင်္ခါရအဖြစ် ကောက်ယူခဲ့သော ပုညာဘိသင်္ခါရ စသည်တို့ပင်တည်း။)

ဥပပတ္တိဘ၀ ဟူသည်မျာ ထိုကံ ၂၉-ပါးကြောင့် ဖြစ်သော လောကီဝိပါက်စိတ် ၃၂-ပါး၊ ၎င်းစိတ်တို့၌ ယှဉ်ကြသော စေတသိက် ၃၅-ပါးနှင့် ကမ္မဇရုပ် ၁၈-ပါးတို့ ဖြစ်ကြ၏။

ဥပါဒါန်ကြောင့် ဘ၀ဖြစ်ပုံမှာ ကာမုပါဒါန်အစွမ်းဖြင့် လူချမ်းသာ နတ်ချမ်းသာကို အလိုရှိ၍ ကံများ(ကမ္မဘ၀)ကို ပြုစီမံကြ၏။ တစ်ချို့သည် ဆရာတို့၏ ဟောပြောမူကြောင့် သားကောင်သတ်ပြီး ယဇ်နတ်ပူဇော်ကြ၏။ တစ်ချို့မှာ ဤဘ၀၌ပင်ကာ ကာမချမ်းသာကို ခံစားလို၍ ခိုးဝှက်လုယက်သည့် ဒုစရိုက်မူများကို ပြုလုပ်ကြ၏။ တစ်ချို့မှာမူ ဆရာကောင်းတို့၏ လမ်းညွှန်မူကြောင့် ကာမာဝစရကုသိုလ်ကံကို ဖြည့်ဆည်းကြ၏။ တစ်ချို့သည်ကား `ဈာန်ချမ်းသာသည် ကာမချမ်းသာထက်သာလွန်၏´ဟု ကြားဖူးကြသဖြင့် ထိုချမ်းသာကို ခံစားလိုသော ကာမုပါဒါန်ကြောင့် ရူပဈာန် အရပဈာန်တို့ကို အားထုတ်ကြ၏။

အကုသိုလ်ကမ္မဘ၀ကြောင့် သေလွန်သည့်အခါ အပါယ်ဘုံ၌ ဥပပတ္တိဘ၀ဖြစ်ရ၏။ ကုသိုလ်ကမ္မဘ၀ကြောင့် သေလွန်သောအခါ လူ့ဘုံ နတ်ဘုံ ဗြဟ္မာဘုံတို့၌ ဥပပတ္တိဘ၀ဖြစ်ကြ၏။

သတ္တ၀ါတို့သည် ဒိဋ္ဌုပါဒါန်၊ သီလဗ္ဗတုပါဒါန်၊ အတ္တ၀ါဒုပါဒါန်တို့ကြောင့်လည်း ကမ္မဘ၀အမျိုးမျိုးကို ပြုစီမံကြပြီးလျှင် သေလွန်ကြသည့်အခါ ဥပပတ္တိဘ၀အမျိုးမျိုးကို ရကြ၏။

၁၀။ ဘ၀ပစ္စယာ ဇာတိ
ဘ၀ကြောင့် ဇာတိဖြစ်သည်ဆိုရာ၌ ဘ၀အရ ကမ္မဘ၀ကိုပင် ယူရမည်။ ကမ္မဘ၀သည် လောကီကုသိုလ် အကုသိုလ်စိတ် ၂၉-ပါးတို့၌ ယှဉ်ကြသော စေတနာကံ ၂၉-ပါးတို့ ဖြစ်ကြ၏။

ဇာတိအရမူ ၀ိပါက်စိတ် ၃၂-ပါး၊ ၎င်းစိတ်တို့၌ ယှဉ်ကြသော စေတသိက် ၃၅-ပါးနှင့် ကမ္မဇရုပ် ၁၈-ပါးတို့၏ ဖြစ်ခြင်းဥပါဒ်ကို ကောက်ယူရမည်။ ဤသို့ ကောက်ယူသည့်အခါ အဟိတ်ပဋိသန္ဓေ ၂-ပါး၊ မဟာဝိပါက်ပဋိသန္ဓေ ၈-ပါး၊ ရူပါဝစရပဋိသန္ဓေ ၆-ပါး၊ အရူပါဝစရပဋိသန္ဓေ ၄-ပါး၊ ပေါင်းပဋိသန္ဓေ ၂၀တို့ ပါဝင်သွားကြ၏။ ထို့အပြင် ပ၀တ္တိအခါ၌ ဖြစ်ကြသော ၀ိပါက်စိတ် စေတသိက်များနှင့် ကမ္မဇရုပ်တို့လည်း ပါဝင်ကြ၏။

၁၁။ ဇာတိပစ္စယာ ဇရာမရဏံ သောကပရိဒေ၀ ဒုက္ခဒေါမနဿုပါယာသာသမ္ဘ၀န္တိ
ဇာတိသည် ဥပပတ္တိဘ၀၏ ပထမဦးဆုံးဥပါဒ်ခြင်း (၀ါ) ပဋိသန္ဓေနေခြင်း ဖြစ်၏။ ဥပပတ္တိဘ၀သည် ထိုထိုဘုံ၌ ဖြစ်ကြသော ၀ိပါက်နာမက္ခန္ဓာ (၀ိပါက်နာမ်ခန္ဓာ ၄-ပါး)နှင့် ကမ္မဇရုပ်များဖြစ်ကြ၏။

ဇာတိကြောင့် အိုခြင်းဇရာ၊ သေခြင်းမရဏ၊ စိုးရိမ်ပူပန်ခြင်းသောက၊ ငိုကြွေးခြင်းပရိဒေ၀၊ ကိုယ်ဆိုင်ရဲခြင်းဒုက္ခ၊ စိတ်ဆင်းရဲခြင်းဒေါမနဿနှင့် ပြင်းစွာ ပူဆွေးခြင်း ဥပါယာသတို့ ဖြစ်ပေါ်ကြ၏။

ဇရာသည် လောကီဝိပါက်စိတ် ၃၂-ပါး၊ ၎င်းတို့၌ ယှဉ်ကြသော စေတသိက် ၃၅-ပါးနှင့် ကမ္မဇရုပ်တို့၏ ရင့်ခြင်း (ဌီ) ဖြစ်၏။ သတ္တ၀ါတို့၏ အရွယ်မှ ဆုတ်ယုတ်ခြင်း၊ ရင့်ရော်အိုမင်းခြင်းပင်တည်း။

မရဏသည် လောကီဝိပါက်စိတ် ၃၂-ပါး၊ ၎င်းတို့၌ ယှဉ်ကြသော စေတသိက် ၃၅-ပါးနှင့် ကမ္မဇရုပ်တို့၏ ပျက်စီးခြင်း(ဘင်) ဖြစ်၏။ သတ္တ၀ါတို့၏ ဇီဝိတိနြေ္ဒကင်း၍ သေဆုံးခြင်းပင်တည်း။

သောကသည် ၀မ်းနည်းခြင်း၊ စိုးရိမ်ပူပန်ခြင်းဖြစ်၏။ တရားကိုယ်မှာ ဒေါသမူဒွေ၌ ယှဉ်သော ဒေါမနဿဝေဒနာ ဖြစ်၏။ ဆွေမျိုးညာတိ၊ ပစ္စည်းဥစ္စာ စသည်တို့ ပျက်စီးမူကြောင့် စိတ်နှလုံး၏ ပူပန်ခြင်းပင်တည်း။

ပရိဒေ၀သည် တစ်စုံတစ်ခု ပျက်စီးမူကြောင့် တမ်းတငိုကြွေးခြင်း ဖြစ်၏။ တရားကိုယ်မှာ စိတ္တဇ၀ိပလ္လာသသဒ္ဒရုပ်ဖြစ်၏။ စိတ်ကြောင့်ဖြစ်သော ဖောက်ပြန်သည့် အသံရုပ်ပင်တည်း။

ဒုက္ခသည် ကိုယ်ဆင်းရဲမူ ဖြစ်၏။ တရားကိုယ်မှာ ဒုက္ခသဟဂုတ် ကာယ၀ိညာဏ်စိတ်နှင့် ယှဉ်သော ဝေဒနာ စေတသိက်ဖြစ်၏။

ဒေါမနဿသည် စိတ်ပင်ပန်းဆင်းရဲမူ၊ နှလုံးမသာမယာမူ ဖြစ်၏။ တရားကိုယ်မှာ ဒေါသမူဒွေ၌ ယှဉ်သော ဝေဒနာဖြစ်၏။

ဥပါယာသသည် သောကပရိဒေ၀တို့ထက် လွန်ကဲသော အသံမျှ မထွက်နိုင်အောင် ရိူက်ကြီးငင်ကြီး ဖြစ်ကာ အတွင်းဆွေးဆွေးခြင်း၊ ပြင်းပြစွာ ဆင်းရဲပင်ပန်းခြင်း၊ နစ်မျောခြင်းဖြစ်၏။ တရားကိုယ်မှာ ဒေါသမူဒွေ၌ ယှဉ်သော ဒေါသပင်တည်း။

အကျိုးရင်းနှင့် အကျိုးဆက်
ဇာတိရှိလျှင် မည်သည့်ဘ၀၌မဆို ဇရာမရဏတို့ ဏကန်မုချရှိ၏။ ထို့ကြောင့် ဇရာမရဏသည် မုချအကျိုး (၀ါ) အရင်းခံအကျိုး ဖြစ်၏။

သောက၊ ပရိဒေ၀၊ ဒုက္ခ၊ ဒေါမနဿ၊ ဥပါယာသတည်းဟူသော တရားငါးပါးတို့သည် ဗြဟ္မာပြည်၌ မရှိကြ၊ နတ်ပြည်၌ အချို့ရှိပြီး အချို့မရှိ၊ လူ့ပြည်၌လည်း ဇာတိဖြစ်ပြီး မကြာခင်သေဆုံးသူတို့မှာ သောကစသော တရားအချို့ ဖြစ်ခွင့်မရ။ သို့အတွက် သောကပရိဒေ၀စသည့် တရားစုသည် ဇာတိ၏မုချ အကျိုးမဟုတ်၊ ဇာတိနှင့် ဆက်သွယ်၍ ဖြစ်တတ်သော အကျိုးဆက်သာ ဖြစ်၏။

ပဋိစ္စသမုပ္ပါဒ် တရားတော်၏ သိမှတ်ဖွယ်များ

၁။ အင်္ဂါ ၁၂-ပါး
ပဋိစ္စသမုပ္ပါဒ် စက်ဝိုင်း၌ လှည်းဘီးစက်ဝိုင်း၏ ဒေါက်ဆန်များကဲ့သို့ မပါလျှင် မပြီး၊ အရေးကြီးသောအင်္ဂါ ၁၂-ပါးရှိ၏။

၎င်းတို့ကား အ၀ိဇ္ဇာ ၁-ပါး၊ သင်္ခါရ ၁-ပါး၊ ၀ိညာဏ် ၁-ပါး၊ နာမ်ရုပ် ၁-ပါး၊ သဠာယတန ၁-ပါး၊ ဖဿ ၁-ပါး၊ ဝေဒနာ ၁-ပါး၊ တဏှာ ၁-ပါး၊ ဥပါဒါန် ၁-ပါး၊ ဘ၀ ၁-ပါး၊ ဇာတိ ၁-ပါး၊ ဇရာမရဏ ၁-ပါးတို့ ဖြစ်ကြ၏။
၂။ အဓွန့် ၃-ပါး
အဓွန့်ဟူသည် ကာလဖြစ်၏။ ကာလ၏ အပိုင်းအခြားအရ ဖြစ်ပေါ်ကြသော တရားတို့ကို ဌာနူပစာရအားဖြင့် အတိတ်၊ ပစ္စုပ္ပန်၊ အနာဂတ်ဟု ပိုင်းခြားအပ်၏။

အတိတ်အဓွန့် = အ၀ိဇ္ဇာနှင့် သင်္ခါရ။

ပစ္စုပ္ပန်အဓွန့် = ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ တဏှာ၊ ဥပါဒါန်၊ ကမ္မဘ၀။

အနာဂတ်အဓွန့် = ဇာတိနှင့် ဇရာမရဏ။

သတ္တ၀ါတစ်ဦးသည် အတိတ်ဘ၀၌ သံသရာ၏အပြစ်ကို မမြင်နိုင်အောင် အ၀ိဇ္ဇာ ဖုံးလွှမ်းသဖြင့် အကုသိုလ်သင်္ခါရ စသည်တို့ကို ပြုခဲ့မိ၏။ ထို့ကြောင့် အ၀ိဇ္ဇာနှင့် သင်္ခါရတို့သည် အတိတ်အဓွန့် ဖြစ်၏။

အတိတ်က ပြုခဲ့သော ကုသိုလ်၊ အကုသိုလ် သင်္ခါရတို့ကြောင့် ယခု ပစ္စုပ္ပန်ဘ၀၌ ပဋိသန္ဓေကာလမှစ၍ ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ တဏှာ၊ ဥပါဒါန်၊ ကမ္မဘ၀တို့ ဖြစ်ကြ၏။ ထို့ကြောင့် ဤတရား ၈-ပါးတို့သည် ပစ္စုပ္ပန်အဓွန့်ဖြစ်၏။

ယခုဘ၀၌ ကမ္မဘ၀ဟူသော ကုသိုလ် အကုသိုလ်ကံတို့ကို ပြုစီမံပြန်ရကား နောက်အနာဂတ် ဘ၀တွင် ဇာတိနှင့် ဇရာ မရဏတို့ ဖြစ်ကြရ၏။ သို့ဖြစ်၍ ဇာတိနှင့် ဇရာမရဏတို့သည် အနာဂတ်အဓွန့်ဖြစ်၏။

၃။ အခြင်းအရာ ၂၀-ပါး
အတိတ်အကြောင်း ၅-ပါး = အ၀ိဇ္ဇာ၊ သင်္ခါရ၊ တဏှာ၊ ဥပါဒါန်၊ ကမ္မဘ၀။

ပစ္စုပ္ပန်အကျိုး ၅-ပါး = ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ။

ပစ္စုပ္ပန်အကြောင်း ၅-ပါး = တဏှာ၊ ဥပါဒါန်၊ ကမ္မဘ၀၊ အ၀ိဇ္ဇာ၊ သင်္ခါရ။

အနာဂတ်အကျိုး ၅-ပါး = ၀ိညာဏ်၊ နာပ်ရုပ်၊ သဠာယတန၊ ဖဿ၊ ဝေဒနာ။

အ၀ိဇ္ဇာနှင့် သင်္ခါရတို့သည် အတိတ်အဓွန့်တရားများ ဖြစ်ကြ၏။ ထို ၂-ပါးတွင် အ၀ိဇ္ဇာသည် ကိလေသာ ၁၀-ပါး၌ ပါဝင်သဖြင့် ကိလေသာ ၀ဋ်တရားဖြစ်၏။ တဏှာနှင့် ဥပါဒါန်တို့သည်လည်း ကိလေသာဝဋ်တရားများ ဖြစ်ကြ၏။ ထိုသို့ ကိလေသာဝဋ်ချင်း တူနေခြင်းကြောင့် အ၀ိဇ္ဇာကို ယူလိုက်သောအခါ တဏှာနှင့် ဥပါဒါန်တို့လည်း ပါဝင်လာကြ၏။

တစ်ဖန်သင်္ခါရသည် ကမ္မ၀ဋ်ဖြစ်၏။ ကမ္မဘ၀သည်လည်း ကမ္မ၀ဋ်ပင်ဖြစ်၏။ ထိုသို့ ကမ္မ၀ဋ်ချင်းတူသောကြောင့် အတိတ်ဘ၀၌ သင်္ခါရကို ယူလိုက်သည့်အခါ ကမ္မဘ၀ကိုလည်း အ၀ိနာဘာဝ (မကင်းစကောင်းသော) နည်းအားဖြင့် ယူပြီး ဖြစ်တော့၏။

သို့ဖြစ်၍ အတိတ်ဘ၀၌ `အ၀ိဇ္ဇာ၊ သင်္ခါရ၊ တဏှာ၊ ဥပါဒါန်၊ ကမ္မဘ၀´ဟူသော အကြောင်း ၅-ပါးကို ရ၏။

ဝိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာတို့သည် အတိတ်ကံကြောင့်ဖြစ်ကြသော ပစ္စုပ္ပန်အကျိုး ၅-ပါးဖြစ်ကြ၏။

ပစ္စုပ္ပန်အဓွန့်၌ တဏှာ၊ ဥပါဒါန်၊ ကမ္မဘ၀ ဟူသော အကြောင်း ၃-ပါးတို့သည် တိုက်ရိုက်လာ၏။ ထို ၃-ပါးကို ယူလိုက်သောအခါ အထက်၌ ဆိုခဲ့သည့် အ၀ိနာဘာဝနည်းအရ အ၀ိဇ္ဇာနှင့် သင်္ခါရတို့ကိုလည်း ယူပြီး ဖြစ်တော့၏။ သို့အတွက် ပစ္စုပ္ပန်ဘ၀၌ `တဏှာ၊ ဥပါဒါန်၊ ကမ္မဘ၀၊ အ၀ိဇ္ဇာ၊ သင်္ခါရ´ဟူသည့် အကြောင်း ၅-ပါးကို ရပြန်၏။

အနာဂတ်အဓွန့်၌ ဇာတိနှင့် ဇရာမရဏတို့ကို ဖော်ပြထား၏။ ဇာတိ၌ တရားကိုယ် သီးခြားမရှိ။ ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာတို့၏ ဖြစ်ခြင်းဥပါဒ်ကိုပင် ဇာတိဟု ယူရ၏။ ထို့အတူ ဇရာ၊ မရဏတို့သည် ထိုတရား ၅-ပါးတို့၏ ရင့်ခြင်းဌီနှင့် ပျစ်စီးခြင်းဘင်တို့ ဖြစ်ကြ၏။ ထို့ကြောင့် အနာဂတ်အကျိုးအဖြစ် `၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ´ တို့ကိုပင် ယူရ၏။

သို့ဖြစ်၍ အတိတ်ဘ၀၌ အကြောင်း ၅-ပါး၊ ပစ္စုပန်ဘ၀၌ အကျိုး ၅-ပါး၊ တစ်ဖန် ပစ္စုပ္ပန်ဘ၀၌ အကြောင်း ၅-ပါး၊ အနာဂတ်ဘ၀၌ အကျိုး ၅-ပါး ဟူသော အခြင်းအရာ ၂၀-ကိုရ၏။

၎။ စတုသင်္ခေပခေါ် အလွှာ ၄-ပါး
အတိတ်ဘ၀အကြောင်း ၅-ပါးကို တစ်လွှာ၊ ပစ္စုပ္ပန်ဘ၀အကျိုး ၅-ပါးကို တစ်လွှာ၊ ပစ္စုပ္ပန်ဘ၀အကြောင်း ၅-ပါးကို တစ်လွှာ၊ အနာဂတ်ဘ၀အကျိုး ၅-ပါးကို တစ်လွှာဟူ၍ ၄-ပါးရှိ၏။

၅။ တိသန္ဓိခေါ် အစပ် ၃-ပါး
ပဋိစ္စသမုပ္ပါဒ်အင်္ဂါများကို စဉ်ထားသောအခါ အကြောင်းတရား၏ အဆုံးနှင့် အကျိုးတရား၏ အစသည် တစ်စပ်၊ အကျိုးတရား၏အဆုံးနှင့် အကြောင်းတရား၏ အစသည် တစ်စပ်၊ တစ်ဖန်အကြောင်းတရား၏ အဆုံးနှင့် အကျိုးတရား၏ အစသည် တစ်စပ်ဟူ၍ အစပ် ၃-စပ် ရှိ၏။ ထိုအစပ်နေရာတို့ကို ပုဒ်မ ခြား၍ ဖော်ပြရသော် -

`အ၀ိဇ္ဇာ၊ သင်္ခါရ။ ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ။ တဏှာ၊ ဥပါဒါန်၊ ကမ္မဘ၀။ ဇာတိ၊ ဇရာ မရဏ´

ထို့ကြောင့် သင်္ခါရနှင့် ၀ိညာဏ်တို့၏ အကြားသည် အတိတ်အကြောင်းနှင့် ပစ္စုပ္ပန်အကျိုးတို့၏ အစပ်၊ ဝေဒနာနှင့် တဏှာအကြားသည် ပစ္စုပ္ပန်အကျိုးနှင့် ပစ္စုပ္ပန် အကြောင်းတို့၏ အစပ်၊ ကမ္မဘ၀နှင့် ဇာတိအကြားသည် ပစ္စုပ္ပန်အကြောင်းနှင့် အနာဂတ်အကျိုးတို့၏ အစပ်ဖြစ်ကြ၏။

၆။ ၀ဋ် ၃-ပါး
`၀ဋ္ဋ´ သဒ္ဒါသည် စက်ဘီးများ ချာချာလည်သလို `လည်ပတ်ခြင်း´အနက်ကို ဟော၏။ ထို့ကြောင့် `အကြောင်းပြီးလျှင် အကျိုး၊ အကျိုးပြီးလျှင် အကြောင်း´ဟု အကြောင်းအကျိုး မပြတ်ဘဲ ဆက်ကာ ဆက်ကာလည်ပတ်နေသော ပဋိစ္စသမုပ္ပါဒ်တရားကို `၀ဋ္ဋ = ၀ဋ်´ဟု ခေါ်၏။

ကိလေသ၀ဋ် = အ၀ိဇ္ဇာ၊ တဏှာ၊ ဥပါဒါန်။

ကမ္မ၀ဋ် = ကမ္မဘ၀၊ သင်္ခါရ။

ဝိပါက၀ဋ် = ဥပပတ္တိဘ၀၊ ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ ဇာတိ၊ ဇရာမရဏ။

အ၀ိဇ္ဇာ၊ တဏှာနှင့် ဥပါဒါန်တို့သည် ကိလေသာတရားများ ဖြစ်ကြသဖြင့် ကိလေသ၀ဋ်မည်၏။

ကမ္မဘ၀ဟူသည် ဘ၀တစ်စိတ်နှင့် သင်္ခါရတို့သည် ကံတရားချည်း ဖြစ်ကြသောကြောင့် ကမ္မ၀ဋ်မည်၏။

ဥပတ္တိဘ၀ဟူသော ဘ၀ တစ်စိတ်နှင့် ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ ဇာတိ၊ ဇရာ၊ မရဏတို့သည် ကံ၏အကျိုးတရားများ ဖြစ်ကြသောကြောင့် ၀ိပါက၀ဋ်မည်၏။

ကိလေသ၀ဋ်ရှိလျှင် ကမ္မ၀ဋ် မုချဖြစ်၏။ ကမ္မ၀ဋ်ရှိလျှင် ၀ိပါက၀ဋ် အမြဲဖြစ်၏။ ၀ိပါက၀ဋ်ဟူသည့် ဝေဒနာရှိလျှင် တဏှာစသော ကိလေသ၀ဋ် ဖြစ်ပြန်၏။ ဤသို့ အကြောင်းအကျိုး ဆက်စပ်လျက် ပတ်ချာလည်နေသော တရားကို `၀ဋ်´ဟု ခေါ်ဆိုရ၏။

၇။ ၀ဋ်မြစ် ၂-ပါး
ပဋိစ္စသမုပ္ပါဒ်စက်သည် အတိတ်ဘ၀အကြောင်းမှစ၍ ပစ္စုပ္ပန်ဘ၀အကျိုး ဖြစ်သည့်တိုင်အောင် အရှေ့ပိုင်းတစ်စက်၊ ပစ္စုပန်ဘ၀အကြောင်းမှစ၍ အနာဂတ်ဘ၀ အကျိုးတိုင်အောင် နောက်ပိုင်းတစ်စက်ဟူ၍ ၂-စက်ရှိ၏။

ထိုတွင် `အ၀ိဇ္ဇာ၊ သင်္ခါရ၊ ၀ိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာတို့ကား ရှေ့ပိုင်း တစ်စက်ဖြစ်၏။ ထိုစက်၌ အ၀ိဇ္ဇာသည် အရင်းမူလအစ ဖြစ်၏။

တစ်ဖန် `တဏှာ၊ ဥပါဒါန်၊ ဘ၀၊ ဇာတိ၊ ဇရာ မရဏ တို့ကား နောက်ပိုင်း တစ်စက် ဖြစ်၏။ ဤစက်၌ တဏှာသည် အရင်းမူလအစဖြစ်၏။

ထို့ကြောင့် ၀ဋ်မြစ် ၂-ပါးတို့သည် အ၀ိဇ္ဇာနှင့် တဏှာတို့ ဖြစ်ကြ၏။

၈။ စက်ရဟတ်ပျက်ကိန်း
သစ်တစ်ပင်၌ ရေသောက်မြစ်ပြတ်လျှင် တစ်ပင်လုံး ပျက်စီးရသကဲ့သို့ ထို့အတူ သံသရာတွင် စည်ပင်နေသည့် သတ္တ၀ါဟု ခေါ်ဆိုအပ်သော ရုပ်နာမ်ခန္ဓာသစ်ပင်ကြီး၌ အ၀ိဇ္ဇာ-တဏှာဟူသည့် ရေသောက်မြစ် ၂-ခုကို အရဟတ္တမဂ်လက်နက်ဖြင့် ဖျက်ဆီးလိုက်သောအခါ ရုပ်နာမ်သံသရာကြီး အပြီးသတ် ချုပ်ငြိမ်းလေတော့၏။

၉။ အ၀ိဇ္ဇာ၏အကြောင်း
ပဋိစ္စသမုပ္ပါဒ်တရားတော်တွင် `အ၀ိဇ္ဇာကြောင့် သင်္ခါရဖြစ်၏၊ သင်္ခါရကြောင့် ၀ိညာဏ်ဖြစ်၏၊ ပေ၊ ဇာတိကြောင့် ဇရာ မရဏ, သောကပရိဒေ၀တို့ ဖြစ်ကြ၏ဟု အ၀ိဇ္ဇာမှစ၍ ဟောထားရာ အဘယ်အကြောင်းကြောင့် အ၀ိဇ္ဇာ ဖြစ်သနည်းဟု မေးဖွယ်ရာ ရှိ၏။

အဖြေကား `အာသဝေါတရား ၄-ပါးကြောင့် အ၀ိဇ္ဇာဖြစ်၏´ဟူသတည်း။ အာသဝေါတရား ၄-ပါးမှာ ကာမာသ၀၊ ဘ၀ါသ၀၊ ဒိဋ္ဌာသ၀နှင့် အ၀ိဇ္ဇာသ၀တို့ ဖြစ်ကြ၏။

လောက၌ နေ့စဉ်လူအများ သေဆုံးနေကြသည်ကို ကြားသိရသော်လည်း သောကပရိဒေ၀တို့ မဖြစ်မိ။ မိမိနှင့်အလွန် အကျွမ်းဝင်ချစ်ခင်သော လူတစ်ယောက်သေဆုံးလျှင်မူ သောကပရိဒေ၀ အလွန်အမင်း ဖြစ်ကြရ၏။ ဤကား ခင်မင်တွယ်တာမူ တဏှာလောဘဟူသည် ကာမာသ၀ကြောင့် သောကစသည်တို့ ဖြစ်ခြင်းပင်တည်း။

အလွန်ခမ်းနားကြီးကျယ်သော ဘုံဗိမာန်များ၌ ကာလရှည်ကြာစွာ စံမြန်းနေရသော နတ်ဗြဟ္မာများသည် ဘ၀ါသ၀ဖြင့် နှစ်သက်အားရနေကြ၏။ ဘုရားရှင်၏ အနိစ္စ၊ ဒုက္ခ၊ အနတ္တနှင့် စပ်သော တရားစကားကို ကြားကြရသည့်အခါ မိမိတို့၏ဘ၀ မမြဲသည်ကို တွေးမိ၍ လွန်စွာ ထိတ်လန့်ကြောက်ရွံ့လျက် ဒေါသမူစိတ်နှင့် ဒေါမနဿဝေဒနာတို့ ဖြစ်ကြရ၏။

`ရုပ်ဟူသည် ငါတည်း၊ ငါ၏ရုပ်တည်း´ဟု ဒိဋ္ဌာသ၀ဖြင့် စွဲလမ်းနေသူသည် ရုပ်ဖောက်ပြန် ပြောင်းလဲသောအခါ သောကစသည် ဖြစ်ရ၏။

သဘောမှန်ကို မသိမြင်နိုင်သည့် အ၀ိဇ္ဇာတည်းဟူသော အမှောင်တရားကြောင့်သာ သတ္တ၀ါတို့သည် သောကစသည်ဖြစ်ကြရ၏။ ပရိဒေ၀ဟူသော ငိုကြွေးခြင်းသည် အ၀ိဇ္ဇာမကင်းသည့် သူတို့၌သာ ဖြစ်လေ့ရှိ၏။ ဒုက္ခဖြစ်သည့်အခါ စိတ်မချမ်းသာဘဲ ဒေါသမူ စိတ်ဖြစ်ပြီး စိတ်ဆင်းရဲခြင်းဟူသော ဒေါမနဿ ဖြစ်ရ၏။

တစ်ဖန် ဒေါသမူ၊ လောဘမူ၊ မောဟမူ စိတ်တို့၌ မောဟတူသည့် အ၀ိဇ္ဇာတရား အမြဲယှဉ်တွဲလျက်ဖြစ်ပေါ်နေရာ မသိမိုက်မဲမူ အ၀ိဇ္ဇာကြောင့် သောကပရိဒေ၀စသည် ဖြစ်ပေါ်ကြပြီး သောကပရိဒေ၀စသည်တို့ ဖြစ်ပေါ်လျှင် အ၀ိဇ္ဇာယှဉ်တွဲပါလာပြန်၏။ ရှေးရှေး အ၀ိဇ္ဇာသ၀ကြောင့် သောကစသည်နှင့်အတူ နောက်နောက် အ၀ိဇ္ဇာတို့ ဖြစ်ခြင်းပင်တည်း။

သို့ဖြစ်၍ `အရင်းစစ် အမြစ်မြေက´ ဟူသည်နှင့်အညီ အာသဝေါတရား ၄-ပါးကြောင့် သောကပရိဒ၀ စသည်တို့ ဖြစ်ပေါ်ကြပြီး သောကစသည်ဖြစ်ပေါ်သောအခါ အ၀ိဇ္ဇာသည်လည်း ပါဝင်လာကြတော့၏။ ထို့ကြောင့် အ၀ိဇ္ဇာ၏ အကြောင်းသည် အာသဝေါ ၄-ပါးဖြစ်သတည်း။